1999 “Profet Tok We i Kamaot Long God” Distrik Asembli blong ol Witnes blong Jeova
1 Taem ol man Isrel oli stap long draeples, Jeova i talem long Moses blong wokem tu trampet long silva. Sipos wan man i blu long wan long tufala trampet ya, ol jif blong Isrel oli mas hivap fored long haos tapolen blong mekem miting. Be sipos ol man Isrel oli harem bigfala noes blong tufala trampet ya wantaem, olgeta evriwan oli mas kam wanples. (Nam. 10:1-4) Tede, yumi glad tumas taem yumi harem tok we i singaot yumi blong go long ol distrik asembli blong yumi evri yia. Long ol asembli ya yumi kasem sam niufala advaes tru long Baebol mo tru long ol tok blong ol defren elda we oli save lidim laef blong yumi. Samting ya i halpem yumi blong gohed strong long wok blong God. !Yumi glad tumas blong luk plante taosen man blong God oli joen wanples long pis mo lav!—Sam 122:1, 7, 8.
2 Long Ogis kasem Septemba 1998, i bin gat tri Distrik mo Intenasnal Asembli long Nouméa mo Vila, we stamba tok blong hem: “Fasin Blong Laef We God i Glad Long Hem”. I bin gat sam narafala asembli olsem raon long wol we sam long olgeta oli ol Intenasnal asembli. Sam famle long Kanada mo Ostrelya oli welkamem bitim 100 brata mo sista blong Nouméa mo Vanuatu, mo plante narafala oli kam long ol kantri raon long wol. Long ol asembli ya ol brata mo sista oli storeyan tugeta mo soemaot lav blong olgeta nating se oli toktok ol defren lanwis. Ol misinari mo ol brata we oli wok blong bildim ol haos blong sosaeti oli gobak long kantri blong olgeta blong stap long ol asembli ya. Taem oli stap long taem ya, oli leftemap tingting blong evriwan.
3 Wan narafala impoten samting we i hapen long Branj blong yumi, hemia dedikesen blong niufala Haos Asembli mo niufala Betel blong Nouméa. Yumi glad tumas blong harem tok blong dedikesen we brata Lloyd Barry i givim, mo tu narafala tok we hem i givim long nekis dei we hem i Spesel Dei Asembli. Ol famle we oli welkamem ol brata blong narafala kantri i kam long haos blong olgeta, oli kasem ol nambawan ekspiryens we i leftemap tingting blong olgeta. Taem yumi kam wanples long 1999 Distrik Asembli blong yumi, bambae yumi gat jans blong haremgud bakegen from nambawan kampani blong ol brata mo sista, mo blong talem tangkiu long Jeova from fasin ya blong joengud tugeta.
4 Long 1999, bambae yumi gat Distrik Asembli blong yumi long Luganville (Santo) long Ogis 20-22. Nating se yumi gat plan blong mekem Distrik Asembli ya long Haos Kingdom blong Luganville, ples mo dei blong asembli ya i save jenis. Ol kongregesen blong Vanuatu bambae oli kasem moa mesej long saed ya. Long Niukaledonia, bambae yumi gat tu Distrik asembli long Haos Asembli blong Normandie long Septemba 3-5 mo Septemba 10-12, 1999. Ol kongregesen bambae oli kasem mesej blong save se bambae oli go long weswan asembli.
5 Mifala i leftemap tingting blong evriwan blong mekem plan naoia blong stap long trifala dei blong 1999 Distrik Asembli ya, “Profet Tok We i Kamaot Long God”. Mifala i glad blong wet mo harem wetem yufala, “bigfala singsing blong presem God” we bambae i kamaot long bigfala kampani we i wosipim Jeova. (Sam 42:4) !Jeova bambae i blesem ol plan ya blong mekem se yumi gohedgud long saed blong spirit!
[Tok blong pija long pej 3]
Aoa blong program
Fraede mo Sarede
9:30 moning – 5:00 aftenun
Sande
9:30 moning – 4:00 aftenun