2004 Distrik Asembli Blong Ol Witnes Blong Jeova “Wokbaot Wetem God”
1 ?Long tingting blong yu, wanem i mekem se distrik asembli evri yia i spesel? ?Yu yu laekem asembli ya from ol gudfala tok we ol brata oli givim, mo from drama we “slef ya we i stret mo waes” i rerem blong yumi? (Mat. 24:45-47, NW ) ?Maet yu laekem asembli from ol niufala buk we oli givim kakae long yumi long saed blong spirit long stret taem we yumi nidim? ?Ating yu laekem blong harem stori blong ol brata sista, olsem wanem Baebol i givhan long olgeta blong jenisim plante fasin long laef blong olgeta? ?Maet yu laekem asembli from ol ripot we yu harem long saed blong wok blong Kingdom long ol narafala kantri? ?Ating yu laekem tumas kampani blong ol narafala Kristin, nating se oli yangfala no olfala? !Yes, i gat plante risen from wanem yumi stap wet wetem glad blong go long distrik asembli blong yumi evri yia! Long teritori we branj ofis blong yumi i lukaot long hem, faswan distrik asembli long yia ya bambae i stat long Vanuatu long Ogis 27-29. Biaen i gat tu asembli long Niukaledoni long Septemba 10-12 mo Septemba 17-19, mo biaen bakegen, long Walis mo Futuna, long Oktoba 2-3.
2 Stap Long Ol Tri Dei: Jeova i givim tok long Moses blong talem long Isrel se: “Yufala i mas singaot olgeta man wetem ol woman oli kam wanples . . . blong olgeta evriwan oli save harem tok ya, mo blong oli save lanem fasin ya blong ona long Hae God.” (Dut. 31:12) Jeova i yusum slef we i stret mo waes blong wokem wan spesel program blong tijim yumi evri dei long asembli ya. Hem i stap tijim yumi blong ‘givhan long yumi,’ taswe yumi no mas mestem ol tijing ya. (Aes. 48:17) Taem yu askem spel long masta blong yu, i gud yu folem eksampol blong Nehemaea we hem i gat strong tingting. Prea long Jeova, nao go luk masta blong yu. (Neh. 1:11; 2:4) Mo tu, i gud yu talem naoia long ol famle blong yu we oli no stap long trutok, wanem ol plan blong yu long saed blong asembli ya. Hemia i soemaot lav long olgeta.
3 Spesel Nid: Aposol Pol i talem long ol kongregesen long Galesia se ‘oli mas mekem i gud long olgeta man. Antap moa, oli mas mekem olsem long olgeta ya we oli brata mo sista blong olgeta.’ (Gal. 6:10) Ating i gat sam olfala brata sista, samfala we oli sik, sam mama we oli no gat man blong olgeta, mo sam paenia, we i hadwok long olgeta blong go long asembli ya, be ating oli no talemaot long wan man. ?Olsem wanem? ?Yu yu naf blong givhan long olgeta mo “mekem i gud” long olgeta? Ol famle blong olgeta ya, sipos we oli stap long trutok, wetem ol elda tu, olgeta nao oli mas ol faswan blong traem givhan long olgeta.
4 Klosap 2,500 yia i pas, long wan asembli blong ol man blong Jeova, Esra mo ol narafala Livaet oli ridim mo eksplenem Tok blong God long ol man. ?Wanem i kamaot from? Nehemaea 8:12 i talem se, “olgeta evriwan oli gohom . . . oli glad we oli glad from we oli haremsave ol tok ya we pris ya Esra i ridimaot i go long olgeta.” ?Olsem wanem? ?Yumi glad taem tabu grup ya we i olsem slef, i mekem olsem Esra mo ol Livaet, nao i ridimaot Tok blong God, i eksplenem mining blong hem, mo i soem olsem wanem yumi save folem tok ya long laef blong yumi? Taem slef ya i mekem olsem, hem i soemaot semfala lav mo kea we Jeova i soem long ol man blong Hem. !Yu mas mekemap tingting blong yu naoia blong no mestem wan dei blong Distrik Asembli ya “Wokbaot Wetem God”!
[Bokis blong pija long pej 3]
Taem Blong Program
Fraede mo Sarede
9:30 moning - 5:10 aftenun
Sande
9:30 moning - 4:05 aftenun