Yusum Buklet Blong Pulum Tingting Mo Kasem Hat Blong Man
1 Trutok blong Baebol we yumi givimaot i mas pulum tingting mo hat blong man tu. Taem Jisas i talemaot trutok long ol man we oli lesin long hem, hem i jusum ol poen we oli pulum intres blong olgeta mo pusum olgeta blong tekem aksin. (Luk 24:17, 27, 32, 45) Wok blong yumi i save karem frut sipos yumi traehad blong luksave ol nid long saed blong speret blong olgeta we oli lesin long yumi.
2 Ol buklet oli nambawan tul blong kasem tingting mo hat blong ol man we yumi mitim olgeta long wok blong prij. Yumi save stat naoia blong tingbaot wanem kaen man we bambae i intres long ol wanwan buklet ya we yumi mas seremaot long manis Ogis:
—?God i Rili Kea Long Yumi? Ol man we oli trabol long saed blong mane no we oli stap harem nogud tumas, bambae oli glad tumas long mesej blong buklet ya, we i leftemap tingting long saed blong wan fyuja we i no moa gat fasin safa.
—What Is the Purpose of Life—How Can You Find It? Ol yangfala we oli wari tumas long fyuja blong olgeta, bambae oli haremgud long ol ansa we Baebol i givim insaed long buklet ya.
—?Wanem Samting We God i Wantem Yumi Blong Mekem? Buklet ya i eksplenem klia wanem samting olgeta man oli mas mekem, olsem we God i wantem. Buklet ya i save givhan bigwan blong statem Baebol stadi taem yumi visitim bakegen olgeta we oli bin soem intres.
—When Someone You Love Dies. Plante man we oli lukaot long wok blong berem dedman, bambae oli wantem gat sam kopi blong buklet ya blong givim long ol famle we oli stap harem nogud. Ol pablisa we oli go prij long ol beregraon, oli yusum buklet ya blong leftemap tingting blong olgeta we oli stap sore. Tu sista i prij long seven memba blong wan famle we oli stap prea long gref. Tufala i serem nambawan mesej we i stap insaed long buklet ya blong leftemap tingting blong famle ya. !Frut we i kamaot se, long nekis dei, tufala i statem Baebol stadi wetem mama blong famle ya!
—Should You Believe in the Trinity? Maet wan man we i strong long skul i lesin long ol trutok insaed long buklet ya we oli soemaot klia stampa bilif ya blong Krisendom.
3 Traem savegud ol samting insaed long ol wanwan buklet ya, mo tingbaot beswan rod blong yusum olgeta long teritori blong yu. Blong kasem moa advaes long saed ya, lukluk laswan pej blong Kingdom Wok blong Julae 1998. Bambae Jeova i blesem ol traehad blong yu, taem yu stap traem blong kasem tingting mo hat blong ol man.—Mak 6:34.