Wan Vidio Kaset We Yumi Mas Tingting Dip Long Hem
“!Vidio kaset ya i mekem mi mi tingting plante!”
“!Hem i tajem hat blong mi wantaem!”
“!Hem i tajem filing blong mi!”
1 ?Olsem wanem? ?Hemia nao filing blong yu taem yu wajem vidio kaset ya Young People Ask—How Can I Make Real Friends? Sam yia bifo, wan yangfala brata i gotru long wan hadtaem long laef blong hem. Hadtaem ya i kamaot from ol fren we hem i jusum. Olgeta ya oli mekem se yangfala brata ya i no moa intres long trutok mo hem i lusum fasin fren blong hem wetem Jeova. Biaen, vidio kaset ya Real Friends i kamaot. Yangfala brata ya i raetem se: “Mi wajem vidio kaset ya bakegen mo bakegen, mo wota blong ae blong mi i ron i kamdaon long fes blong mi. Mi talem tangkiu long Jeova from help we hem i givim long mi long stret taem.” Vidio kaset ya i pusum hem blong jenisim fasin blong laef blong hem mo blong faenem ol gudfala fren. Hem i talem bakegen se: “I klia we yufala i savegud ol samting we i stap hapen long ol yangfala.” Ol papa mama mo ol yangfala, i gud we yufala i wajem vidio kaset ya bakegen long nekis famle stadi blong yufala. Stopem kaset ya afta ol wanwan haf blong hem, mo storian tugeta long klia fasin we yufala i no haedem wan samting, long saed blong ol kwestin ya.
2 Fastok: ?Wan trufala fren i olsem wanem?—Prov. 18:24.
3 Ol Samting We i Blokem Fasin Fren: ?Olsem wanem yu save winim filing ya se yu stap yu wan oltaem? (Fil. 2:4) ?From wanem yu mas rere blong kamgud moa long fasin blong yu, mo hu i save halpem yu blong mekem olsem? ?Wanem i save openem rod blong yu faenem sam moa fren, mo weples yu save faenem ol fren ya?—2 Kor. 6:13.
4 Fren Wetem God: ?Olsem wanem yu save fren moa wetem Jeova, mo from wanem ol traehad we yu mekem long saed ya oli no blong nating? (Sam 34:8) ?Hu i save mekem fasin fren blong yu wetem God i kam moa strong?
5 Ol Nogud Fren: ?Hu nao oli nogud fren? (1 Kor. 15:33) ?Olsem wanem ol nogud fren oli save lidim yu blong foldaon long saed blong spirit? ?Yu yu lanem wanem long stori blong Daena long Baebol?—Jen. 34:1, 2, 7, 19.
6 Wan Stori Blong Tede: ?Tara i harem olsem wanem from we hem i no gat fren? ?Hem i talem wanem blong mekem eskius from fasin blong hem blong joen wetem ol yangfala blong wol? ?Ol fren ya oli pulum hem blong kam klosap long wanem trabol? ?From wanem papa mama blong Tara, tufala i no luksave se hem i stap long denja, be wanem fasin blong tufala i halpem Tara blong kam strong bakegen long saed blong spirit? ?Olsem wanem wan paenia sista i soemaot we hem i wan trufala fren blong Tara? ?From wanem ol Kristin oli mas lesin long advaes long Ol Proveb 13:20 mo Jeremaea 17:9? ?Tara i lanem wanem impoten lesen?
7 Lastok: ?Yu yu lanem wanem taem yu lukluk vidio kaset ya? ?Olsem wanem yu save yusum kaset ya blong halpem ol narafala?—Sam 71:17.