Bilif i Pusum Yumi Blong Mekem Ol Gudfala Wok
1 Bilif i pusum Noa, Moses mo Rehab blong girap mo mekem sam samting. Noa i wokem wan bigfala sip. Moses i lego rij laef we hem i gat blong smoltaem long haos blong Fero. Rehab i haedem tufala spae mo hem i obei long ol tok we oli talem blong sevem famle blong hem. (Hib. 11:7, 24-26, 31) ?Wanem gudfala wok we bilif i pusum yumi blong mekem tede?
2 Prij: Bilif i pusum yumi blong tokbaot nambawan God blong yumi mo ol gudfala samting we hem i givim blong mekem laef blong yumi i hapi blong olwe. (2 Kor. 4:13) Sam samtaem, maet yumi fraet blong prij. Be sipos ‘oltaem yumi save we Hae God i stap wetem yumi,’ tingting blong yumi i strong mo yumi no moa fraet. (Sam 16:8) Nao bilif blong yumi i pusum yumi blong tekem evri janis blong talemaot gud nius long ol famle blong yumi, ol man we oli stap raonabaot long yumi, olgeta we yumi wok wetem olgeta, ol fren blong yumi long skul, mo plante narafala man.—Rom 1:14-16.
3 Joen Wanples: Wan narafala gudfala wok we i kamaot from bilif, hemia fasin blong go oltaem long ol miting. ?Olsem wanem hemia i joen wetem bilif? Fasin ya i soemaot se yumi bilif we Jisas i stap wetem yumi, i givim tabu spirit blong God long yumi taem yumi joen long ol Kristin miting. (Mat. 18:20) Fasin ya i soemaot se yumi wantem ‘lesin gud long tok we tabu spirit i stap talem long ol jos.’ (Rev. 3:6) Yumi tinghevi long ol tijing we yumi kasem, from we bilif i mekem yumi luksave se hemia we i stap tijim yumi, hem i Bigfala Tija, Jeova.—Aes. 30:20.
4 Ol Jus We Yumi Mekem: Bilif i minim se yumi tingting strong long ol samting we oli no kamtru yet se oli tru. Fasin ya i save pulum yumi blong putum ol samting long saed blong spirit long fasples long laef blong yumi. (Hib. 11:1) Taem yumi gat fasin ya, yumi lego plante samting long saed blong bodi blong mekem wok blong God. Wan elda i bin talem ‘no’ long wan wok we i save givim bigfala mane long hem from we sipos hem i tekem wok ya, bambae hem i mestem plante miting, bambae hem i stap longwe long famle blong hem, mo bambae hem i no moa save mekem wok blong paenia. I gud we yumi tu yumi trastem promes blong Baebol fulwan, se Jeova bambae i lukaotgud long olgeta we oli ‘lukaot kingdom mo stret fasin blong hem fastaem.’—Mat. 6:33, NW.
5 Ol narafala oli stap lukluk olsem wanem bilif i gat bigfala paoa long laef blong yumi. Yes, long ful wol, ol man oli tokbaot bilif we yumi stap soemaot. (Rom 1:8) Taswe, i gud we yumi evriwan i mekem ol gudfala wok blong soemaot se bilif blong yumi i rili laef.—Jem. 2:26.