“Mekem Ol Gudfala Wok, Mo Kam Rij Long Fasin Ya”

¹ Long ol laswan yia we aposol Pol i wok strong long wok blong prij, hem i gat wan tingting wetem Timoti mo Taetas. Hem i raetem leta i go long tufala wanwan, mo tok we hem i talem blong leftemap tingting, klosap i sem mak long tufala evriwan. Hem i talem long Taetas se “olgeta we oli bilif long God” oli mas “mekem tingting blong olgeta i strong blong mekem ol gudfala wok.” (Taet. 3:8) Hem i talem long Timoti se olgeta we oli trastem God oli mas “mekem . . . ol gudfala wok, mo kam rij long fasin ya.” (1 Tim. 6:17, 18) !Hemia i nambawan advaes blong yumi evriwan! ?Be wanem samting i save pusum yumi blong mekem ol gudfala wok long laef blong yumi? ?Mo wanem ol wok we yumi save mekem long ol dei we oli stap kam?

² Samting we bambae i pusum yumi blong kam rij long ol gudfala wok, hemia bilif mo lav we yumi gat long Jeova mo nambawan fiuja we hem i promes blong givim long yumi. (1 Tim. 6:19; Taet. 2:11) Long sem taem evri yia, yumi tingbaot moa se Jeova i bin sanem Pikinini blong hem i kam long wol blong i leftemap Papa blong hem, mo blong i openem rod blong ol man we oli naf oli kasem laef we i no save finis. (Mat. 20:28; Jon 3:16) Samting ya bambae i kamaot klia long Memoriol blong ded blong Jisas, long Maj 28. ?Olsem wanem? ?Promes blong laef olwe we yumi gat i pusum yumi blong traem bes blong yumi blong ‘mekem ol gudfala wok, mo kam rij long fasin ya’? !Yes! ?Wanem wok we yumi save mekem naoia?

³ Ol Gudfala Wok Long Manis Maj Mo Biaen: I sua se bambae yumi stap long Memoriol, we ol Witnes blong Jeova long olgeta ples blong wol oli tingbaot se i moa impoten i bitim ol narafala miting long yia. (Luk 22:19) Be yumi wantem serem glad we yumi kasem long taem ya wetem fulap narafala man tu. Long ripot blong 2002 Yearbook no long Wajtaoa blong Jenuware 1, 2002, bambae yu luk se long las yia, long plante ples long wol, namba blong ol man we oli kam long Memoriol i tri taem, fo taem, faef taem, no moa, antap long namba blong ol pablisa. I sua se ol man long olgeta kongregesen ya oli rili traehad blong givimaot ol smol pepa long olgeta man long ples blong olgeta, blong singaotem olgeta oli kam long Memoriol. Taswe, stat naoia kasem Maj 28, yumi mas spenem plante taem blong singaotem ol man oli kam long Memoriol, mo givhan long olgeta blong oli save long promes blong laef long fiuja.

⁴ Maet bambae weta i kam moa gud long manis Eprel. ?Olsem wanem yumi save yusum gudfala taem ya blong ‘mekem ol gudfala wok mo kam rij long fasin ya’? Yumi save gohed blong talemaot gud nius wetem glad, we yumi “strong blong mekem ol gudfala samting.” (Taet. 2:14; Mat. 24:14) ?Sipos yu no mekem wok blong haftaem paenia long Maj, olsem wanem long Eprel mo Mei? ?Sipos yu mekem wok blong paenia long Maj, yu save gohed?

⁵ Samfala we oli wok blong kasem mane, oli faenem se oli save spenem wan aoa no moa long wok blong prij taem oli stap go long ples blong wok, taem oli prij long rod, mo taem oli toktok long ol man we oli wok long ol stoa we oli open long eli moning. Sam narafala oli prij taem oli spel smol long dina. Samfala oli faenem se oli save mekem wan Baebol stadi long dina wetem wan we oli wok wetem hem. Plante sista we oli stap long haos oli makemaot sam aoa blong prij taem pikinini blong olgeta i stap long skul. Sipos oli girap eli long moning mo mekem ol wok long haos, oli gat moa taem blong prij mo tijim ol narafala.—Efes. 5:15, 16.

⁶ Maet yu no naf blong mekem wok blong haftaem paenia, be yu save mekem wan program blong yu joen moa long wok blong prij. Yu save mekem bes blong yu blong ‘mekem ol gudfala fasin, mo ol gudfala wok, mo kam rij long fasin ya. Yu save gat gladhat blong givhan long ol man, mo blong seraot’ trutok long ol narafala.—1 Tim. 6:18.

⁷ Tingbaot Gudfala Wok Blong Mekem Disaepol: Evri yia i gat plante man we oli intres oli kam long Memoriol. ?Samfala long kongregesen oli save lukaot long olgeta we oli kam be oli no stadi yet? ?Oli save go visitim olgeta bakegen blong givhan long olgeta blong oli gru moa long trutok? Maet sam we oli bin kam long Memoriol oli gat ol famle we oli Witnes. Sam narafala maet oli bin stadi bifo mo maet oli jes nidim we narafala i leftemap tingting blong olgeta blong stadi bakegen mo blong joen oltaem long ol miting. !Bambae yumi glad tumas sipos ol man ya oli joen wetem yumi blong mekem wok blong Jeova!

