“Yumi Go Long Haos Blong Jeova”

¹ Deved i wantem tumas blong go long invitesen ya: “Yumi go long haos blong Jeova.” (Ol Sam 122:1) “Haos” blong Jeova, we tempel i pija blong hem, i ples blong ol man we oli wantem wosip long tru God oli stap kam hivap long hem. Hem i wan tabu ples we i gat pis mo seftaem long hem. Tede, Kristin kongregesen ya long olgeta ples long wol i olsem “haos” blong God, “hem i olsem bigfala pos blong mekem trutok i stap strong, mo i sapotem trutok.” (1 Tim. 3:15 NW) Olgeta samting we i blong mekem man i kasem kasem sef, oli kam tru long rod ya. From risen ya, “ol nesen oli mas kam wanples long hem” sipos oli wantem haremgud long long ol blesing we we bambae oli kamtru aninit long rul blong Kingdom blong God.—⁠Aes. 2:2.

² Insaed long “haos” ya i gat moa long 69,000 kongregesen we oli stap long 229 kantri. Ol doa blong ol Haos Kingdom long olgeta ples long wol oli open, wetem moa long fo milian man we oli wok strong blong askem se: “Yu kam! . . . Yufala we i wantem, yufala i kam tekem wora ya blong laef, we i olsem presen blong yufala.” (Rev. 22:17) Plante oli harem mesej ya mo oli ansa long hem wetem fasin tangkyu. Ol narafala oli harem be oli no kam yet long haos blong Jeova blong joen wetem Kristin kongregesen. Olgeta ya oli nidim ol samting “long saed blong speret”, we oli save haremgud long hem tru long ol samting we oli save faenem nomo insaed long kongregesen. (Mat. 5:3, NW) Yumi stap laef long wan taem we laef i had tumas, mo en blong fasin ya blong naoia i stap kam kwiktaem nomo. Tingting blong no mekem wan samting naoia i save mekem se oli let tumas nao trabol i save kasem olgeta. Hem i impoten se ol man oli “kam stap kolosap long God” mo stap kolosap long ogenaesesen blong hem. (Jem. 4:8) ?Yumi save halpem olgeta olsem wanem?

³ Pulum Intres i Go Long Ogenaesesen: Taem yumi storeyan fastaem wetem ol man we oli intres, yumi mas pulum tingting blong olgeta i go long ogenaesesen. I tru se yumi save weples blong faenem sam vas blong Baebol mo eksplenem sam stampa tijing, be ol save ya oli no blong yumi. Evri samting we yumi lanem oli kam long ogenaesesen, tru long grup blong slef ya we i stap givim ‘kakae long stret taem blong hem’ (Mat. 24:45-47) Long stat, ol nyuwan oli mas luksave se klin wosip i go moa i no yumi nomo no lokol kongregesen; i gat wan ogenaesesen, tiokratik, sosaeti we i stap long olgeta ples long wol we i stap wok aninit long Jeova.

⁴ Rod we yumi stap kasem i kamaot long Jeova, we i promes blong lidim mo tijim yumi. (Ol Sam 32:8; Aes. 54:13) Tijing ya i go long olgeta ples tru long ol buk blong yumi. Sipos yumi halpem ol man we oli intres blong oli tinghae long ol buk ya, blong oli luksave olgeta olsem stampa blong gudfala tijing we i save sevem man, bambae oli glad moa blong ridim mo mekem ol save blong hem i wok long laef blong olgeta bitim we oli sakemaot kwiktaem. Oltaem yumi mas soemaot mo yusum ol buk ya long wan fasin we i mekem man i gat respek long olgeta. Tijim ol nyuwan blong luksave ogenaesesen mo blong oli dipen long ol samting we hem i stap givim.

⁵ Talem long ol man we oli intres se i gat wan stret ples long eria blong yufala we i ples blong tijim ol man oltaem. Givim adres blong Haos Kingdom mo ol taem blong ol miting long olgeta. Eksplenem olsem wanem ol miting blong yumi oli defren long ol miting blong skul we maet oli stap go long olgeta bifo. Evriwan i welkam blong kam; i no gat kleksin no fasin blong askem wanwan man blong givim mane. Ol elda oli stap mekem ol miting, be evriwan oli gat jans blong givim ol ansa mo joen long sam haf blong miting. Ol famle oli welkam blong kam; ol pikinini tu oli save joen long storeyan blong yumi long Baebol. Ol elda blong mifala oli no werem sam spesel klos. Oli flasemgud haos Kingdom mo i no gat ol kandel, ol aedol, no pija. Olgeta we oli stap kam oli stap laef long ples raonabaot long ples ya.

