!Ol Distrik Asembli—Taem Blong Glad!
1 Ol distrik asembli blong ol Witnes blong Jeova oli taem blong glad bigwan. Bitim wan handred yia finis, ol miting ya oli givhan blong mekem namba blong ol man blong Jeova i kam antap. Stat long taem we namba ya i smol nomo, yumi luk bigfala blesing blong Jeova long wok we i gohed long fulwol. Long 1893, long faswan asembli long taem blong yumi, long Chicago, Illinois, i gat 70 long ol 360 man we oli stap long asembli ya oli tekem baptaes blong soemaot se oli givim laef blong olgeta long Jeova. Las yia long ol distrik asembli ya, “Yumi Mekem Wanem We Tok Blong God i Talem,” i gat 9,454,055 man oli stap, mo 129,367 oli tekem baptaes. !Hemia wan nambawan risen blong glad!
2 Long taem bifo, ol man blong God oli joen wanples blong kasem ol tijing blong Jeova. Long taem blong Esra mo Nehemaea, ol man oli lesin long riding blong Loa “stat long eli moning, gogo kasem long medel dei.” (Neh. 8:2, 3, NW ) From we oli kasem moa save long Loa ya, oli “glad we oli glad.” (Neh. 8:8, 12) Yumi tu, yumi save glad from we Jeova, tru long “slef we i stret mo waes,” i yusum ol asembli ya blong givim ol gudfala tijing mo kakae long saed blong spirit, “long stret taem blong hem.” (Mat. 24:45, NW ) Jisas i talem se man i mas laef long “evri tok we God i talem.” Taswe ol distrik asembli oli impoten blong mekem yumi stap strong long saed blong spirit.—Mat. 4:4.
3 Kasem Blesing From Traehad: Yumi evriwan i mas meksua se yumi stap long evri dei blong distrik asembli long yia ya, we stamba tok blong hem se, “Ol Man Blong Tijim Tok Blong God.” Yumi mas plan blong kam eli evri dei mo blong stap kasem taem we yumi evriwan i joen blong talem “!Amen!” long laswan prea. Blong mekem olsem, maet yumi mas jenisim sam samting long laef blong yumi. Maet i no isi blong kasem ol dei blong spel long wok. Yumi mas gat strong tingting, yumi no mas ting se bambae yumi kasem asembli olsem nomo, we yumi no plan gud from. Sipos yumi nidim ples blong slip no trak blong karem yumi i go long haos asembli, yumi mas mekem plan fastaem. !Bambae yumi kasem blesing sipos yu traehad blong go long asembli ya!
4 Ol man blong Jeova oli no tingbaot se asembli i wan blesing sipos oli no lusum tumas mane blong go long hem, no gat. Tingbaot samfala we oli gat strong tingting blong go long Divine Will Intenasnal Asembli long 1958, long New York. Wan brata we i stap wokem ol haos, hem i satem bisnes ya blong hem blong tu wik. Hem i mekem olsem blong hem i save givhan blong rerem asembli mo blong stap long asembli ya. Wan brata long Virjin Aelan i salem tu hektea graon blong hem, blong ol sikis memba blong famle blong hem oli save go long asembli ya. Wan yangfala hasban mo waef, tufala i salem bot blong tufala, blong tufala i gat naf mane blong tekem trifala pikinini blong tufala long asembli ya. Long California, i gat tri stret brata we bos blong olgeta i talem se sipos trifala i go long asembli ya, bambae trifala i lusum wok blong trifala. Be, trifala ya i no letem samting ya i blokem olgeta, blong oli no go long nambawan asembli ya.
5 Jeova i Blesem Traehad Blong Yumi: Jeova hem i luk traehad blong ol man blong hem, mo hem i blesem olgeta from. (Hib. 6:10) Wan eksampol: Long 1950, long Theocracy’s Increase Asembli, i gat wan impoten tok we stamba blong hem se “New Systems of Things” (Niufala Fasin Blong Laef Long Wol). Brata Frederick Franz i pulum intres blong ol man taem hem i askem se: “?Yufala i glad blong save se i gat samfala long medel blong yumi tunaet, we bambae oli mekem wok blong prins long niufala wol?” Bitim 50 yia biaen, yumi glad yet long niufala save ya long saed blong Ol Sam 45:16 (NW ).
6 Afta we wan famle i go long distrik asembli las yia, hed blong famle ya we i gat bigfala tangkiu, i raet i kam. Hem i se: “Ol brata. Bambae i hadwok blong yufala i kasem save long bigfala paoa we asembli ya i gat long mifala. Mifala i muf i kam long wan bigfala taon blong kasem wok, be biaen mifala i kam slak long saed blong spirit. . . . Mifala i no moa mekem ol Kristin wok we mifala i mas mekem. Mifala i no moa go long ol miting tu, mo mifala i no moa joen long wok blong prij. . . . Be distrik asembli ya i givim paoa long mifala. Naoia mifala i stap traehad bakegen mo mekem ol plan long saed blong spirit.”
7 Jeova i stap givim ol kakae long saed blong spirit we yumi nidim. Hem i givim plante gudfala samting long yumi long ol distrik asembli. Sipos yumi gat tangkiu from ol samting ya, bambae yumi save talem tok olsem Konilias i talem taem aposol Pita i visitim hem: “Naoia mifala evriwan i stap long ples ya long fes blong Hae God, mifala i stap wet blong harem wanem tok we hem i givim long yu blong yu talem long mifala.” (Wok 10:33) !Bambae yumi traehad long yia ya blong stap “long fes blong Hae God” long evri haf blong distrik asembli ya, “Ol Man Blong Tijim Tok Blong God,” nao bambae yumi harem gud!