?Yu Gat Fasin Blong Lego Sam Samting We Yu Nomo Yu Wantem?

¹ Jisas Kraes i lego sam samting long laef blong hem blong givhan long ol man long wol. Sipos yumi gat tangkiu from ol samting ya, bambae yumi wantem yusum save blong yumi, paoa, mo gudhan we yumi gat, blong mekem wok we i soem se yumi no tingbaot yumi wan. Baebol i pulum yumi se: “Yufala i mas givim olgeta laef blong yufala i go nomo long [God] olsem wan sakrefaes. Hemia i wan sakrefaes we i laef mo i tabu, mo we God i glad blong tekem.” (Rom 12⁠:⁠1) Wanwan taem i gud blong jekemap yu wan. Samting ya bambae i halpem yu blong luk sipos yu stap soem fasin ya fulwan, olsem we yu naf blong mekem, no nogat.

² Taem Yu Traem Kasem Moa Save Blong Baebol: ?Yu yu makemaot finis wan taem blong ridim mo stadi Baebol evri wik? ?Yu yu stap folemgud program ya? ?Yu yu gat fasin ya blong reremgud olgeta miting blong kongregesen? ?Sipos yu yu wan papa, yu stap mekem Baebol stadi wetem famle blong yu oltaem? Blong mekem ol samting ya, i minim se yu mas katemaot sam aoa we yu stap spenem blong wajem televisin, no long kompiuta, no long narafala samting bakegen. !Be, ol samting ya we yu lego oli olsem nating nomo, taem yu tingbaot se, aoa we yu spenem blong stadi long Tok blong God bambae i lidim yu i go kasem laef we i no save finis!​—⁠Jon 17⁠:⁠3.

³ Taem Yu Stap Trenem Ol Pikinini Blong Yu: Beswan taem we ol yangfala oli save stat blong lanem fasin ya blong lego sam samting we olgeta nomo i wantem, hemia taem we oli pikinini yet. Tijim olgeta se i gat taem blong pleplei, be tu, i mas gat taem blong mekem ol wok blong haos mo ol tiokratik wok. (Efes. 6⁠:⁠4) Givim sam wok long olgeta blong mekem long haos. Putumap wan program we i mekem se hem i save joen oltaem long wok blong prij wetem yu. Soem gudfala eksampel blong mekem tijing blong yu i gat moa paoa.

⁴ Taem Yu Mekem Ol Wok Blong Kongregesen: Wan kongregesen i save karem gudfala frut sipos evriwan insaed long kongregesen ya i rere blong lego sam samting we hem nomo i wantem blong mekem i gud long narafala. (Hib. 13⁠:16) ?Yu save spenem moa taem long wok blong talemaot Kingdom mo mekem disaepol? ?Yu save givhan long olgeta we oli sik no we oli olfala, we maet yu yusum trak blong yu blong karem olgeta i kam long ol miting?

⁵ Bifo we Jisas i givim laef blong hem olsem wan sakrefaes, hem i givim advaes long ol disaepol blong hem se oli mas putum tingting blong olgeta i stap long ol wok blong Kingdom fastaem mo ol narafala samting long laef oli mas stap long seken ples. (Mat. 6:​33) Sipos yumi holemtaet fasin ya blong lego sam samting we yumi nomo i wantem, bambae yumi kasem glad we i bigwan moa taem yumi gohed blong harem gud long wok blong Jeova.