⁶ Gohed Blong Pulum Intres Sloslo Long Stadi Baebol: Stampa tingting blong wan Baebol stadi i blong tijim trutok blong tok blong God. Stadi i mas mekem studen i gat fasin tangkyu long ogenaesesen blong Jeova mo mekem hem i luksave se i impoten blong hem i kam haf blong ogenaesesen ya. Bigfala wok we Jisas mo ol disaepol blong hem oli bin mekem long faswan handred yia i blong pulum ol man we hat blong olgeta i stret mo joenem olgeta blong wok aninit long wan hed kampani nomo. Long ol ples we i gat plante man oli intres, oli stanemap ol kongregesen blong givim trening mo tijing oltaem long olgeta. Olgeta we oli stap joen, oli kam strong long saed blong speret, hemia blong halpem olgeta blong stanapstrong long taem blong trabol. (Hib. 10:24-25; 1 Pita 5:8-10) Long taem blong yumi hem i plan blong Jeova blong mekem “olgeta samting we hem i mekem bambae oli kam joen wan ples.” (Efes. 1:9, 10) Frut blong hem, hemia we naoia yumi gat wan “kampani blong ol brata” long olgeta ples long wol.—⁠1 Pita 2:17, NW.

⁷ Baebol stadi evri wik i mas tokbaot ol tijing we bambae i halpem studen blong luksave ogenaesesen mo yusumgud ol samting we oli kasem blong sevem olgeta. Tekem sam menet evri wik blong tokbaot no soem wan samting long saed blong ogenaesesen mo olsem wanem hem i wok. Yu save faenem sam poen blong tokbaot long Wajtaoa blong Septemba 1, 1984, pej 24-28 (Novemba 1, 1984 long Engglis no Maj 1, 1985). Buklet ya Jehovah’s Witnesses in the Twentieth Century mo Ol Wetnes Blong Jeova Oli Joengud Blong Mekem Wok Blong God Long Olgeta Ples Long Wol oli tokbaot sam impoten samting long saed blong ogenaesesen mo olsem wanem ol samting ya oli save mekem yumi haremgud from. Jusum sam ripot mo ekspiryens long yia buk we oli soem sam frut blong wok long sam kantri ol ples we oli defren long hemia blong yumi. Yu save yusum ol narafala buk tu. Taem taem i pas, sloslo yu save eksplenem ol samting olsem from wanem yumi stap go long ol haos wanwan, risen blong go long ol miting blong yumi, yumi kasem mane olsem wanem blong halpem wok blong yumi, mo eksplenem wok blong yumi we i stap long olgeta ples long wol.

⁸ Taem ol nyuwan oli save ol narafala wetnes samting ya i save halpem olgeta blong gat save long olgeta long kongregesen. Long saed ya, yu save askem ol narafala pablisa blong go wetem yu long stadi sam samtaem. Sipos yu tekem wan long kongregesen we hem i blong sem ples no sem intres olsem studen ya samting ya i save givim sam samting moa long save blong studen blong yu. Maet wan elda i save go wetem yu jes blong studen kasem save long hem. Blesing i save kamaot sipos yu mekem plan blong seket elda no waef blong hem i visitim stadi ya. Sipos i gat sam wetnes we oli stap laef kolosap, fasin blong olgeta blong frengud wetem Baebol studen maet i save leftemap tingting blong hem blong kam long ol miting blong kongregesen.

⁹ Leftemap Tingting Blong Ol Nyu Wan Blong Kam Long Ol Miting: Ol nyuwan oli mas luksave from wanem i impoten blong kam long ol miting. Traem blong wekemap intres blong olgeta. Soem ol haf we bambae yumi mekem long Wajtaoa stadi. Talem ol nem blong ol pablik tok we bambae oli kamaot. Talem ol haf we bambae oli mekem long tiokratik skul mo buk stadi blong kongregesen. Talemaot prapa filing we yu gat long ol samting we yu lanem long ol miting ya mo from wanem yu harem save se i nidim blong go long olgeta. Sipos yu naf, yu save halpem hem long saed long transpot. Maet yu save ring long hem bifo long miting, samting i save mekem hem i harem se i mas kam.

