Halpem Ol Narafala Blong Kam Long Miting
1 “Ol fren long eria ya . . . we oli wantem kam long ol miting, olgeta evriwan oli welkam nomo blong kam.” Stat long taem we mesej ya i kamaot long Zion’s Watch Tower, Novemba 1880 ol Witnes blong Jeova oli glad tumas blong askem ol man oli kam blong joen wetem olgeta blong stadi Baebol. (Rev. 22:17) Hemia i wan impoten haf blong trufala wosip.
2 I Impoten Tumas Blong Kam Long Miting: Yumi kasem ol blesing taem yumi joen wetem kongregesen. Yumi kam klosap moa long nambawan God blong yumi, Jeova. Insaed long kongregesen, yumi joen wanples blong “Jeova i tijim” yumi. (Aes. 54:13, NW ) Ogenaesesen blong hem i stap gohed blong givim wan program blong tijim yumi long saed blong Baebol. Program ya bambae i halpem yumi blong kam klosap moa long God mo blong halpem yumi blong mekem “olgeta advaes blong God” oli wok long laef blong yumi. (Wok 20:27, NW; Luk 12:42) Ol miting oli trenem yumi blong gat gudhan blong tijim Tok blong God. Ol advaes long Baebol oli halpem yumi blong frengud wetem ol narafala mo wetem Jeova tu. Taem yumi joen wetem olgeta we oli lavem God, bilif blong yumi i kam strong moa.—Rom. 1:11, 12.
3 Askem Olgeta Stret: Stat long faswan stadi, askem evri Baebol studen blong kam long ol miting. Givim wan pepa we i soem taem blong ol miting. Blong pulum intres blong olgeta, tokbaot wan poen we i bin kamaot long laswan miting we i leftemap tingting blong yu, mo tokbaot samting we bambae i kamaot long nekiswan miting. Eksplenem long hem se Haos Kingdom i olsem wanem, mo meksua se hem i save faenem Haos Kingdom.
4 Sipos wan studen i no kam long miting long faswan taem we yu askem hem, gohed blong askem hem blong kam. Tekem smol taem evri wik blong soem long hem olsem wanem ogenaesesen blong yumi i wok. Yusum buklet ya, Doing God’s Will mo video kaset ya Jehovah’s Witnesses—The Organization Behind the Name, blong halpem hem blong kasem save moa long yumi mo ol miting. Tekem ol narafala pablisa i go long stadi blong hem blong mekem hem i savegud olgeta. Long prea, talem tangkiu long Jeova from ogenaesesen mo tokbaot se i impoten tumas we studen ya i joen wetem ogenaesesen.
5 Yu no mas fraet blong halpem ol niuwan blong joen wetem yumi. Taem fasin tangkiu we oli gat long Jeova i gru, bambae oli wantem folem ol samting we oli lanem mo blong joen long ogenaesesen blong God.—1 Kor. 14:25.