?Yu Yu Wok Wetem Wan Stamba Tingting?
1 Jeova i wan God we i gat ol stamba tingting blong hem. (Aes. 55:10, 11) Baebol i leftemap tingting blong yumi blong folem eksampel blong hem. (Efes. 5:1) Yumi mas soemaot fasin ya long wok blong prij blong yumi. Taswe, kwestin ya i stret nomo se: “?Yu yu wok wetem wan stamba tingting?”
2 I gat wan stamba tingting we i pusum yumi blong mekem wok blong prij long ol haos wanwan, tekem jans blong toktok wetem ol man we yumi mitim, mo givimaot ol buk. Be, yumi mas rimemba se wok blong prij nomo, i no naf, yumi mas mekem disaepol tu. (Mat. 28:19, 20) Afta we yumi planem ol sid blong trutok blong Kingdom, yumi mas gobak bakegen blong putum wota long ol sid ya mo lukaot long olgeta, mo i dipen long Jeova blong mekem i karem frut. (1 Kor. 3:6) Yumi mas tinghevi long wok blong mekem ol visit mo statem Baebol stadi.
3 Mekem Moa Long Minista Wok Blong Yu: Yu harem gud tumas, taem yu luklukbak long ol samting we yu bin mekem long wok blong prij, mo talem se: “Mi kasem mak we mi bin plan blong kasem.” Long 2 Timoti 4:5, aposol Pol i talem se: “Yu mas finisim olgeta wok ya we God i givim long yu blong mekem.” Samting ya i minim se yu mas traehad blong visitim ol man we oli soem intres. Long program blong wok blong prij we yu gat evri wik, mekem plan blong spenem sam taem blong mekem ol visit. Putum mak ya blong traem statem sam Baebol stadi wetem olgeta we oli laekem stret fasin. Hemia i mas stap olsem stamba tingting blong yu taem yu mekem wok blong prij.
4 Askem long sam pablisa wanem filing blong olgeta taem oli luk Baebol studen blong olgeta i tekem baptaes long wan asembli. Ating oli glad tumas, mo maet glad blong olgeta i bitim glad blong olgeta ya we oli tekem baptaes. !Oli mekem wan nambawan stamba tingting i kamtru! Wan brata we i givhan long plante narafala blong oli kam disaepol, i talem se: “Taem i gat moa disaepol i minim se i gat moa man blong presem Jeova. Hem i minim tu se, ol man ya we oli lesin long trutok bambae oli save kasem laef. Mi laekem tumas blong tijim trutok long ol narafala—!hem i nambawan tumas! . . . Plante long olgeta we oli stat blong laekem Jeova, oli kam ol gudfala fren blong mi.”
5 !Tingbaot se yu stap halpem wan man blong kam wan man we i givim laef blong hem long Jeova! !Hemia i save karem bigfala glad long yumi! Sipos yumi save karem sam gudfala frut olsem, hemia from we yumi bin mekem minista wok blong yumi wetem wan stamba tingting.—Kol. 4:17.