2002 Distrik Asembli Blong Ol Witnes Blong Jeova “Ol Man Blong Talemaot Kingdom We Oli Wok Strong”
1 “Taem ol man oli talem long mi se, ‘Yumi go long haos blong Hae God,’ mi mi glad tumas.” (Sam 122:1) Taem yumi lukluk gud tok ya blong man blong raetem Ol Sam, yumi makem (1) filing blong hem taem oli singaotem hem blong joen wetem ol narafala blong wosip long Jeova, (2) ol gudfala fren we hem i gat, we olgeta tu oli rili intres long trufala wosip, mo (3) plan we oli gat blong singaotem ol narafala man, blong karem olgeta oli kam wanples, mo blong wokbaot i go long haos blong God.
2 Ol tok ya blong man blong raetem Ol Sam oli soemaot prapa filing blong yumi taem yumi harem plan blong nekis distrik asembli blong yumi. Taem yumi tingbaot glad we yumi kasem long ol asembli we oli pas finis, mo se bambae yumi joen wanples bakegen wetem ol narafala man we oli laekem Jeova, ale yumi wantem tumas se taem ya i kam kwik. Oli mekem rere plan finis blong Distrik Asembli blong yia ya long Niukaledoni mo Vanuatu. Hem i blong tri dei mo stamba tok blong hem se “Ol Man Blong Talemaot Kingdom We Oli Wok Strong.” Naoia hem i taem blong yumi mekem plan blong stap long asembli ya mo harem gud fulwan long ol kakae long saed blong spirit we i stap wet long yumi.
3 Long yia ya, long Vanuatu, Distrik Asembli “Ol Man Blong Talemaot Kingdom We Oli Wok Strong” bambae i stap long Port Vila long Ogis 23 kasem 25 mo long Niukaledoni, long haos asembli blong Normandie long Septemba 6 kasem 8, mo 13 kasem 15. Long Fraede mo Sarede, asembli bambae i stat long haf pas 9 long moning mo i finis long 5 klok long aftenun, mo long Sande hem i stat long haf pas 9 long moning mo i finis long 4 klok long aftenun. Long Walis tu, Sosaeti i mekem plan blong holem wan asembli blong tu dei long Oktoba 5 mo 6, 2002. ?From we naoia yumi save long olgeta plan ya, wanem samting yumi wan i save mekem blong rere from asembli ya?
4 Mekem Plan Naoia Blong Stap Long Trifala Dei: ?Yu yu nidim blong askem long bos blong yu long wok, sam dei blong spel, blong yu save stap long asembli ya? Jeova i kasem save se samfala bos oli “strong tumas.” (1 Pita 2:18) Be ol asembli blong yumi oli impoten tumas, mo yumi mas mekem wan bigfala traehad blong stap long ful asembli. Kam klosap long Jeova long prea blong tokbaot bisnes ya, askem hem blong i lidim yu long rod we bambae i karem gudfala frut.—Neham 2:4.
5 Glad Blong Volontia: Long taem blong asembli, plante handred volontia oli wok blong mekem olgeta samting i ron gud. Ol man blong welkam oli lidim ol man oli go long jea we oli save sidaon long hem blong lesin, mo oli lukaot long ol trak we oli stap long ples blong paking. Grup we oli stap klinim ples oli gat janis blong holemtaet gudnem we yumi gat finis from klin fasin, taem oli lego ples we yumi yusum blong wosip i stap klin moa i bitim fastaem. ?Yumi save givhan long wan long ol grup ya blong wok? ?Bambae yu yu glad blong wok wetem ol brata blong yu olsem we “solda blong [yu] i joen long solda blong narawan”?—Sef. 3:9, NW.
6 Yumi mas soemaot sem tingting olsem King Deved we i glad blong go long haos wosip blong Jeova. Ol distrik asembli oli wan stamba ples we yumi kasem kakae long saed blong spirit, mo wan nambawan janis blong yumi joen mo soemaot lav long ol narafala brata mo sista. !Taswe, wetem glad, mifala i singaotem yu blong yu mekem plan naoia blong stap long olgeta haf blong trifala dei asembli blong yia ya “Ol Man Blong Talemaot Kingdom We Oli Wok Strong”!