Kasem Help Long Stret Taem
1 Taem aposol Pita i luk se sam Kristin brata mo sista blong hem oli slak, hem i wari long olgeta, mo filing ya i pusum hem blong toktok long olgeta wetem lav, blong mekem oli tingbaot sam samting mo blong leftemap tingting blong olgeta. (2 Pita 1:12, 13; 3:1) Hem i talem long olgeta we ‘oli gat fasin blong bilif’ finis, blong oli traehad moa blong tekem ol gudfala fasin long saed blong spirit. Olsem nao, bambae oli ‘no save stap nating nomo. Bambae oli save savegud, Jisas Kraes, Masta blong yumi, nao bambae laef blong olgeta i save karem frut.’ (2 Pita 1:1, 5-8) Wok blong Pita i blong givhan long olgeta blong traehad moa blong soemaot se Jeova i jusumaot olgeta, i singaot olgeta blong oli kam man blong hem. Long rod ya, bambae oli mekem we ‘long fes blong God, laef blong olgeta i klin gud, mo we i no gat wan samting i rong long laef blong olgeta. Nao long fasin ya, oli gat pis wetem God.’ (2 Pita 1:10, 11; 3:14) Long plante blong olgeta, wok we Pita i mekem blong leftemap tingting, i olsem help we oli kasem long stret taem.
2 Tede, ol Kristin elda oli sem mak long Pita, oli wari long ol man blong God. Long taem blong yumi we ‘laef long wol ya i kam strong tumas,’ plante man blong Jeova oli mas winim ol bigfala traem mo trabol. (2 Tim. 3:1) Maet samfala we oli gat trabol long saed blong mane, famle, no ol prapa trabol blong olgeta, oli harem olsem Deved we i talem se: “Naoia plante trabol oli stap kam raon long mi. Oli plante tumas, mi mi no save kaontem. Ol sin blong mi i kavremap mi, mo naoia mi no moa save lukluk. Oli plante tumas, i winim ol hea long hed blong mi, nao tingting blong mi i foldaon olgeta.” (Sam 40:12) Ol trabol ya oli save kam hevi tumas, nao ol brata mo sista ya oli kam slak blong mekem ol impoten samting long saed blong spirit, ale oli stop blong joen long Kristin wok blong prij. Be, nating se oli slak olsem, ‘oli no tanem baksaed long ol loa we [Jeova] i putum.’ (Sam 119:176) Taswe, naoia i stret taem blong ol elda oli givim help we ol man ya oli nidim.—Aes. 32:1, 2.
3 Blong givim help we oli nidim, ol elda oli kasem advaes blong pulum olgeta blong mekem wan spesel traehad blong givhan long ol brata mo sista we oli no stap joen long wok blong prij. Oli stap hadwok naoia blong mekem samting ya mo bambae oli gohed kasem manis Maj. Ol brata we oli lukaot long ol buk stadi oli kasem tok blong askem long olgeta blong go luk ol brata mo sista we oli no moa prij, mo halpem olgeta long saed blong spirit, blong bambae oli joen bakegen long ol wok blong kongregesen. Sipos i gat nid, elda i save mekem plan blong hemia we i slak i stadi Baebol bakegen. Elda i save askem narafala blong givhan long saed ya. Sipos hem i askem long yu, yu save tingbaot se hadwok blong yu i save givhan bigwan, antap moa sipos yu yusum kaen fasin blong leftemap tingting blong hemia we i slak, mo sipos yu soem respek long filing blong hem.
4 I gat risen blong yumi evriwan i glad tumas taem wan brata no sista we i slak i joen bakegen long ol wok blong kongregesen. (Luk 15:6) Long taem ya, hadwok blong yumi blong leftemap tingting blong hemia we i no moa prij i olsem “tok we wan man i talem long prapa taem blong hem.”—Prov. 25:11, NW.