¹⁰ Taem wan Baebol studen i kam long miting, mekem hem i haremgud blong stap. Soem hem long ol narafala, ol elda tu. Sipos hem i kam long pablik tok soem hem long brata we bambae i mekem tok. Soem ol samting raon long haos kingdom long hem. Eksplenem risen from wanem i gat ples blong salem ol magasin mo buk, ol bokis blong givim presen mane, laebri, mo vas blong yia. Mekem hem i save se i no wan ples blong mekem wosip nomo be i wan stampa ples tu we oli stap rere wok blong prij long hem.

¹¹ Eksplenem olsem wanem oli mekem miting blong yumi. Soem ol buk we yumi stap yusum. Soemaot se Baebol i stampa buk we yumi yusum. Evriwan i save joen, ol pikinini tu. Eksplenem se ol myusek mo toktok we oli raetem i stap long song buk blong yumi, ol Wetnes blong Jeova nomo oli wokem blong yumi save yusum long wosip blong yumi. Pulum tingting blong hem long ol defren kaen man we oli stap kam long ol miting ya. Tokbaot fasin fren mo fasin blong mekem welkam long ol narafala we ol wetnes oli gat. Kaen fasin olsem we yumi mekem blong soem intres long hem i save kam wan long stampa samting we i save pulum studen ya blong kam bageken.

¹² From Wanem Samfala Oli No Gohed Gud: Samtaem nating se yu wok strong, samfala oli no wantem kam kolosap long ogenaesesen. Yu no mas lego kwiktaem. Traem putum yu wan long ples blong olgeta. Kasem naoia, oli no rili harem se i gat nid blong go long miting blong skul maet taem i gat wan spesel samting nomo. Maet ol memba blong famle no ol fren oli stap talem sam tok blong blokem olgeta. Maet ol man we oli stap kolosap long olgeta oli talem sam tok blong daonem olgeta we i mekem se oli fraet from. Mo, tu, maet oli stap joen long ol defren samting blong laef mo pleplei we oli pulum olgeta. Ating oli luk ol samting ya olsem sam bigfala samting we oli no naf blong winim; i nidim blong yu halpem olgeta blong luk ol samting long stret fasin mo jusum “ol samting we oli impoten moa.”—⁠Fil. 1:10 NW.

¹³ Halpem olgeta wetem sam vas blong Baebol blong oli stanap strong. Soemaot se evriwan long yumi i nidim tumas blong oli leftemap tingting blong yumi mo ol tok blong leftemap yumi long saed long speret we yumi stap kasem taem yumi stap joen tugeta. (Rom 1:11, 12) Jisas i mekem i klia se fasin blong famle i agensem yumi i no wan gudfala risen blong yumi no moa gohed. (Mat. 10:34-39) Pol i pulum yumi blong no sem blong soemaot yumi long pablik se yumi wan disaepol blong Jisas. (2 Tim. 1:8, 12-14) Yumi wanwan i mas bos long ol samting we yumi nomo i wantem mo ol samting blong pulum man; sipos no, bambae oli kam olsem wan trap long yumi. (Luk 21:34-36) Olgeta we oli wantem kasem blesing blong Jeova, oli mas givim ful laef blong olgeta, oli neva mas gat wan hat we i hafhaf. (Kol. 3:23, 24) Fasin blong tijimgud olgeta blong oli luksave ol rul ya blong Baebol i save openem rod long olgeta blong oli gohed moa long saed long speret.

¹⁴ Ol Doa Oli Open: Haos blong tru wosip blong Jeova i stap antap long olgeta narafala haos. Invitesen i goaot long 229 kantri raon long wol se: “Yufala i kam, . . . yumi go antap long bigfala hil blong Jeova, . . . Mo hem bambae i tijim yumi long fasin blong hem, mo bambae yumi wokbaot long ol rod blong hem.” (Aes. 2:3) Sipos ol nyuwan oli lesin, samting ya i save sevem olgeta. Pulum olgeta oli kam long ogenaesesen blong Jeova i wan namba wan rod we yumi save mekem blong halpem olgeta.