Karem Gudfala Frut From Program Blong Tiokratik Skul Blong Yia 1999
1 Jisas i wan Nambawan Tija. Ol man oli “sapraes tumas long hem, from we tok blong hem i gat paoa.” (Mak 1:22) I no gat wan long yumi we i save toktok mo tijim man olsem we Jisas i bin mekem. Nating se i olsem, yumi save traehad blong folem eksampel blong hem. (Wok 4:13) Blong kasem mak ya, yumi mas joen long Tiokratik Skul. Skul ya bambae i halpem yumi blong kamgud moa long fasin blong yumi blong toktok mo tijim man.
2 Long 1999, bighaf blong ol Tok N. 1 bambae oli stanap long ol atikol blong Wajtaoa mo Wekap! blong 1997. Sipos yumi ridim ol atikol ya fastaem long haos mo harem olgeta bakegen long program blong skul, bambae save blong yumi long saed blong spirit i kam bigwan moa. Olgeta we oli kasem pepa blong mekem tok ya oli mas soemaot olsem wanem blong mekem save ya i wok long laef blong yumi. Tok blong olgeta i mas laef mo i mas pulum intres blong ol man. Tok N. 3 bambae i stanap long buk ya Family Happiness mo Tok N. 4 bambae i storebaot wan man blong Baebol. Be, wanwan taem bambae Tok N. 3 i storebaot wan man blong Baebol, mo Tok N. 4 i tokbaot buk ya Family Happiness. Brata we i lukaot long skul i mas save wanem i stap long ol wanwan tok ya bifo we hem i jusum man blong mekem ol tok ya. Olgeta studen we oli kasem pepa blong mekem wan tok long buk ya Family Happiness oli mas man we oli soem gudfala eksampel long prapa famle laef blong olgeta.
3 Mekem Advaes i Wok, Mo Reregud: Evriwan i save kamgud moa long fasin blong toktok mo tijim man. (1 Tim. 4:13) Taswe, i gud yumi traem kasem moa advaes, mo neva tingbaot advaes olsem nating nomo. (Prov. 12:15; 19:20) Man we i gat gudhan blong eksplenem trutok long ol miting mo wok blong prij, hem i no jes talemaot ol stamba poen no ridim sam vas blong Baebol olbaot nomo. Yumi mas kasem hat blong man mo pulum olgeta blong mekem wanem we yumi talem i wok long laef blong olgeta. Yumi save mekem samting ya sipos yumi tokbaot trutok wetem fulhat blong yumi blong winim tingting blong man. (Skelem wetem Wok 2:37.) Ol advaes we yumi kasem long Tiokratik Skul bambae oli halpem yumi blong kasem mak ya.
4 Taem yu kasem pepa blong yu blong mekem tok, tingbaot poen we yu mas wok long hem olsem School Guidebook i eksplenem. Tingbaot olsem wanem yu save folem advaes we yu kasem finis. Tingting dip long stamba tok blong yu, fasin blong tok we bambae yu yusum, mo olsem wanem yu save yusumgud ol vas we oli stap long haf ya we yu wok long hem. Tingtinggud long beswan rod blong yusum ol poen ya blong tijim man mo pusum olgeta blong wok.—1 Tim. 4:15, 16.
5 Sipos yu fraet lelebet blong putum nem blong yu long skul, i gud yu prea long saed ya mo biaen, talemaot tingting blong yu long elda we i lukaot long skul. Evriwan i save karem gudfala frut sipos oli yusumgud program we bambae i kamaot long Tiokratik Skul blong 1999.