Lidim Ol Studen Oli Go Long Ogenaesesen We i Joen Wetem Nem Blong Yumi
1 “Hemia wan mesej we i kamaot long bitim 200 lanwis. Hemia wan mesej we ol man oli stap harem long bitim 210 kantri. Hemia wan mesej we i stap go long wanwan man long eni ples we oli stap long hem. Mesej ya i haf blong wan wok blong prij we i bigwan moa i bitim ol wok we i bin kamaot long wol bifo, wan mesej we i stap mekem plante milyan man oli joengud long olgeta ples blong wol. !Bitim wan handred yia nao, ol Wetnes blong Jeova oli folem wan gudfala plan blong mekem wok ya!”
2 Hemia nao fastok blong video kaset ya Jehovah’s Witnesses—The Organization Behind the Name. Hem i gohed blong ansarem ol kwestin olsem: ?Ol Wetnes blong Jeova oli olsem wanem? ?Oli folem wanem plan long wok blong olgeta? ?Hu i lidim wok ya? ?Oli kasem mane wea? Kaset ya i makem long tingting blong ol man we oli luk hem se, “ol Wetnes blong Jeova long olgeta ples blong wol oli kasem trening olsem wan ogenaesesen, blong oli kam naf blong givhan long ol man raonabaot long olgeta blong kasem strong bilif long Baebol.” Mo hem i pulum olgeta blong lukluk wetem prapa ae blong olgeta, ogenaesesen ya we i joen wetem nem blong yumi. Wan woman we hem i stadi, i lukluk video kaset ya, nao wora i ron long ae blong hem from we hem i glad tumas mo i gat bigfala tangkyu from. Hem i talem se: “?Weswe ol man oli no save luk se hemia nao ogenaesesen we trufala God, Jeova, i stap yusum?”—Skelem wetem 1 Korin 14:24, 25.
3 Wan narafala woman i stadi wanwan taem long Baebol long ol yia we oli pas finis, be hem i no save agri se Triniti i wan gyaman tijing. Nao hem wetem man blong hem tufala i lukluk video kaset ya. Tufala i laekem tumas ol save insaed long hem, mo tufala i lukluk tu taem long semfala naet. Long nekiswan stadi, woman ya i talemaot se hem i wantem kam wan Wetnes. Hem i talem se hem i bin tingting tumas long saed blong Triniti, be hem i no bin luklukgud long ogenaesesen blong yumi mo ol man insaed long hem. Video kaset ya i givhan long hem blong luksave se hem i faenem trufala ogenaesesen blong God. Wantaem nomo, hem i wantem joen long wok blong prij. Afta we oli eksplenem long hem ol samting we hem i mas mekem blong kam wan pablisa we i no baptaes yet, hem i talem se: “Ale, yumi stat naoia nomo.” Hem i livim jyos blong hem, hem i stat long wok blong prij, mo i kam naf blong ansagud long ol man long saed blong Triniti.
4 I klia se ol Baebol studen oli gohed moa gud mo kam bigwan long saed blong speret kwiktaem moa, taem oli luksave ogenaesesen blong Jeova mo joen wetem hem. I impoten blong tingbaot se, long Pentekos, afta we 3,000 oli tekem baptaes, “oli gohed wetem fulhat blong olgeta blong folem ol tijing blong ol aposol mo blong joengud tugeta.” (Wok 2:42, NW, ftn.) Yumi mas halpem ol studen blong Baebol tede blong mekem samting ya tu. ?Olsem wanem yumi save mekem olsem?
5 Karem Responsabiliti: Evriwan we oli stap mekem ol disaepol, oli mas luksave se oli gat wan responsabiliti blong lidim ol studen blong Baebol oli go long ogenaesesen blong God. (1 Tim. 4:16) Evri wik we yumi mekem stadi wetem studen, yumi mas gat tingting ya se hemia wan moa step we hem i tekem blong kam kolosap moa long taem ya we bambae hem i givim laef blong hem i go long Jeova mo tekem baptaes. Wan long ol kwestin we hem i mas ansarem taem hem i tekem baptaes, hemia: “?Yu yu kasem save se taem yu givim laef blong yu i go long Jeova mo tekem baptaes, samting ya i makemaot yu olsem wan Wetnes blong Jeova we i stap joen wetem ogenaesesen blong God we tabu speret i stap lidim?” Taswe, i impoten we hem i luksave se, sipos hem i wantem mekem wok blong God, hem i mas joen long ol wok we trufala Kristin kongregesen i stap mekem.—Mat. 24:45-47; Jon 6:68; 2 Kor. 5:20.
