Spesel Plan Blong Seremaot Niufala Buklet
1 Plante man tede oli harem nogud from ol trabol long wol. Be smol man nomo oli kasem save from wanem ol samting ya oli hapen, wanem samting bambae i kamaot long fiuja, mo wanem samting oli mas mekem blong oli save stap laef long taem blong jajem man we i stap kam. (Esik. 9:4) Blong givhan long olgeta blong kasem save long mining blong taem we yumi stap laef long hem tede, bambae i gat wan spesel plan blong seremaot niufala buklet ya Keep on the Watch! Spesel plan blong seremaot buklet ya bambae i stat long Mande Oktoba 18, go kasem Sande, Novemba 14.
2 Yumi save seremaot buklet ya taem yumi prij long ol haos wanwan, taem yumi gobak blong visitim ol man, taem yumi tekem janis blong prij, mo taem yumi prij long ol pablik ples. Be yumi no mas givimaot buklet ya Keep on the Watch! long enikaen man. Yumi mas lego buklet ya nomo long olgeta we oli rili soemaot intres long tok we Baebol i talem long saed blong mining blong ol samting we i stap kamaot long wol. Maet yumi save givimaot wan traket long olgeta we oli soem smol intres nomo long tok blong yumi.
3 Maet yu save pulum intres blong man taem yu talem se:
◼ “Plante man oli wari long saed blong ol bigfala problem we oli kamaot tede mo ol trabol we i mekem man i sek. [Tokbaot wan trabol no problem we i kamaot long ples blong yu.] ?Yu yu save se Baebol i bin tokbaot ol trabol ya? [Letem man i ansa. Biaen ridim wan vas we i laenap wetem problem we yu tokbaot, olsem Matiu 24:3, 7, 8; Luk 21:7, 10, 11; no 2 Timoti 3:1-5.] Baebol i talemaot mining blong ol samting we i stap hapen long taem blong yumi, mo wanem samting we bambae i kamaot long ol man long fiuja. ?Yu yu wantem save moa long saed ya? [Letem man i ansa. Soemaot buklet sipos man i intres.] Yu save kasem buklet ya we yu no pem. Sipos yu wantem givim smol presen blong givhan long wok blong mifala long ful wol, mifala i glad blong akseptem presen ya.”
4 Sipos no, maet yu faenem se rod ya i moa gud:
◼ “Plante man tede oli harem nogud tumas long ol bigfala trabol we i stap kamaot long wol mo ol trabol we olgeta wanwan oli kasem. Samfala oli stap tingting se from wanem God i no blokem ol samting olsem. Baebol i talem long yumi se i no longtaem God bambae i tekemaot ol samting we oli stap mekem ol man long wol ya oli safa. Makemgud wanem gudfala samting we bambae God i mekem long ol man. [Ridim Ol Sam 37:10, 11.] ?Yu yu wantem save moa?” Finisim tok blong yu olsem laswan haf antap i talem.
5 Traem kasem nem mo adres blong ol wanwan man we oli karem buklet, mo mekem rod blong gobak blong mekem intres blong olgeta i gru. Ol advaes blong save olsem wanem blong mekem visit bakegen, bambae i kamaot long Kingdom Wok Blong Yumi long manis Novemba 2004. Sipos wan man i soemaot trufala intres taem yu prij long hem, yu save statem Baebol stadi long sem taem, wetem Keep on the Watch! buklet no wetem wan narafala buk olsem buklet ya Wanem.
6 Afta we oli tokbaot haf ya long Miting blong Kingdom Wok, bambae yu save kasem sam kopi blong niufala buklet ya. I gud se ol pablisa mo ol paenia oli mas karem ol buklet we oli naf nomo blong seremaot long ol faswan dei blong spesel wok ya. Yumi prea se Jeova bambae i blesem spesel wok ya we i presem nem blong hem, mo we i save mekem ol man long olgeta ples blong wol we hat blong olgeta i stret, oli haremgud.—Sam 90:17.