Yumi Kam Wanples Blong Presem Jeova
1. ?Wanem stamba tok blong Distrik Asembli, mo from wanem i stret nomo we yumi presem Jeova?
1 Jeova i gat olgeta paoa. Waes blong hem i bigfala tumas, i bitim tingting blong yumi olgeta. Fasin blong hem blong jajem man i stret olgeta. Mo hem i fulap long lav. Hem i Man we i Wokem Olgeta Samting, hem i Man blong Givim Laef, mo i Haefala Rula blong Heven mo Wol. Taswe i stret we yumi wosipim hem nomo. (Sam 36:9; Rev. 4:11; 15:3, 4) Distrik Asembli blong yia ya, “Leftemap Nem Blong God,” bambae i mekem yumi strong moa blong presem hem olsem God ya nomo we i tru.—Sam 86:8-10.
2, 3. ?Olsem wanem wan gudfala plan i save givhan long yumi?
2 Yumi Mas Plan Gud: Sipos yumi wantem harem gud long evri samting we Jeova i rerem blong yumi long lafet ya long saed blong spirit, yumi mas mekem gudfala plan fastaem. (Efes. 5:15, 16) ?Yu yu mekem plan finis long saed blong ples blong slip, transpot blong go long asembli, mo askem spel long bos blong yu? I nogud blong livim ol impoten plan ya long las menet. Sipos yu tektaem tumas blong askem spel long bos blong yu, maet bambae yu mestem wan haf, no fulwan, asembli ya we i wan spesel taem blong glad. Yumi evriwan i nidim blong stap long evri haf blong asembli ya.
3 Yu mas gat strong tingting blong kam eli long ples blong asembli evri dei. Hemia i min se taem faswan singsing i stat, yu yu sidaon finis i stap mo yu mekemrere tingting blong yu blong kasem tijing we bambae i kamaot. Evri dei, ples blong miting bambae i open long 8 klok moning. Plis, yufala i no mas blokem plante tumas jea we i bitim namba blong ol man long famle blong yu no olgeta we oli kam long trak wetem yu.
4. ?I gud we yumi evriwan i mekem wanem, mo from wanem?
4 I moagud blong tekem kakae we bambae oli givimaot long ples blong asembli, no blong tekem prapa kakae blong yumi i kam, i bitim we yumi lego ples blong asembli long medel dei blong go kakae samples. Taem yumi folem plan ya, yumi leftemap pis mo yumi gat moa taem blong storian wetem ol Kristin brata sista blong yumi.—Sam 133:1-3.
5. ?Olsem wanem yumi save mekemrere hat blong yumi blong kasem ol tok blong asembli ya?
5 Lesingud Mo Lanem Samting: Esra i prea mo i mekemrere hat blong hem blong kasem tok blong God. (Esra 7:10) Hem i traehad blong harem save ol tijing blong Jeova. (Prov. 2:2) Sipos yumi tingting dip long stamba tok blong asembli ya mo yumi storebaot samting ya wetem famle blong yumi bifo we yumi go long asembli, i olsem we yumi stap rerem hat blong yumi blong kasem ol tok blong asembli ya.
6. ?Wanem i save halpem yumi blong putum tingting blong yumi i stap strong long program? (Lukluk bokis.)
6 Taem yumi sidaon long wan bigfala stad i gat fulap samting blong pulum ae blong yumi, mo i gat olkaen noes tu. Ol samting ya oli save mekem tingting blong yumi i gowe long tok we brata i givim. Taem samting olsem i hapen, yumi save lusum sam impoten save. Smol bokis daon i givim sam gudfala advaes blong halpem yumi blong putum tingting blong yumi i stap strong long program.
7, 8. ?Olsem wanem yumi soem se yumi tingbaot ol narafala?
7 Tingbaot Ol Narafala: Yumi save yusum ol video kamera no nara samting blong rikodem ol tok blong asembli ya. Be i moagud we yumi sidaon i stap long jea blong yumi nomo taem yumi mekem olsem, blong no pulum ae blong narafala. Sipos yumi gat ol mobael fon yumi mas ofem olgeta no faenem nara rod blong mekem se oli no mekem noes long medel blong program. Yumi no gat raet blong yusum saon sistem blong asembli ya blong joenem rikoda blong yumi long hem.
8 !Yumi wantem tumas blong stap long taem ya we bambae yumi joen wanples bakegen blong presem Jeova! I gud yumi kam long evri haf blong asembli, yumi lesingud, mo yumi folem ol advaes we yumi kasem. Olsem nao, bambae yumi soem se yumi gat strong tingting blong leftemap nem blong God.—Dut. 31:12.
[Bokis blong pija long pej 3]
Lesingud Long Program Blong Distrik Asembli
▪ Tingtinggud fastaem long ol taetel blong ol wanwan tok
▪ Jekemap ol vas long Baebol blong yu
▪ Raetem sam sotfala not
▪ Makem gud wanem poen we yu save wok long hem
▪ Tingtingbak long samting we yu lanem