!Oli Glad Blong Lukluk!
1 Ol Kristin famle long plante defren ples oli soemaot bigfala tangkiu from video kaset ya Young People Ask—How Can I Make Real Friends? Wan papa long Yunaeted Stet i talem se afta we ol boe blong hem oli wajem video kaset ya, oli stap kwaet nomo, from we hem i stret long olgeta. Wan ripot we i kamaot long Malawi i talem se ol yangfala brata mo sista oli laekem video kaset ya from we oli stap fesem ol sem kaen trabol long fren blong olgeta long skul. Wan papa long Jemani i talem long saed blong video kaset ya se: “Mi harem olsem se kaset ya i ansa blong prea blong mi.” Wan yangfala gel i talem se: “Tangkiu from we kaset ya i pulum mi blong tingbaot we Jeova i rili kea long mi.” Wan elda long Niusilan i talem se: “Kaset ya i halpem wan yangfala gel blong kambak mo wokbaot bakegen long rod blong laef.” Wan woman we i mared i bin wajem kaset ya, mo i talem se: “!Mi wantem tumas we evri yangfala long ogenaesesen blong Jeova oli lukluk kaset ya from we samting ya bambae i pusum olgeta blong mekem trutok i wok long laef blong olgeta!” Ol famle, i gud sipos yufala i lukluk kaset ya bakegen, nao biaen, i gud we yufala i tokbaot ol kwestin ya tugeta:
2 Fastok: ?Wanem ya wan trufala fren?—Prov. 18:24.
3 Ol Samting We i Blokem Fasin Fren: ?Olsem wanem yu save winim filing ya se yu stap yu wan oltaem? (Fil. 2:4) ?From wanem yu mas rere blong kamgud moa long fasin blong yu, mo hu bambae i save halpem yu blong mekem olsem? ?Wanem i save openem rod long yu blong faenem sam moa fren, mo weples yu save faenem ol fren ya?—2 Kor. 6:13.
4 Fasin Fren Wetem God: ?Olsem wanem yu save wokem fasin fren wetem Jeova, mo from wanem ol traehad we yumi mekem long saed ya oli no blong nating? (Sam 34:8) ?Hu i save mekem fasin fren blong yu wetem God i kam moa strong?
5 Ol Nogud Fren: ?Hu nao oli nogud fren? (1 Kor. 15:33) ?Olsem wanem ol nogud fren oli save lidim yu blong foldaon long saed blong spirit? ?Yumi save lanem wanem long stori long Baebol long saed blong Daena?—Jen. 34:1, 2, 7, 19.
6 Wan Stori Blong Tede: ?Tara i harem olsem wanem from we hem i no gat fren? ?Hem i talem wanem blong soem se i oraet blong joen wetem ol fren blong wol? ?Ol fren ya oli pulum hem blong kam klosap long wanem denja? ?From wanem papa mama blong Tara, tufala i no luksave se hem i stap long denja, be wanem fasin blong tufala taem tufala i halpem hem blong kam strong bakegen long saed blong spirit? ?Olsem wanem wan paenia sista i soemaot we hem i wan trufala fren blong Tara? ?From wanem ol Kristin oli mas folem gud Ol Proveb 13:20 mo Jeremaea 17:9? ?Tara i lanem wanem impoten lesen?
7 Lastok: ?Yu yu lanem wanem lesen taem yu lukluk video kaset ya? ?Olsem wanem yu save yusum kaset ya blong halpem ol narafala?—Sam 71:17.