‘Yumi Joen Blong Leftemap Hae Nem Blong Jeova’
1. ?Bambae yumi gat wanem janis blong joen wetem ol narafala Kristin blong leftemap nem blong God? ?Yumi save mekem wanem naoia blong rere from taem ya?
1 Wan man blong raetem Ol Sam i singsing se: ‘Yufala i kam joen wetem mi, . . . yumi leftemap hae nem blong Jeova.’ (Sam 34:3) I no longtaem, long Distrik Asembli ya “Wokbaot Wetem God,” bambae yumi gat janis blong joen wetem ol brata sista blong plante kongregesen, blong yumi leftemap nem blong Jeova tugeta. ?Olsem wanem? ?Yu yu mekem plan finis long saed blong ples blong slip, transpot blong go mo kambak long asembli, mo spel long wok? Yumi waes sipos yumi stretem ol samting ya longtaem bifo long asembli.—Prov. 21:5.
2. ?From wanem i gud blong kam eli long haos asembli?
2 Taem Yumi Stap Long Asembli: Yumi mas tingbaot plante samting taem yumi go long wan asembli. I gud yumi aot long haos eli. Olsem nao, sipos i gat wan samting i blokem yumi long rod, bambae yumi no let. Mo tu, sipos yumi eli, yumi gat taem blong faenem wan jea mo sidaon bifo we asembli i stat, nao yumi save joen wetem fulhat blong yumi long faswan singsing mo prea. (Sam 69:30) Haos asembli bambae i open long 8 klok moning. Plis folem advaes we ol man blong welkam oli givim, long saed blong paking mo insaed long haos asembli tu. (Hib. 13:17) Sam menet bifo long program, bambae ol Kingdom miusik i stat mo jeaman bambae i sidaon long platfom. Long taem ya, yumi mas go sidaon rere, blong mekem se program i save stat long fasin we i gat oda mo i soem respek. (1 Kor. 14:33, 40) Yu save blokem jea blong olgeta nomo we oli kam long trak blong yu mo olgeta we oli stap long haos blong yu.—1 Kor. 13:5; Fil. 2:4.
3. ?Wanem wan gudfala plan blong folem long medel dei? ?From wanem i gud blong folem plan ya?
3 I moagud blong karem kakae i kam no tekem kakae nomo long ples blong asembli long medel dei, i bitim we yu aot long ples blong asembli blong go kakae. Sipos yumi evriwan i kakae nomo long asembli, bambae yumi gat janis blong haremgud blong storian tugeta mo blong stap rere blong lesin long program bakegen long aftenun.
4. ?From wanem i no isi oltaem blong werem klos we i soemaot klin mo tabu fasin?
4 Klos We i Stret, i No Bitim Mak: I no isi oltaem blong werem klos we oli soemaot klin mo tabu fasin. Rabis wol blong Setan i stap pulum ol man blong werem klos we i bitim mak mo i pulum tingting long saed blong seks, wetem ol narakaen stael we oli no stret blong yumi werem. (1 Jon 2:15-17) Taswe, long saed blong klos mo hea blong yumi, yumi mas folem advaes blong Baebol blong “livim olgeta fasin we oli no stret long fes blong [God]. Yumi no mas wantem tumas ol samting blong wol ya, mo yumi mas blokem ol samting we yumi nomo i wantem.” (Taet. 2:12) Yumi no wantem se ol stael blong klos mo hea blong yumi oli spolem tingting blong narafala, nating se i wan Kristin brata sista no wan narafala man nomo.—1 Kor. 10:32, 33.
5. ?Wanem ol kwestin we oli save givhan long yumi blong jekemgud klos blong yumi?
5 Taem yu stap mekemrere from asembli, traem ansa long ol kwestin ya: ‘?Klos blong mi i stret, no i pulum ae blong man? ?Klos blong mi i soem se mi gat respek long filing blong ol narafala? ?Ol top blong mi, nek blong olgeta i daon tumas, no oli sot tumas we oli soemaot bel blong mi? ?Ol dres blong mi oli taet tumas no oli soemaot bodi blong mi tumas? ?Klos blong mi i klin mo i smelgud?’—Rom 15:2, 3; 1 Tim. 2:9.
6. ?Olsem wanem ol narafala oli save halpem yumi blong werem klos we i soem se fasin blong yumi i klingud mo i tabu?
6 Long saed blong klos blong yumi, i gud yumi askem sam Kristin we oli bigman long saed blong spirit. Ol waef oli save askem long man blong olgeta blong talemaot tingting blong hem se ol narafala bambae oli haremgud no oli harem nogud long klos blong olgeta. Ol papa mama we oli obei gud long God oli save halpem ol yangfala blong olgeta long saed blong klos. Mo tu, ol olfala sista we oli onagud long God oli save “tijim ol yangfala woman . . . blong [oli soemaot tru long klos blong olgeta se] oli kwaet woman, we laef blong olgeta i klin gud.” Olsem nao, “bambae i no gat man i save tok nogud long tok blong God.” (Taet. 2:3-5) I gat plante gudfala pija long ol buk blong yumi we oli soem klos we i stret mo i no bitim mak.
7. ?Olsem wanem yumi save mekemrere hat blong yumi blong kasem ol tijing we bambae i kamaot?
7 Wan Lafet Long Saed Blong Spirit: King Jehosafat i “mekemrere hat blong [hem] blong lukaot trufala God.” (2 Kron. 19:3, NW ) ?Olsem wanem yumi save mekemrere hat blong yumi bifo long asembli ya? Las pej blong Wekap! (Inglis mo Franis) Mei 22 mo Jun 8, i tokbaot ol gudfala kakae long saed blong spirit we bambae yumi kasem long lafet ya. I gud yumi tektaem blong tingting dip long ol poen ya, olsem nao bambae yumi wantem moa ol kakae ya we Jeova i rerem blong yumi. Mo tu, blong mekemrere hat blong yumi, yumi mas askem long Jeova blong i halpem yumi blong kasem save long mining blong ol tijing we i kamaot mo blong mekem i wok long laef blong yumi.—Sam 25:4, 5.
8. ?Wanem samting we yumi wantem tumas? ?From wanem yumi wantem samting ya?
8 Yumi evriwan i wantem tumas blong kasem save moa long Tok blong God. Yumi save se Tok ya bambae i mekem yumi kam strong nao God bambae i sevem yumi. (1 Pita 2:2) Taswe, yumi mas stap long Distrik Asembli ya “Wokbaot Wetem God.” Long ples ya, bambae ‘yumi joen blong leftemap hae nem blong Jeova.’—Sam 34:3.
[Bokis blong pija long pej 3]
Ol Rod Blong Leftemap Hae Nem Blong God
◼ Mekem plan longtaem bifo long asembli
◼ Soem lav long ol narafala
◼ Mekemrere hat blong yu