6 Gohed blong tijim studen long saed blong kongregesen long ples blong yufala, mo ogenaesesen long fulwol we i joen wetem nem ya, ol Wetnes blong Jeova. Statem samting ya long faswan Baebol stadi we yu mekem wetem hem, mo gohed blong mekem long evri stadi. Long stat olgeta, singaot studen i kam long ol miting, mo gohed blong singaot hem.—Rev. 22:17.
7 Yusum Ol Tul We Yumi Kasem: Tufala nambawan buk blong yusum blong mekem ol Baebol stadi, hemia ?Wanem Samting We God i Wantem Yumi Blong Mekem? mo Save Blong Lidim Yu Long Laef We i No Save Finis. Tufala tugeta oli makemgud se i impoten blong joen wetem kongregesen. Long en blong stadi 5, buklet ya Samting We God i Wantem, i talem se: “Yu mas gohed blong lanem moa long saed blong Jeova, mo obei long ol samting we hem i wantem yu blong mekem. Blong halpem yu long rod ya, kam long ol miting blong ol Wetnes blong Jeova long Haos Kingdom we i stap kolosap long yu.” Buk ya Save tu i askem plante taem long ol man, blong oli kam long ol miting. Long japta 5, haf 22 i singaot ol man olsemia: “Ol Wetnes blong Jeova . . . oli singaot yu long kaen fasin, blong joen wetem olgeta blong wosip long God ‘wetem speret mo trutok.’ (Jon 4:24)” Long japta 12, haf 16 i talem se: “Taem yu gohed long stadi ya mo yu go oltaem long ol miting blong ol Wetnes blong Jeova, bambae bilif blong yu i kam strong moa yet.” Long japta 16, haf 20 i talem se: “Ale, go long ol miting blong ol Wetnes blong Jeova, olsem we i wan kastom blong yu.” Hem i gohed se: “Fasin ya bambae i halpem yu blong kasem ol save blong God mo mekem i wok long laef blong yu, mo bambae i givim glad long yu. Taem yu joen long famle blong ol Kristin brata long ful wol, bambae samting ya i givhan long yu blong stap kolosap long Jeova oltaem.” Japta 17 i tokbaot fulwan olsem wanem blong faenem trufala sefples long medel blong ol man blong God. Taem yumi mekem stadi wetem narafala, hem i responsabiliti blong yumi blong makemgud ol haf ya long tingting blong hem.
8 Buklet ya Ol Wetnes Blong Jeova—Oli Joengud Blong Mekem Wok Blong God Long Olgeta Ples Blong Wol, hem i wan nambawan tul blong halpem ol man blong savegud ogenaesesen blong Jeova, wan nomo we hem i stap yusum long wol ya blong mekem wok blong hem. Buklet ya i talem plante samting long saed blong wok blong prij, ol miting, mo ogenaesesen, mo i save pulum man we i ridim blong joen wetem yumi blong mekem wosip long God. Taem yu statem wan Baebol stadi, i gud blong givim buklet ya long studen, blong hem i save ridim hem wan. I no gat nid blong stadi buklet ya wetem hem, olsem yumi bin mekem bifo.
