?Yu Yu Tinghae Long Ol Tabu Samting?
1 Taem wan man i askem kwestin ya long yu, ating bambae yu ansa kwiktaem se, !yes! ?Wanem sam long ol tabu samting ya we God i givim, we yumi mas tinghae long olgeta?
2 !Gudfala fasin fren we yumi gat wetem Papa blong yumi long heven, hemia wan samting we i sas tumas mo we yumi rili tinghae long hem! God i mekem promes long yumi se sipos yumi ‘stap klosap long hem, hem bambae i kam stap klosap long yumi.’ (Jem. 4:8) Sipos i no gat ransom sakrefaes blong Jisas Kraes, bambae i no gat wan man we i save kasem laef blong olwe. (Jon 3:16) Wetem fulhat blong yumi, evri dei yumi prea long God blong talem bigfala tangkiu long hem from presen ya we i sas tumas.
3 Tok blong God, Tabu Baebol, hemia tu i wan samting we i sas tumas, mo samting ya i sem mak long ogenaesesen blong Jeova long wol ya. Taem yumi mekem ol rul blong Baebol oli wok long laef blong yumi, mekem se lav we yumi gat long ol brata i kam strong moa, folemgud olgeta tiokratik oda, mo wokgud wetem olgeta we oli lidim yumi, yumi stap soemaot se yumi tinghae long ol samting ya we Jeova i givim.—1 Pita 1:22.
4 Tru long slef we i stret mo waes, yumi kasem plante kakae long saed blong spirit. Long yia ya, bambae yumi kasem fulap long ol kakae ya long Distrik Asembli ya “Ol Man Blong Mekem Samting We Tok Blong God i Talem.” Long taem ya, bambae yumi kasem ol advaes we oli impoten tumas, mo bambae yumi harem gud from gudfala kampani blong ol brata sista, wan samting we yumi rili nidim. ?Olsem wanem yumi save soemaot se yumi rili tinghae long rod ya we God i yusum blong givhan long yumi?
5 Yu No Mas Lego Haos Blong Jeova: Nehemaea i givim advaes long olgeta we oli bin wokhad blong bildim stonwol blong Jerusalem bakegen, se oli no mas ‘lego haos blong God blong olgeta’ (Neh. 10:39)Tede “Haos” blong Jeova i minim plan we hem i stanemap blong mekem wosip long hem. Ol distrik asembli blong yumi oli haf blong plan ya. Yumi no mas ting nating long plan ya. Yumi mas stap long asembli ya mo lesingud. Long rod ya, yumi soem long Jeova se yumi rili tinghae long ol samting we hem i givim long yumi. (Hib. 10:24, 25) ?Wanem ol plan we yumi mas mekem naoia blong soem se yumi rili tinghae long spesel taem ya we i tabu?
6 Stap Long Trifala Dei Ya: Yumi evriwan i mas mekem plan blong kam long ol trifala dei blong asembli ya. ?Yu yu plan blong kam eli evri dei mo blong stap go kasem laswan prea long Sande? Sipos yes, bambae yu kasem plante sas blesing. Ating i no isi oltaem blong kam long wan distrik asembli. Maet yu nidim strong tingting blong askem taem blong spel long wok blong yu. I no isi oltaem blong faenem transpot. Be, yu no mas letem ol samting ya oli mekem tingting blong yu i foldaon, nao yu no moa kam long asembli.
7 Tingbaot Nambawan Eksampel Ya: Las yia, wan grup blong ol brata long wan kantri blong Afrika we plante faet i kamaot long hem, oli wokbaot blong go long wan distrik asembli. Taem oli stap go, oli mitim wan grup blong soldia. Ol soldia ya oli askem long ol brata se: “?Yufala i hu ya, mo yufala i stap go wea?” Ol brata oli ansa se: “Mifala i Witnes blong Jeova, mo mifala i stap go long wan distrik asembli.” Wan long ol soldia ya i talem se: “Yufala Witnes blong Jeova, yufala i no fraet long wan samting. Yufala i go nomo, mo bambae yufala i save joen long asembli blong yufala, we i no gat problem. Be, yufala i mas save se bambae yufala i mitim plante soldia. !Taswe, yufala i mas wokbaot oltaem long medel blong rod! !Sipos yufala i luk plante man oli hivap i stap, yufala i mas gohed nomo blong wokbaot long medel blong rod!” Ol brata oli folem toktok ya mo oli kasem asembli ya we oli no gat trabol. Oli kasem blesing from we oli soemaot se oli tinghae long ol tabu samting.
8 Olsem ol brata long Afrika, yumi stap fesem ol traem. Be, i sua se, yumi save folem bilif blong olgeta mo gat strong tingting blong stap long fulwan program blong distrik asembli blong yumi. Sipos i nidim blong jenisim sam samting, askem Jeova blong i lidim yu, from we yu save se bambae hem i blesem ol traehad blong yumi blong stap long olgeta dei blong asembli ya.
9 Kasem Blesing: Yumi wantem tumas blong ridim Tok blong God, from we yumi save se tru long tok ya bambae yumi kasem sef. (1 Pita 2:2) Sipos yumi kam long distrik asembli ya mo yumi lesin long program blong hem, samting ya bambae i halpem yumi wanwan blong mekem bilif blong yumi long Tok ya i kam strong moa, nao bambae yumi naf moa blong stanap agensem ol traem blong Setan. Long rod ya, bambae yumi soem long Jeova mo ol man raonabaot, se yumi rili tinghae long ol tabu samting mo se “yumi no save tanemraon blong gobak. . . . Yumi man blong bilif long God, mo hem bambae i sevem yumi.”—Hib. 10:39; 12:16; Prov. 27:11.
10 Yumi save sua se bambae Jeova God i openem skae nao bambae i letem olgeta gudgudfala blesing long saed blong spirit oli kam long yumi. (Mal. 3:10) Traem bes blong yu blong stap taem program blong Distrik Asembli ya “Ol Man Blong Mekem Samting We Tok Blong God i Talem” i stat long Fraede moning, go kasem laswan prea mo “!Amen!” long Sande aftenun. !Yu save glad tumas sipos yu mekem olsem!