‘Lesin Long Ol Tok We i Save Tijim Yumi’
1 Long buk blong Ol Proveb, waes fasin i stap singaot se: “Yufala i lesin gud, from we tok blong mi i gud tumas. Olgeta samting we mi wantem talem long yufala oli stret gud. Oltaem mi stap mekem plan blong wokem ol samting, mo biaen, mi stap mekem ol samting ya oli kamtru. . . . Yufala i lesin gud long mi. Sipos yufala i stap mekem olsem we mi mi talem, bambae yufala i save harem gud. Man we i faenem mi, hem i faenem laef, mo oltaem, Hae God i stap glad long hem.” (Prov. 8:6, 14, 32, 35) Ol tok ya i stret long tijing we bambae yumi kasem long Distrik Asembli ya, “Ol Man Blong Tijim Tok Blong God.”
2 Long asembli ya, bambae i gat ol tok we oli givhan long ol nid blong ol brata long fulwol. Sipos yumi mekem ol tijing mo ol gudfala advaes i wok long laef blong yumi, bambae oli givhan long yumi blong stap glad, blong holem wan gudfala fasin fren wetem Jeova, mo blong gohed blong wokbaot long rod we i go kasem laef blong olwe. I tru tumas, yumi gat gudfala risen blong ‘lesin long ol tok we i save tijim yumi.’—Prov. 1:5, NW.
3 Bifo Long Program: Blong kasem blesing from ol tok ya, yumi mas sidaon mo mekem tingting blong yumi i rere bifo we program i stat. Hemia i min se yumi wanwan i mas reregud ol samting long laef blong yumi. Wan impoten samting, hemia blong girap eli. Long naet bifo long asembli, i gud blong no stap wekap go kasem i let tumas. Long moning blong asembli, girap eli, blong evriwan long haos oli gat naf taem blong dring ti mo rere ol samting. Go eli long ples blong asembli, faenem wan jea blong sidaon, mo mekem ol samting we yu mas mekem bifo we program i stat. Ol doa blong haos asembli bambae oli open long 8 klok moning, mo program bambae i stat long haf pas 9 evri dei.
4 Stamba risen blong joen wanples, hemia blong presem Jeova “long fes blong olgeta man.” Taswe yumi mas statem olgeta dei blong asembli ya long fasin we i leftemap God blong yumi. (Sam 26:12) Blong mekem olsem, i gud sipos olgeta evriwan i sidaon bifo long faswan singsing. Samting ya i laenap wetem advaes blong Baebol se: “Yufala i mas mekem olgeta samting long fasin we i stret gud, we ol man oli glad long hem.” (1 Kor. 14:40) ?Tok ya i minim wanem long yumi wanwan? Taem yu luk jeaman i sidaon long platfom mo yu harem miusik, yu mas go sidaon long jea blong yu kwiktaem. Sipos yu mekem olsem, bambae yu save joen wetem ful hat blong yu long ol singsing we oli statem ol haf blong asembli ya, mo bambae yu presem Jeova.—Sam 149:1.
5 Taem Program i Gohed: Esra i ‘mekemrere hat blong hem blong ridimgud loa blong Jeova, mo blong mekem i wok.’ (Esra 7:10, NW ) ?Olsem wanem yumi save mekemrere hat blong yumi blong kasem ol tijing we Jeova i givim? Taem yu lukluk nem blong ol tok long program, askem long yu wan se, ‘?Jeova i stap talem wanem long mi tru long program ya? ?Olsem wanem mi save yusum advaes ya blong halpem mi mo famle blong mi?’ (Aes. 30:21; Efes. 5:17) Long trifala dei blong asembli ya, gohed blong askem ol kwestin ya. Makemgud ol poen we yu wantem yusum long laef blong yu. Tektaem blong tokbaot ol poen ya afta we program i finis. Bambae samting ya i givhan long yu blong rimemba ol advaes ya mo mekem i wok long laef blong yu.
6 Samtaem i no isi blong lesin blong plante aoa. ?Yumi save mekem wanem blong no letem tingting blong yumi i flae olbaot? Yusumgud ae blong yumi. Sipos yumi stap lukluk wan samting, plante taem bambae yumi tingting long hem tu. (Mat. 6:22) Taswe i impoten blong no tanem hed blong yu evri taem yu harem wan noes no yu luk wan samting i muvmuf. Lukluk i go nomo long brata we i stap givim tok. Taem hem i ridim wan vas, folem long prapa Baebol blong yu, mo livim Baebol blong yu i stap open taem hem i tokbaot vas ya.
7 Kristin lav bambae i blokem yumi blong no spolem ol narafala taem program i stap gohed. (1 Kor. 13:5) Hemia stret ‘taem blong stap kwaet’ mo lesin. (Pri. 3:7) Taswe, yumi no mas toktok wetem narafala, mo muvmuf tumas. Sipos yu go long toelet bifo we miting i stat, bambae yu no nid blong go plante taem bakegen, taem ol tok oli stap gohed. I no stret blong kakae mo dring taem program blong asembli i stap gohed. Sipos yu no gat wan sik we i mekem se yu mas kakae no dring, i gud blong wet kasem we miting i finis. Olgeta we oli karem telefon, video mo kamera, oli no mas yusum olgeta long fasin we i blokem narafala blong i no save lesingud long ol tok. Ol papa mama oli mas mekem plan se ful famle, wetem ol yangfala tu, oli sidaon wanples. Olsem nao, oli save lukaotgud long ol pikinini blong olgeta.—Prov. 29:15.
8 Las yia wan elda we i go long ol distrik asembli blong plante yia finis, i talem se: “Mi ting se distrik asembli ya i nambawan from wan narafala risen tu. Klosap evriwan wetem ol smosmol pikinini tu, oli stap raetemdaon ol impoten poen. Mi mi glad tumas blong luk samting ya. Taem brata we i givim tok i askem ol man we oli stap lesin blong ridim wan vas long Baebol, klosap evriwan oli mekem.” Fasin blong lesingud olsem hem i rili nambawan. I no jes karem blesing long yumi mo ol narafala we oli joen wetem yumi long asembli ya, be impoten moa, i leftemap Jeova God, Bigfala Tija blong yumi.—Aes. 30:20.
9 Fasin blong yumi i soemaot Kristin bilif blong yumi mo i givhan long ol man we hat blong olgeta i stret blong oli luksave trutok. I gud sipos klos mo hea blong yumi, mo ol fasin blong yumi, oli no agensem ol gudfala samting long saed blong spirit we oli kamaot long asembli ya. (Fil. 1:10; 1 Tim. 2:9, 10) Ale, yumi mas soemaot wan gudfala eksampol, mo givhan long ol narafala blong ‘lesin long ol tok we oli save tijim yumi’ taem yumi stap long distrik asembli ya, “Ol Man Blong Tijim Tok Blong God.”—Rom 13:3.