?Yu Yu Stap Yusum Buklet Wanem Blong Statem Ol Stadi?
1 Sipos oltaem yu stap visitim wan man we i intres blong storian long Baebol, mo yu folem ol save long wan buk we yumi yusum blong stadi, nating sipos storian i sot nomo, be hemia wan Baebol stadi. ?Yu yu save samting ya? Nating se yu mekem samting ya taem yu stanap long doa blong haos blong man no long telefon, be hem i wan Baebol stadi. I gud blong mekem wan spesel traehad long manis Mei mo Jun blong statem wan stadi long buklet ya Wanem.
2 Reregud Blong Karem Frut: Taem yu seremaot buklet ya Wanem, samting we yu wantem tokbaot i mas stap klia long tingting blong yu. Sipos yu stap mekem wan visit, tingbaot samting we yufala i bin tokbaot lastaem. Askem kwestin ya: ‘?Mi save tokbaot wanem paragraf long buklet ya blong gohed long storian ya blong lastaem mo blong statem wan Baebol stadi wetem man ya?’ Sipos yu stap prij long evri haos, tingbaot wanem storian bambae i stret long wan yangfala, wan olfala, wan man, no wan woman. Luklukbak long ol japta blong buklet ya, mo jusum wan we i save pulum intres blong man. Taem yu jusum wan rod blong storian, lanem bakegen mo bakegen. Hemia nao wan impoten samting we yu mas mekem blong karem gudfala frut.
3 Yumi kasem wan pepa insaed long Kingdom Wok Blong Yumi blong Jenuware 2002, we i tokbaot eit “Rod Blong Seremaot buklet Ya Wanem.” Bokis ya “Askem Stret Long Man” i soemaot olsem wanem blong yusum buklet ya blong statem ol stadi. Maet yu jenisim faswan rod smol, olsemia:
◼ “?Yu yu save se long sam menet nomo, yu save kasem ansa blong wan impoten kwestin long Baebol? Eksampol: ?From wanem i gat plante skul we oli stap talem se oli Kristin? ?Yu bin tingbaot kwestin ya samtaem?” Taem man blong haos i ansa, yu save openem buklet long stadi 13 mo tokbaot paragraf wan mo tu. Sipos i gat taem, ridim mo tokbaot wan no tu vas. Nao ridim laswan kwestin antap, mo talem se: “Ol narafala paragraf long japta ya oli soem faef fasin we wan skul i mas gat sipos hem i trufala skul. Mi mi glad blong kambak mo tokbaot olgeta ya wetem yu.”
4 Mekem Bakegen Mo Bakegen: Tekem evri janis blong soemaot long ol man olsem wanem blong mekem Baebol stadi wetem buklet ya Wanem. (Mat. 21:22) !Sipos yu mekem bakegen mo bakegen, ating bambae yu kasem glad ya we i kamaot taem yu givhan long wan man blong bilif long gud nius!