Kakae Blong Spirit Long Stret Taem Blong Hem
1. ?Olsem wanem Esikel 36:29 i stap kamtru tede?
1 Haefala Masta blong heven mo wol, Jeova, hem i se: “Mi bambae mi . . . mekem ol kakae blong yufala i kam plante we plante, we bambae yufala i no moa save sot long kakae.” (Esik. 36:29) Profet tok ya i stret long ol man blong God tede. I olsem we Jeova i mekem kakae blong ol man blong hem i gru, i plante we i plante. Ol gudfala kakae long saed blong spirit we yumi kasem long ol distrik asembli long stret taem blong hem, i soemaot samting ya.
2. ?Olsem wanem Jeova God i yusum ol distrik asembli long ol yia we oli pas blong givim kakae long stret taem blong hem?
2 Long yia 1931, long wan distrik asembli long Columbus, Ohio, Jeova i pulum ol man blong hem blong tekem wan niufala nem—ol Witnes blong Jeova. (Aes. 43:10-12) Long yia 1935, oli bin luksave hu nao bigfala kampani we Revelesen 7:9-17 i tokbaot. Long yia 1942, Brata Knorr i givim tok ya “?Pis i Save Stap Longtaem?” Tok ya i mekem se wok blong prij raon long wol i spid moa, mo biaen, oli stanemap Wajtaoa Baebol Skul blong Gilead. I tru se yumi rimemba moa sam asembli i bitim ol narawan. Be olgeta asembli evriwan oli olsem wan bigfala tebol blong gudfala kakae long saed blong spirit we yumi kasem long stret taem blong hem.—Sam 23:5; Mat. 24:45.
3. ?Yumi mas mekem wanem blong kasem ol gudfala kakae long saed blong spirit long distrik asembli blong yumi?
3 ?Yu Yu Stap Kakae Gud? Maet fulap kakae i stap fored long yumi, be sipos yumi no tekem kakae ya, bodi blong yumi i no save kasem ol gudfala samting long hem. (Prov. 26:15) Sem mak long saed blong spirit. Sam samtaem long asembli, taem program i stap gohed, plante man lelebet oli stap wokbaot, no maet oli stap storian wetem narafala. I tru se wan impoten haf blong asembli i blong storian mo kampani wetem ol narafala, be stret taem blong mekem samting ya, hemia bifo mo afta long program. (Pri. 3:1, 7) Sipos yumi no stap sidaon mo lesingud taem program i stap gohed, maet yumi mestem wan poen we i impoten tumas. I moagud we olgeta long famle oli sidaon wanples, i bitim we ol yangfala oli go sidaon narafala ples wetem ol yangfala bakegen. Maet wanwan taem ol brata we oli lukaot long ol wok blong asembli mo ol brata we oli givhan long olgeta oli mas tokbaot wan samting long saed blong asembli taem program i stap gohed. Long ol narafala taem, olgeta ya tu oli mas givim wan gudfala eksampol mo lesingud long ol tok. I gud we yumi ofem ol mobael fon blong oli no mekenoes taem yumi stap lesin. Yumi no mas mestem wan haf nating blong ol kakae ya long saed blong spirit.—1 Kor. 10:12; Fil. 2:12.
4. ?Olsem wanem yumi save soem tangkiu from fulap kakae long saed blong spirit we Jeova i givim?
4 !Yumi haremgud tumas blong kasem ol nambawan trutok long saed blong spirit we Jeova i givimaot! !Oli defren olgeta long ol giaman tijing blong Krisendom, we i olsem kakae we i drae finis mo i no save givhan nating long ol man! (Aes. 65:13, 14) Wan samting we yumi save mekem blong “talem tangkiu long God,” se yumi save tingbaot asembli ya olsem wan janis blong letem Jeova i tijim yumi. (Kol. 3:15) Yumi no mas ting se ol save i stap kamaot long brata we i givim tok nomo, be yumi mas luksave se tok ya i stap kamaot long “Bigfala Tija” blong yumi. (Aes. 30:20, 21, NW; 54:13) Lesin gud. Raetemdaon ol stamba poen blong asembli. Tekem smoltaem evri naet blong tingtingbak long ol save we yu kasem long dei ya. Mo mekem samting we yu lanem i wok long laef blong yu.
5. ?Wanem samting long saed blong ol distrik asembli we i mekem yumi glad tumas?
5 !Evri asembli we yumi mekem bifo long Amagedon, oli pruvum se yumi stap winim Setan, nating se yumi mekem asembli ya long wan kamp blong refuji, long wan kantri we bigfala faet i stap gohed long hem, no long wan bigfala haos asembli long wan ples we i kwaet nomo! From we yumi joen olsem wan brata nomo long fulwol, yumi tinghae long evri janis we yumi gat blong joen wanples long ol distrik asembli. (Esik. 36:38) Yumi gat strong tingting se long yia ya bakegen, Jeova we i lavem yumi bambae i givim ‘kakae long yumi long stret taem blong hem.’—Luk 12:42.
[Bokis blong pija long pej 4]
Soem Tangkiu From Kakae Long Tebol Blong Jeova
◼ Lesin gud
◼ Raetemdaon ol stamba poen
◼ Tingtingbak long program evri naet
◼ Samting we yu lanem, mekem i wok long laef blong yu