Yumi Halpem Ol Studen Blong Oli Save Moa Ogenaesesen Blong Jeova
1 Ol studen oli gat nid blong save long “kampani [ya] nomo” we Jisas i tokbaot long Jon 10:16. Oli mas luksave se blong stap sefgud, oli mas joen long ogenaesesen blong Jeova. (Rev. 7:9, 10, 15) From samting ya, sipos yumi mekem stadi long Baebol wetem olgeta, kwiktaem nomo yumi mas pulum tingting blong olgeta i go long ogenaesesen.
2 Bambae yumi givhan long olgeta blong oli save gud ol defren haf blong ogenaesesen blong Jeova long wol. Sem mak long faswan handred yia, ol man blong Jeova oli hivap tugeta long ol kongregesen. Sam man oli mekem wok blong elda, i gat ol man blong givhan mo ol pablisa. Long taem blong yumi tede, olgeta we oli joen long ol kongregesen oli glad nomo blong go long ol 5 miting we kongregesen blong olgeta i holem evri wik. Evri yia, Sosaete i mekem ol asembli, ale yumi gat jans blong kasem ol gudfala advaes mo yumi hivap wanples wetem ol Wetnes blong narafala eria. Mo tu, i gat ol paenia, ol misinari, ol elda we i goraon mo wan Hed-kampani we i lukaot long wok blong talemaot gud nyus raonabaot long wol. ?Be bambae yumi mekem wanem blong ol studen oli save gud ol defren haf blong ogenaesesen blong Jeova? ?Olsem wanem blong soemaot long olgeta se ogenaesesen blong Jeova i tekem stampa blong hem long Baebol?
YUSUM BUKLET OL WETNES BLONG JEOVA—OLI JOENGUD
3 Buklet Ol Wetnes Blong Jeova—Oli Joengud i storeyan gud long ogenaesesen blong Jeova. Wetem buklet ya, bambae yu save givhan sloslou long ol studen blong oli kasem save long ogenaesesen mo olsem wanem hem i stap wok. Wan gudfala rod blong stat i olsem: Yu save storebaot Haos-Kingdom. Sipos yu mekem olsem, man ya we yu stadi wetem bambae i gat tingting blong kam long ol miting blong kongregesen. Bifo we yu singaot hem i kam long pablik tok, fastaem yu save lukluk wetem hem ol haf long pej 14 mo 15. Soemaot olgeta pija long hem. Talem gud long hem se Haos-Kingdom i stap wea mo hem i luk olsem wanem. Maet yu save soem hem wan foto blong Haos-Kingdom tu.
4 Taem yu harem we elda we i goraon bambae i visitim kongregesen blong yu, yu save storeyan tugeta wetem studen blong yu long ol haf long ol pej 20 mo 21 blong buklet blong yumi. Yusum ol kwestin we i stap daon long pej 21. Sipos yu mekem olsem, bambae studen ya i no fogetem ol stampa poen. Yusum haf 1 pej 20 blong soemaot long hem wanem samting i hapen long faswan handred yia. Ale, taem bambae studen blong yu i kam long miting long Haos-Kingdom, bambae hem i save from wanem rod blong mekem miting ya i olsem.
5 Long sem fasin, bifo long seket asembli no distrik asembli, no long wan spesel dei blong asembli, i gud blong lukluk ol poen we i stap long pej 19. Pulum tingting blong hem bakegen long saed blong ol wok blong ol bigfala distrik asembli mo mekem i klia long hem se ol asembli ya oli stap gohed long olgeta ples long wol olsem we ol pija blong pej 18 i soemaot. Taem yu soemaot pija long saed blong ol nyufala buk we i kamaot, yu save openem rod blong biaen bambae yutufala i toktok gud long ol poen we i stap long ol pej 24 mo 25. Blong soemaot se wok blong paenia i olsem wanem, tekem ol pej 22 mo 23.
YU TINGBAOT OL NID BLONG MAN
6 Maet yu luksave finis se i no nid blong tekem stat blong buklet Ol Wetnes Blong Jeova—Oli Joengud taem yu store wetem man long saed blong ogenaesesen. Taswe, i gud blong skelem gud laef blong wan man mo ol samting we man ya i mas mekem yet, nao biaen yu yu save tokbaot ol poen blong buklet we i stret gud blong halpem hem. Ale, hem i save gat tangkyu long ogenaesesen blong Jeova mo hem i save joen long kongregesen we i stap long ples blong hem.
7 Sipos yu tokbaot poen ya long wan fasin we hem i luksave se yu yu bilif long ol tok we yu yu talem, bambae hem i tingting oltaem long ol samting we yu talem long hem. Yu mas strong long tingting blong yu. (Wok 18:25) From we ‘yu yu tijim ol narafala,’ yu mas soemaot wan gudfala rod long ol studen: Yu mas gat fasin blong talem tangkyu long ogenaesesen blong Jeova. (Rom 2:21) Sipos yu yu mekem olsem, bambae yu givhan long ol narafala blong oli joen long kampani ya nomo we Jisas i lidim blong go kasem laef we i no save finis.