Singaot Olgeta Blong Kam
1 Wan tok we i kamaot plante handred yia bifo, i stap goaot yet tede. Tok ya i singaot ol man blong 233 kantri raonabaot long wol blong kam, i se: “Yufala i kam. Yumi go antap long hil ya blong hem. . . . Hem bambae i tijim yumi long fasin we hem i wantem blong yumi folem, nao bambae yumi save folem ol rod we hem i jusumaot.” (Aes. 2:3) Blong halpem ol man blong gohed gud long saed blong spirit mo kasem laef we i no save finis, beswan rod i blong lidim olgeta i go long ogenaesesen blong Jeova.
2 Sam pablisa oli ting se i moagud blong singaot man i kam long Haos Kingdom nomo taem oli luk se man ya i gohed gud long Baebol stadi blong hem. Be, samtaem sam man bambae oli kam long miting blong kongregesen bifo we oli stat blong stadi Baebol. Yumi no mas wet tumas blong singaot man wetem kaen fasin mo leftemap tingting blong olgeta blong kam long ol miting.
3 Yumi Save Mekem Wanem: Blong singaot ol man, yumi mas yusumgud ol smol pepa we oli talem taem blong ol miting long ples blong yumi. Talem long ol man se ol miting oli fri nomo mo i no gat kleksin. Eksplenem wanem bambae i hapen long ol miting ya. Soemaot klia se ol miting ya oli olsem ol kos blong stadi Baebol, mo se i gat sam buk we evriwan i stadi long hem mo yusum long taem blong ol miting ya. Tokbaot hu olgeta we oli kam long miting ya se, oli blong defren aelan mo oli gat defren fasin blong laef. Talem tu se ol man we oli kam long ol miting ya oli laef raonabaot long olgeta nomo, mo talem se ol pikinini tu oli save kam nomata hamas yia oli gat. Evri wik yumi mas singaotem olgeta we oli stap stadi wetem yumi blong kam, mo talem se yumi rere blong halpem olgeta blong faenem rod blong kam.
4 Wan long ol laswan tok we i stap long Baebol, i singaot yumi blong yusum ol samting we Jeova i givim blong kasem laef: “Tabu spirit wetem Woman blong Smol Sipsip, tufala i talem se, Yu kam . . . Yufala we i tosta, yufala i kam. Yufala we i wantem dring, yufala i kam tekem wota ya blong laef, we i olsem presen blong yufala.” (Rev. 22:17) I no gat wan samting we bambae i tekem ples long fasin ya blong singaot ol man blong kam long miting blong yumi.
5 Profet tok blong Aesea 60:8 i tokbaot plante handred taosen man blong presem God, we oli stap kam insaed long ol kongregesen blong God olsem ol sotleg, “oli stap spid i kam olsem ol klaod we win i stap blu long olgeta i go, . . . oli stap flae i kambak long haos blong olgeta.” Yumi save singaot ol niuwan blong kam long miting blong yumi mo soem long olgeta se oli welkam. Olsem ya, bambae yumi wok gud wetem Jeova we hem i stap mekem wok blong hivimap ol man.—Aes. 60:22.