‘Traem Olgeta Blong Luk Sipos Oli Naf’—?Olsem Wanem?
1 Ogenaesesen blong Jeova i stap kam bigwan moa oltaem. From samting, ya i nidim moa brata we oli naf blong wok olsem man blong givhan. Plante brata we oli no man blong givhan yet, we samfala oli no kasem 20 yia yet, oli wantem tumas blong givhan long kongregesen. Taem oli kasem moa wok blong mekem, oli harem gud from we oli gat jans blong givhan mo oli stap mekem wan gudfala samting. Be blong kasem moa wok, narafala i mas ‘traem olgeta fastaem blong luk sipos oli naf.’ (1 Tim. 3:10) ?Olsem wanem blong traem olgeta?
2 Wok Blong Ol Elda: I tru se, fastaem ol elda bambae oli luk sipos brata ya we i wantem kam wan man blong givhan, hem i kasem ol mak we Baebol i givim long 1 Timoti 3:8-13. Be tu, ol elda bambae oli traem brata ya blong luk sipos hem i naf blong tekem wan wok. Maet oli askem hem blong wok long ples blong magasin mo buk, holem maekrofon, lukaot long wok blong fiksimap mo klinim Haos Kingdom, mo sam narafala wok olsem. Ol elda bambae oli makem tingting blong hem long saed blong wok ya mo tu bambae oli luk sipos hem i mekem gud wok ya no nogat. Bambae oli luk sipos oli save trastem hem, sipos hem i stap kam long stret taem, hem i wok had, hem i gat tingting daon, hem i rere blong wok, mo hem i wokgud wetem ol narafala. (Fil. 2:20) ?Hem i soem gudfala eksampel long stael blong klos mo hea blong hem? ?Hem i tinghevi long wok we hem i kasem? Ol elda oli wantem luk se ‘hem i mekem ol gudfala wok, long fasin we tingting blong hem i stap daon, mo we hem i waes.’ (Jem. 3:13) ?Hem i rili wantem mekem moa wok blong givhan long kongregesen? ?Hem i wok strong long wok blong prij, folem oda ya blong Jisas blong ‘mekem disaepol long olgeta man’?—Mat. 28:19; lukluk Wajtaoa blong Septemba 1, 1990, pej 18-28 (Inglis).
3 I tru se Baebol i no givim wan stret yia we i makem se wan man i naf blong kam man blong givhan. Nating se i olsem, i klia se ol brata ya oli kam olsem ‘bigman’ finis. Yumi no save talem se olgeta we oli mekem wok ya oli gat 13 no 14 yia, from we Baebol i tokbaot ol man we oli mekem wok ya se, sam long olgeta, maet oli gat waef mo pikinini finis. (1 Tim. 3:12, 13) Ol man ya, oli no mas man we oli foldaon isi nomo long “krangke fasin blong ol yangfala, we oli wantem tumas ol samting we i no stret.” Be, oli mas mekem ol fasin blong man we i gat hed, we narafala i no gat poen agens long olgeta, mo oli mas gat wan tingting we i klin gud, we i no jajem olgeta long fored blong God mo ol man.—2 Tim. 2:22.
4 Tru ya, i nidim we man i gat gudhan blong mekem wan gudfala wok. Be, samting we i moa impoten, hemia gudfala fasin mo tingting we i pusum man blong mekem wan wok. ?Brata ya i rili gat tingting daon mo i wantem presem God. ?Hem i rili wantem givhan long ol brata sista blong hem? Sipos yes, bambae Jeova i blesem ol traehad we hem i mekem blong gohed moa long saed blong spirit, insaed long kongregesen.