2003 Distrik Asembli Blong Ol Witnes Blong Jeova “Leftemap Nem Blong God”
1 Jeova i yusum profet blong hem Aesea, blong talemaot oda ya se: ‘!Ol man blong mi! !Yufala i lesin long mi! Yufala i lesin gud long ol tok blong mi! Ol loa blong mi bambae i goaot, i go kasem ol man blong ol narafala kantri.’ (Aes. 51:4) Yumi laef long taem we en i klosap tumas. Taswe i impoten moa naoia blong lesin long ol loa blong Jeova i bitim bifo. ?Yu yu agri long samting ya? Wan rod blong “lesin” long Jeova hemia taem yumi obei long loa blong hem blong kam wanples blong wosip. !Yumi wantem tumas blong tekem spesel janis bakegen blong kam wanples long distrik asembli blong yia ya! Long teritori we Branj ofis blong yumi i lukaot long hem, faswan asembli bambae i stap long Vanuatu long Ogis 22-24, biaen bambae hem i stap long Niukaledoni long Septemba 12-14, mo Septemba 19-21, mo laswan hemia long Walis mo Futuna long Oktoba 4-5.
2 Wajtaoa blong Julae 1, 2002 i soemaot se i gat sam intenasnal asembli tu we bambae oli gohed long sam kantri we Sosaeti i jusum. Raon long wol i gat ol grup blong brata sista we bambae oli go long ol intenasnal asembli ya. Maet yumi no naf blong go long wan long ol asembli ya. Be bambae yumi faenem sem tingting mo spirit i stap long ol distrik asembli tu. ?Yumi save mekem wanem blong harem gud fulwan long ol plan blong asembli ya we i stap gohed naoia?
3 Stap Long Olgeta Dei Blong Asembli Ya: Yumi save harem gud fulwan long ol advaes we slef we i stret mo waes i givim sipos yumi meksua se yumi folem fulwan program blong asembli ya. (Mat. 24:45) ?Yu yu nidim blong askem bos blong yu blong karem dei blong spel blong no mestem wan dei blong asembli ya? Bifo we Nehemaea i askem King Ataksekses blong letem hem i gobak long Jerusalem blong bildim stonwol blong taon ya, hem i “prea long God blong heven.” (Neh. 2:4) Long sem fasin, yu yu save prea long Jeova blong hem i givim strong tingting long yu blong askem bos blong yu blong letem yu yu stap long ol trifala dei blong asembli ya. ?Olsem wanem sipos bos blong yu i no wantem letem yu yu tekem spel blong yu? Maet yu save eksplenem long hem se ol tok long ol asembli blong yumi oli halpem yumi blong gat ol gudfala fasin olsem fasin blong no stil mo no giaman, fasin blong wok strong long wok blong yumi, mo ol fasin we i mekem se narafala i save trastem yumi. Samting olsem maet i mekem we bos i jenisim tingting blong hem. Mo tu, sipos yumi gat sam famle we oli no stap long trutok, yumi soem lav long olgeta sipos yumi stat naoia blong talem long olgeta wanem ol plan blong yumi blong go long asembli.
4 Halpem Olgeta We Oli Gat Sam Spesel Nid: ?I gat sam long kongregesen blong yufala we maet oli nidim help blong go long asembli? Ol olfala no olgeta we oli sik, ating bambae oli kasem help fastaem long Kristin famle blong olgeta. Be ol elda mo ol narafala brata sista we oli save long nid blong olgeta ya maet oli save givhan tu wetem lav.
5 Sekretari blong kongregesen bambae i lukluk bakegen long olgeta pepa we ol pablisa oli fulumap blong askem ples blong slip. Afta we ol pablisa oli fulumap pepa ya, sekretari i mas saenem mo sanem i go long ol brata we oli lukaot rum. Help ya i blong ol pablisa ya nomo we oli gat gudnem long kongregesen, mo pikinini blong olgeta tu we oli gat gudfala fasin. Sipos wan pablisa no wan memba blong famle we i stap long pepa ya i gat sam fasin we i no klia, ating i gud we fastaem, tu brata long sevis komiti tufala i givim advaes blong stretem bisnes ya.
6 Yumi Stap Stanap Long Fes Blong Olgeta Man: ?Ol man oli luksave se ol Witnes Blong Jeova oli defren long ol man blong wol ya? !Yes oli luksave klia nomo! Plante taem ol man oli tokbaot fasin we ol witnes oli gat long taem blong ol distrik asembli, se oli wokgud tugeta mo oli kaen. Ol tok olsem oli givhan long yumi blong luksave tru se “waes we i kam long heven” i save gat paoa long fasin blong yumi. (Jem. 3:17) Yumi mas tingbaot se i ‘olsem we yumi stap stanap long fes blong olgeta man blong wol,’ nao oli stap wajem yumi. Taswe, i gud we oltaem ol fasin blong yumi oli leftemap hae nem blong God blong yumi Jeova, mo oli soemaot se hem i naes tumas.—1 Kor. 4:9.
7 “Wol ya wetem ol fasin blong hem, bambae i no longtaem hem i lus,” taswe yumi nidim ol distrik asembli blong wekemap yumi mo halpem yumi blong putum tingting blong yumi i stap stret long ol samting blong spirit. (1 Kor. 7:31) I tru, yumi mas spenem taem mo traehad blong mekem ol plan blong stap long evri dei blong asembli, be bambae yumi no save sore nating. Distrik Asembli blong yia ya we nem blong hem “Leftemap Nem Blong God” i blong halpem yumi blong stanap strong gogo kasem taem we Jeova i mekem jajmen blong hem i kamtru long wol ya blong Setan. I gud sipos yumi no letem wan samting i blokem yumi blong kasem ol kakae ya we Jeova i rerem blong yumi.—Aes. 51:4, 5.
[Bokis blong pija long pej 3]
Taem Blong Program
Fraede Mo Sarede 9:30 moning – 5:00 aftenun
Sande 9:30 moning – 4:05 aftenun