“?Bambae Mi Faenem Taem Wea?”
1 Plante long yumi oli komplen olsem from we yumi mekem plante defren wok long laef blong yumi. Wan toktok i talem se taem, hem i wan gudfala samting we i sas tumas, be hem i lus kwiktaem. ?Taswe, yumi save faenem taem wea blong mekem ol samting we oli rili impoten, olsem ridim mo stadi long Tok blong God?—Fil. 1:10.
2 Bigfala samting, i no blong faenem moa taem, be blong jusum wanem samting yumi wantem mekem wetem taem we yumi gat finis. Yumi evriwan i gat 168 aoa long wan wik, mo yumi spenem klosap 100 aoa blong slip mo wok. ?Nao, olsem wanem yumi save yusum gud ol narafala aoa we oli stap? Efesas 5:15-17 i talem se yumi no mas folem ‘fasin blong man we i no gat hed. Yumi mas mekem fasin blong man we i waes. Yumi mas yusum evri janis we yumi kasem blong mekem ol gudfala wok, . . . Yumi mas traem save olgeta samting we Masta blong yumi i wantem blong yumi mekem.’ Hemia i soem se yumi mas tekem evri janis blong mekem samting we Jeova i talem se oli impoten.
3 Jisas i talem se taem blong yumi i sem mak long taem blong Noa. (Luk 17:26, 27) Ol man long taem blong Noa oli bisi long ol samting blong laef evri dei. Nating se i olsem, Noa i faenem taem blong wokem wan bigfala sip mo blong prij. (Hib. 11:7; 2 Pita 2:5) ?Hem i mekem olsem wanem? Hem i mekem olsem taem hem i putum ol samting we God i wantem oli stap long fasples blong laef blong hem, mo taem hem i obei nao i “mekem olgeta samting ya olsem we God i talem.”—Jen. 6:22.
4 ?Wanem Samting We Yumi Mas Mekem Fastaem? Jisas i talem se: “Man i no save laef long kakae nomo. Evri tok we God i talem, hemia nao samting blong mekem man i laef.” (Mat. 4:4) Evri wik, yumi kasem kakae long saed blong spirit “long stret taem blong hem.” (Luk 12:42) Be sipos yumi wantem se ol kakae ya oli givhan long yumi, yumi wanwan i mas gat wan program blong ridim mo stadi long Baebol oltaem. Blong soemaot tangkiu from ol kakae long saed blong spirit, yumi no mas kakae hareap nomo we yumi no tekem taem blong kakae. Trufala tangkiu bambae i pusum yumi blong tekem taem blong stadi mo blong laekem ol samting long saed blong spirit.
5 Taem yumi kakae long saed blong spirit, samting ya i save lidim yumi blong kasem laef we i no save finis. (Jon 17:3) Kakae ya long saed blong spirit i mas stap long fasples long program blong yumi evri dei. ?Yumi save faenem taem blong ridim Baebol evri dei mo mekem rere ol Kristin miting? Yes, yumi save faenem. Bambae yumi kasem bigfala “pei” we i kamaot taem yumi gat save mo yumi mekem samting we God i wantem.—Sam 19:7-11.