9 Ol video kaset we Sosaeti i stap mekem, oli nambawan tul blong lidim ol studen oli go long ogenaesesen we i joen wetem nem blong yumi. I gud sipos oli save lukluk: (1) The New World Society in Action, hemia sinema blong 1954 we oli mekem bakegen, mo we i soem olsem wanem ogenaesesen blong Jeova i stap rongud, i folem wan gudfala plan, mo i gat lav insaed long hem; (2) United by Divine Teaching, we i tokbaot fasin joengud mo pis long ol intenasnal asembli blong yumi long Is Yurop, Saot Amerika, Afrika, mo Esia; (3) To the Ends of the Earth, we i makem 50 yia blong Wajtaoa Baebol Skul Blong Gilead, mo i soem olsem wanem ol misinari oli bin givhan bigwan long wok blong prij long olgeta ples blong wol; (4) Jehovah’s Witnesses Stand Firm Against Nazi Assault, we i talem nambawan store blong ol Wetnes we oli no fraet mo we oli winim ol strong mo raf fasin we Hitler i mekem agens long olgeta; mo tu, yumi no fogetem, (5) Jehovah’s Witnesses—The Organization Behind the Name.
10 Putum Ol Mak Long Saed Blong Miting We Oli Halpem Hem Blong Gohed: Yumi mas eksplenem long studen se hem i nidim we yumi mekem wan Baebol stadi wetem hem long haos, be hem i nidim tu blong joen wetem wan grup blong stadi Baebol, olsem long ol miting blong kongregesen. (Jon 6:45) Nyufala studen i nidim blong gohed blong kasem moa save long saed blong Baebol mo long saed blong ogenaesesen, tufala tugeta. I no gat wan rod we i moagud blong mekem olsem, i bitim we hem i kam long ol miting. (Hib. 10:23-25) Stat naoia blong singaot hem i kam long ol miting blong kongregesen. Samfala we oli jes stat blong intres long trutok, oli kam long miting bifo we oli mekem wan Baebol stadi evri wik. Yumi tu, yumi mas kam long ol miting oltaem, blong soem wan gudfala eksampel long saed ya.—Luk 6:40; Fil. 3:17.
11 Talem plante samting lelebet long saed blong ol miting mo plan blong olgeta. Olsem nao, bambae studen i haremgud taem hem i kam long faswan miting blong hem. Samfala oli fraet long fastaem we oli go long wan nyufala ples, taswe i gud blong wokbaot wetem studen ya, long fastaem we hem i kam long Haos Kingdom. Bambae hem i haremgud moa sipos yu yu stap kolosap long hem, taem hem i mitim ol memba blong kongregesen. Samting we i impoten tumas se, lukaotgud long studen blong yu, mekem hem i harem se hem i welkam mo i no fraet.—Mat. 7:12; Fil. 2:1-4.
12 Faswan jans we yu yu gat, traem pulum studen blong kam long wan spesel dei asembli, seket asembli, no distrik asembli. Maet yu save go karem hem i kam wetem ol narafala we yu go karem olgeta.
13 Halpem Hem Blong Gat Tangkyu Long Hat Blong Hem: Buk ya, Ol Rul Blong Mekem Minista Wok Blong Yumi, i talem long pej 87, se: “Sipos yu wan yu tinghae long ogenaesesen blong Jeova, mo samting ya i klia long ol tok blong yu, bambae i isi moa long ol man we oli intres long trutok blong oli mekem sem mak. Nao samting ya bambae i halpem olgeta blong kasem moa save long Jeova.” Tokbaot kongregesen long fasin we i leftemap tingting, neva long fasin we i daonem hem. (Sam 84:10; 133:1, 3b) Long ol prea blong yu long Baebol stadi, tokbaot kongregesen mo nid blong studen blong joen oltaem wetem kongregesen.—Efes. 1:15-17.
14 Tru ya, yumi wantem se ol nyuwan oli wokem fasin tangkyu long hat blong olgeta, from nambawan fasin joengud mo sefples long saed blong speret we oli save faenem long medel blong ol man blong God. (1 Tim. 3:15; 1 Pita 2:17; 5:9) Yumi ol Wetnes blong Jeova, yumi mas mekem evri samting we yumi naf blong mekem, blong lidim ol studen blong Tok blong God oli go long ogenaesesen we i joen wetem nem blong yumi.
[Tok]
Ol studen oli gohed kwik moa long saed blong speret taem oli lukluk ogenaesesen wetem prapa ae blong olgeta
[Tok]
Yu no mas tektaem tumas blong singaot ol studen oli kam long ol miting