⁸ Sipos yumi joen moa long wok blong prij long manis Maj mo ol manis biaen, ating bambae yumi faenem sam moa man we oli intres we yumi mas go visitim olgeta bakegen. Taem yu lego olgeta, traem putum wan kwestin blong oli stap tingting long hem. Mo promes long olgeta se bambae yu talem ansa blong kwestin ya taem yu kambak bakegen. Taem yu mekem olsem, yu mekem rere tingting blong olgeta blong yu go visitim olgeta bakegen. I moa gud blong gobak kwiktaem. Sipos yu no bin statem wan stadi long faswan taem we yu storian wetem man blong haos, yu mas traem bes blong yu blong statem wan long nekis visit.

⁹ Taem yumi prij long ol rod, yumi mas tingbaot blong traem storian wetem ol man. Plante pablisa oli mitim sam man we oli intres taem oli prij long rod, mo ol man ya oli givim nem, adres, mo namba blong telefon blong olgeta. Sipos yu faenem wan man we i intres be i no stap long teritori blong yu, karem pepa ya Please Follow Up (S-43) long Haos Kingdom, fulumap, mo givim long sekretari blong kongregesen. Hem bambae i pasem pepa ya i go long kongregesen we i stret long ples we man ya i stap long hem. Sipos sekretari i no gat rod blong mekem samting ya, bambae hem i sanem pepa ya i go long branj ofis blong oli lukluk long hem. Long rod ya, intres blong man ya i save kam bigwan moa.

¹⁰ Sipos wan man i givim telefon namba blong hem long yu, be i no givim adres blong hem, yu save telefon long hem blong mekem visit bakegen. Rere gud fastaem long wanem samting we yu wantem tokbaot. Holem Reasoning buk i stap wetem yu blong yu save lukluk kwiktaem long hem. Samfala oli kasem gudfala frut taem oli stadi wetem ol man long telefon, mo taem oli telefon i go long olgeta we i hadwok blong faenem olgeta long haos. Wan sista we i prij long ol haos wanwan i bin askem telefon namba blong ol woman we oli soemaot intres, mo biaen hem i statem tu Baebol stadi.

¹¹ Wok Gud Wetem Ol Elda Blong Halpem Olgeta We Oli No Moa Prij: Ol elda oli wantem tumas blong halpem mo soemaot lav long olgeta we oli no moa prij. Plante long olgeta, oli girap olgeta nomo mo oli stat blong joen bakegen long ol miting blong kongregesen. Oli save se oli nidim blong joengud wetem ogenaesesen blong Jeova, blong oli stap sef long saed blong spirit olsem Ol Sam 91 i tokbaot. Sam long ol man ya oli rere naoia blong joen long wok blong prij bakegen. Sipos samfala we oli no moa prij oli kam long Memoriol long manis ya, maet bambae oli glad blong stadi bakegen. Sipos i olsem, ol elda bambae oli mekem plan blong wan i stadi wetem olgeta. Sipos oli askem long yu blong yu givhan long saed ya, i gud tumas sipos yu wok gud wetem olgeta.—Rom 15:1, 2.

¹² Gohed Blong ‘Mekem Ol Gudfala Wok’: Plante we oli joen long wok blong haftaem paenia blong wan manis no bitim wan manis, oli faenem se oli mekem moa long wok blong prij long ol manis biaen. Oli bin faenem ol man we oli intres mo oli harem se oli mas go luk olgeta bakegen. Hemia i pusum olgeta blong oli traehad moa blong prij plante mo gobak long olgeta ya we oli intres. Samfala oli statem ol stadi, mo samting ya i halpem olgeta blong oli gohed blong mekem moa wok.

¹³ Sam narafala oli bin faenem bigfala glad long wok blong prij mo mekem disaepol, nao samting ya i pusum olgeta blong oli skelem ol samting we i mas stap long fasples long laef blong olgeta. Frut we i kamaot from, hemia se samfala oli katem taem we oli spenem long wok blong winim mane mo oli gohed blong mekem haftaem paenia. Sam narafala oli naf blong joen long wok blong fultaem paenia. Oli trastem God moa, be i no ol samting we wol i save givim. Oli faenem se taem oli “gat gladhat blong givhan long ol man, mo blong seraot ol samting blong olgeta,” oli kasem ol rij blesing long Jeova mo hemia i mekem tingting blong olgeta long saed blong “trufala laef” long fiuja, i kam strong moa. (1 Tim. 6:18, 19) I tru se taem plante moa oli joen long wok blong paenia, ful kongregesen i harem gud from. Ol paenia oli glad oltaem blong tokbaot ol samting we i hapen long wok blong prij, mo blong singaotem ol narafala oli joen wetem olgeta, nao fasin ya i leftemap spirit we i stap long kongregesen.

¹⁴ I gud sipos yumi evriwan i mekem moa long Kristin wok blong prij long taem blong Memoriol mo afta long hem. Olsem nao, bambae yumi ‘mekem ol gudfala wok mo kam rij long fasin ya.’ Yumi mas soemaot tangkiu blong yumi from samting we Jeova i mekem, taem hem i mekem rod blong yumi kasem laef we i no save finis long niufala wol we i fulap long stret fasin.—2 Pita 3:13.