‘Saenaot Olsem Ol Sta’
1 Long wol ya, ol man oli stap long tudak long saed blong spirit mo oli mekem ol fasin we oli blong tudak nomo. Be, samwe long sikis milian man we oli stap wosipim trufala God, Jeova, long 234 kantri raon long wol, oli stap ‘saenaot olsem ol sta.’ (Fil. 2:15) Hemia i min se ol man oli stap wajem yumi. ?Olsem wanem yumi save soemaot laet blong trutok we i kamaot long Jeova?—2 Kor. 3:18.
2 Ol Fasin Blong Yumi: Ol man oli luksave kwiktaem nomo se fasin blong yumi i defren. (1 Pita 2:12) Wan woman i luk se wan Witnes long wok blong hem i kaen mo i rere oltaem blong givhan, mo tu hem i no stap tok swea mo i no stap laf long ol doti tok plei blong ol narafala man long wok. Nating se ol narafala oli yusum sam doti tok swea fored blong Witnes ya blong traem mekem hem i kros, be hem i stap kwaet mo i no lego ol gudfala fasin blong hem. ?Fasin blong hem i mekem wanem long woman ya? Woman ya i tingting bak i se: “Mi mi rili sapraes long fasin blong hem. Ale, mi wantem save wanem samting nao we Baebol i tijim. Mi stat stadi long Tok Blong God mo biaen mi tekem baptaes.” Hem i gohed i se: “Fasin blong Witnes ya nao i pulum mi blong wantem save moa long saed blong ol bilif blong ol Witnes Blong Jeova.”
3 Fasin we yumi mekem long ol bigman blong gavman, tingting we yumi gat long ol fasin blong wol, mo toktok blong yumi we i klin, oli mekem man i luksave klia se ol Witnes Blong Jeova oli wan ogenaesesen we i folem ol hae rul blong Baebol. Ol gudfala wok ya oli leftemap nem blong Jeova mo oli pulum ol man blong oli mekem wosip long hem.
4 Toktok Blong Yumi: I tru se sipos yumi no tokbaot bilif blong yumi long ol narafala we oli luk gudfala fasin blong yumi, bambae oli no save from wanem yumi defren. ?Ol man long ples blong wok blong yu no ol fren long skul blong yu, oli save se yu yu wan Witnes Blong Jeova? ?Taem yu yu storian wetem narafala, yu lukaot rod blong mekem storian ya i kam wan janis blong prij? ?Yu yu rili gat strong tingting blong “letem laet ya i saenaot” long eni taem we i stret blong mekem olsem?—Mat. 5:14-16.
5 Blong mekem gud wok blong yumi blong letem laet blong yumi i saenaot, yumi mas rere blong lego sam samting we yumi nomo i wantem. Yumi mas wok wetem ful hat blong yumi. Samting ya bambae i givhan long yumi blong lego ol samting we oli no impoten mo bambae yumi traem mekem bes blong yumi long wok blong prij, blong pulum plante man oli kam disaepol mo givhan long olgeta blong kasem laef.—2 Kor. 12:15.
6 Long fasin mo toktok blong yumi, i gud yumi gohed blong saenaot olsem ol sta. Sipos yumi mekem olsem, ol narafala bambae oli wantem joen wetem yumi blong leftemap nem blong Jeova.