Lesingud Long Ol Tabu Tok Blong God
1 I no evri samting we man i talem we yumi nidim blong lesingud long hem. Be, taem God i toktok, i impoten tumas blong lesin. (Dut. 28:1, 2) Yumi glad tumas we tabu spirit i pusum sam man blong raetemdaon ‘ol tabu tok blong God’ long wan buk blong givhan long yumi. (Rom 3:2) Distrik asembli we i stap kam bambae i givim plante nambawan jans long yumi blong harem ol tok ya we ol brata bambae oli ridimaot mo eksplenem. ?Olsem wanem yu save mekem spesel traehad ya blong lesingud?
2 Kam Eli Evri Moning: !Tingbaot glad we ol man Isrel oli gat taem oli harem se oli mas kam long fored blong Jeova long hil ya Sinae blong lesin long ol Loa blong hem! (Eks. 19:10, 11, 16-19) Sipos yu yu gat semfala glad ya blong kasem ol advaes blong Jeova long distrik asembli, bambae yu mekem plan blong kam eli evri dei. Yumi no save lesin gud long fulwan program sipos yumi kam let mo spolem ol man raonabaot long yumi taem yumi traehad blong faenem jea blong sidaon. Ol doa blong ples blong asembli bambae oli open long 8 klok moning, mo program bambae i stat long haf pas 9 evri dei.
3 Be, sam long olgeta we oli kam eli tu, oli no stap sidaon yet taem program i stat. ?From wanem i olsem? Olgeta ya oli wet se jeaman i talemaot faswan singsing bifo we oli stop blong storian wetem ol fren mo stat wokbaot i go from jea blong olgeta. Yumi mas makem se, sam menet bifo long faswan singsing blong evri haf blong asembli, bambae jeaman i stap sidaon long platfom taem faswan spesel Kingdom song i stap plei. !Hemia wan saen blong soem long yumi se i taem blong sidaon! Ale, taem faswan singsing i stat, bambae yumi rere blong joen long ol sing blong presem Jeova.
4 Lesin Olsem Wan Famle We i Joengud: Taem ol man Isrel oli kam wanples blong lesin long ol tabu tok blong God, i gat ol famle, wetem ol “pikinini” tu, oli stap lesin mo lanem samting. (Dut. 31:12) Long ol asembli blong yumi, yumi no mas ‘letem ol pikinini blong yumi oli mekemhed.’ (Prov. 29:15) Papa mama, mekem plan se bambae ful famle blong yu i sidaon tugeta, wetem ol yangfala blong yufala tu. Sam papa mama oli wet go kasem faswan singsing blong oli tekem ol smol wan blong olgeta i go long toilet. Be, hemia i no wan rod blong tijim pikinini se singsing mo prea oli wan impoten haf long wosip blong yumi. !Sipos i gat jans, i moagud blong mekem samting ya bifo we program i stat!
5 Narafala samting we bambae i halpem yumi blong lesingud hemia sipos yumi spelgud long naet mo no kakae bigwan tumas long dei. Putum tingting blong yu i stap long wanem we brata i stap talem. Yu mas strong blong no letem tingting blong yu i tingbaot narafala samting. Yusum Baebol blong yu blong jekemap olgeta vas. Tekem ol sotfala not. Afta we ol wanwan tok oli pas, tingtingbak long wanem we brata i bin talem mo tingbaot olsem wanem yu save mekem ol poen ya oli wok long laef blong yu. Long en blong dei, tokbaot program ya wetem famle blong yu. ?Wanem poen we olgeta oli laekem? ?Olsem wanem famle blong yu i save mekem ol poen ya oli wok?
6 Soem Respek Long Tok Blong God: Ol asembli oli givim gud jans long yumi blong toktok wetem ol fren mo harem gud long kampani blong ol brata we i save leftemap tingting. Taem yumi kam eli, yumi gat taem blong storian bifo we program i stat. Be, samfala oli stap storian taem program i gohed, mo oli ting se samting ya bambae i no spolem ol narafala from we oli stap long wan bigfala haos asembli. Nating se yumi mekem miting long wan bigfala haos, yumi mas lesin olsem taem we yumi stap long miting blong Haos Kingdom. Yumi no mas letem olkaen mesin olsem telefon, video kamera, mo kamera oli spolem ol man raonabaot long yumi long taem blong program.
7 Taem Moses i stap wet blong kasem Loa long Jeova, “hem i no kakae, mo i no dring wota.” (Eks. 34:28) Long sem fasin, i no stret sipos yumi kakae no dring long taem we program blong asembli i stap gohed. Sipos yu no rili gat sam problem blong helt we oli mekem se yu mas kakae no dring, i gud blong wet kasem ‘stret taem’ blong samting ya.—Pri. 3:1.
8 Long sam asembli, i gat problem i stap yet we plante brata mo sista mo pikinini tu, oli stap wokbaot olbaot long taem blong asembli. Ol brata we oli mekem welkam bambae oli gat raet blong talem long olgeta ya blong gobak sidaon insaed. Ol volontia we oli stap long ol defren wok blong asembli bambae oli mas sidaon wetem ol narafala man, kwiktaem afta we wok blong olgeta i finis. Sipos i no gat gudfala risen blong ol wokman ya oli storian tugeta, i no nid blong oli stap longtaem long ples blong wok blong olgeta taem we program blong asembli i stat finis.
9 Yumi no wantem kam olsem man we i ‘slo tumas blong haremsave’ taem yumi stap lesin long Tok blong God. (Hib. 5:11) Taswe i gud yumi gat strong tingting blong soem respek taem yumi lesingud long ol tabu tok ya blong Jeova long distrik asembli we i stap kam.