?Bambae Yu Talem Wanem Long Wan Muslim?
1 ?Yu yu prij finis long wan man Muslim? Sipos i olsem, yu save se ol man Muslim oli bilif strong long God. Be, oli gat smol save nomo long saed blong paradaes we i mas kamtru long wol, we ol profet blong Jeova oli bin talemaot. Ating yu wantem tokbaot hop ya long olgeta. (1 Tim. 2:3, 4) Save we i stap long tok ya bambae i givhan long yu blong yu rere blong givim gudfala witnes long olgeta.
2 Ol man Muslim oli bilif long Allah, no God, mo oli bilif se Muḥammad i profet blong olgeta. Tabu buk blong olgeta hemia Koran, mo yumi kolem skul blong olgeta Islam, we i minim “fasin obei.” Koran i talem se fasin giaman mo wosip long ol giaman God i nogud. I gat wan God nomo, mo hem i no wan haf blong Triniti. Mo tu buk ya i talem se i gat wan sol i no save ded samtaem, wan helfaea, mo wan paradaes we i stap long heven. Ol man Muslim oli agri se Baebol i Tok blong God, be oli ting we Baebol i bin jenis. Long tingting blong olgeta, buk ya Koran we i stap long faswan lanwis we oli raetem i no jenis nating kam kasem naioa.
3 Fasin Frengud, Ol Tok Blong Leftemap, Mo Fasin Luksave: Taem yu statem wan storeyan wetem wan man Muslim, yu mas yusum fasin frengud mo ol tok blong leftemap hem. (Prov. 25:15) Yu no mas fogetem se bilif blong ol Muslim i strong mo plante long olgeta oli lanem skul blong olgeta olsem wan kastom blong folem. Taswe, blong olgeta ya, i no isi blong oli tingting dip long ol tijing blong skul mo traem kasem save wanem stamba tingting blong God. (Rom. 12:2) Blong givhan long ol Muslim, i impoten blong soem longfala tingting mo fasin luksave.—1 Kor. 9:19-23.
4 I nogud yu talem ol tok we i save mekem se ol Muslim oli meksemap yumi wetem ol skul blong Krisendom. I moa gud yu soemaot klia se yu no wan man blong Protestan no Katolik Skul, yu yu defren long olgeta ya. Tokbaot Baebol olsem Buk blong God. From we ol Muslim oli no laekem tok ya “Pikinini blong God,” i moa gud blong no yusum tok ya no tokbaot tijing ya kam kasem we man ya i gru inaf long saed blong spirit. Be, yu save tokbaot Jisas olsem wan profet no wan man we i karem ol mesej blong God. Yu no mas agyu wetem ol Muslim. Sipos yu luksave se hem i stap kam kros lelebet, i stret taem blong livim hem wetem kaen fasin.
5 I moa gud blong toktok wetem wan man nomo bitim wan grup blong man. Maet i moa waes, we ol sista oli givim witnes long ol woman, mo ol brata long ol man. I tru se i gat sam taem we yumi no save mekem olsem, be long taem ya i nidim fasin luksave. Mo tu, plante Muslim oli harem nogud long ol klos we oli bitim mak we ol woman oli holem. Ol sista oli mas tingbaot gud poen ya.—1 Kor. 10:31-33.
6 Ol Tok Blong Talem: Yu save tokbaot olsem wanem God i hae we i hae, mo hem i gat lav. Yu no mas fraet blong talem se yu wan trufala man blong bilif, se God i wan nomo (hem i no wan Triniti), mo se wosip long ol aedol i nogud. Tokbaot rabis fasin long wol blong yumi tede—ol faet, ol trabol we ol man oli kasem, fasin blong no laekem narafala laen, mo fasin blong plante man we oli talem se oli bilif, be oli gat tu fes.
7 Buklet ya The Guidance of God—Our Way to Paradise bambae i givim moa save long yu long ol tok we yu save yusum blong statem wan storeyan wetem ol Muslim. Buklet ya i blong pulum ol Muslim blong oli wantem stadi Baebol.
8 Long fas tok blong yu, maet yu save talem se:
◼ “Mi traehad blong toktok wetem ol Muslim. Mi bin ridim sam buk long saed blong skul mo bilif blong yu. From samting ya, ating mi save talem we ol Muslim oli bilif long wan trufala God nomo mo long ol profet. [Letem man i ansa.] Mi wantem toktok wetem yu long saed blong wan olfala profet tok we i bin talemaot olsem wanem bambae wol i kam wan paradaes. ?Mi save ridim long yu wanem profet ya i raetem? [Ridim Aesea 11:6-9.] Profet tok ya i mekem se mi tingbaot wan tok we i kamaot long Koran we yumi faenem long buklet ya.” Soem pej 9 long buklet ya Guidance of God, mo ridim tok we oli prentem long blak, we i tokbaot taem we ol stret man bambae oli tekem graon ya. Sipos man i soem se hem i intres, yu save gohed wetem haf 7 kasem 9 we i stap long nekis pej. Givim buklet ya, mo mekem plan blong visitim man ya bakegen.
9 Taem yu askem long wan man blong stadi wetem buklet ya Guidance of God, i moa gud blong talem se yu wantem toktok nomo wetem hem, i nogud yu talem se yu wantem stadi Baebol. Taem yu finisim buklet ya, ating we studen i rere blong stadi long buklet ya ?Wanem Samting? no long buk ya Save. Ol narafala buk we oli stret blong ol Muslim, hemia traket ya How to Find the Road to Paradise mo buklet ya The Time for True Submission to God.
10 Wetem save ya long saed blong ol bilif mo ol tingting blong ol man Muslim, yumi save jusumgud ol buk we yumi givim long olgeta. Mo yumi save wanem tok blong talem taem yumi givim witnes long olgeta. Olsemia Jeova i blesem ol traehad blong yumi, blong givhan long ol defren kaen man we oli singaot long nem blong hem blong oli stap sef.—Wok 2:21.