Givhan Long Brata We i Lukaot Long Buk Stadi Blong Yu
1 Yumi evriwan i stap kasem plante gudfala samting long Buk Stadi. Las manis, yumi bin tokbaot olsem wanem brata we i lukaot long Buk Stadi bambae i mekem wok blong hem. ?Be yumi save mekem wanem blong givhan long hem, mo long rod ya, mekem i gud long yumi wan mo long ol narafala?
2 Kam Long Buk Stadi Evri Wik: I no gat plante man long ol wanwan buk stadi, taswe i impoten we yu yu stap evritaem. Mekem tingting blong yu i strong blong kam evri wik. Mo tu, sipos yu kam eli, bambae yu givhan long brata we i lukaot long buk stadi blong statem miting long stret taem.—1 Kor. 14:40.
3 Ol Gudfala Ansa: Wan narafala rod blong givhan, i blong reregud mo givim ol gudfala ansa. I moagud we yu tokbaot wan poen nomo long ol ansa blong yu. Hemia i save givim janis long ol narafala tu blong ansa. Yu no mas traem blong talem olgeta poen long wan paragraf. Sipos wan poen i tajem hat blong yu, yu save givim wan ansa blong talemaot tingting blong yu, mo samting ya bambae i mekem buk stadi i laef.—1 Pita 4:10.
4 Sipos yu yu gat blesing ya blong ridim ol paragraf long buk stadi, yu mas traehad blong mekemgud wok ya. Taem yu ridgud, yu givhan blong mekem stadi i gud moa.—1 Tim. 4:13.
5 Prij Wetem Grup: I gat ol miting blong prij long ol buk stadi. Sipos yu sapotem ol miting ya, yu givhan long brata we i lukaot long buk stadi blong lidim wok blong talemaot gud nius. Yu mas tingbaot plan ya olsem wan janis blong kam klosap moa long ol brata mo sista mo leftemap tingting blong olgeta.
6 Ripot Blong Prij: Wan narafala rod blong givhan long brata we i lukaot long Buk Stadi, i blong givim ripot blong prij blong yu kwiktaem long en blong manis. Yu save givim ripot blong yu stret long brata ya, sipos no, yu save putum long bokis blong ol ripot long Haos Kingdom. Maet sekretari i wantem se ol brata we oli lukaot long ol buk stadi long kongregesen oli putum ol ripot blong grup blong olgeta i go long bokis ya.
7 Brata we i lukaot long Buk Stadi bambae i haremgud long fasin blong yu blong givhan long hem. Antap moa, yu save sua se Jeova “bambae i stap wetem yu from gudfala fasin we yu yu gat.”—Fil. 4:23, NW.