Lukluk Trufala Fasin Joen Blong Ol Brata Long Video Kaset Ya​—United by Divine Teaching

Wan seket elda i joen long stadi blong wan woman we i no kam yet long miting blong kongregesen. Hem i invaetem woman ya blong lukluk video kaset ya United by Divine Teaching. Long sem wik, woman ya i joen long miting mo i talem se hem i glad tumas blong stap long ples ya. ?From wanem video kaset ya i karem frut kwiktaem olsem? Woman ya i sapraes tumas blong luk we long wol ya we ol man oli raf tumas mo oli no laeklaekem olgeta, be ol brata oli joen gud.​—Jon 13:35.

Wajem video kaset ya blong lukluk mo harem save pis mo lav we ol Witnes blong Jeova raon long wol oli stap haremgud long hem. Biaen, tingting dip long ol kwestin ya:

(1) ?From wanem stamba tok ya “Tijing blong God” i stret long ol asembli blong ol yia 1993 mo 1994?​—Maeka 4:2.

(2) ?Trutok blong Baebol i mekem wanem long sam famle? ?Hem i mekem wanem long famle blong yu?

(3) ?From wanem i impoten blong letem Jeova i tijim yumi?​—Sam. 143:10

(4) ?Wanem ol problem we ol brata oli mas winim taem oli stap rerem ol bigfala intenasnal asembli?

(5) ?Wanem samting we yu bin luk long ol Kristin asembli we i pruvum se tok blong Ol Sam 133:1 mo Matiu 5:3 i tru?

(6) ?Wanem pruf i soem we tijing blong God i gat paoa?​—Rev. 7:9.

(7) ?Wetaem i gat moa man oli baptaes olsem ol trufala Kristin i bitim ol narafala taem?

(8) ?Wanem ol tok blong Maeka, Pita, mo Jisas, we oli kamtru long ol Witnes blong Jeova?

(9) ?Wanem samting i pruvum long yu se i no jes wan drim blong tingbaot we long fiuja, olgeta man bambae oli save hapi mo joengud?

(10) ?Bambae yu soem video kaset ya long hu, mo from wanem?

Afta we wan sista i lukluk video kaset ya, hem i talem gudfala tok ya: “Kaset ya bambae i halpem mi moa blong holemtaet long tingting blong mi se evri menet, plante Kristin brata mo sista long wol oli stap mekem wok blong Jeova mo holemstrong long hem. . . . !Fasin joen blong ol brata i sas tumas!”​—Efes. 4:3.