!Wok Wetem Tingting Ya Se Taem i Sot!
1 Jisas i save se hem i gat smol taem nomo blong mekem wok blong papa blong hem long wol. (Jon 9:4) Taswe, hem i prij wetem tingting ya se taem i sot, mo hem i trenem ol disaepol blong hem blong oli mekem sem mak. (Luk 4:42-44; 8:1; 10:2-4) Ol samting long saed blong bodi we i save mekem hem i harem gud, oli stap long seken ples long laef blong hem. (Mat. 8:20) From samting ya, hem i naf blong finisim wok we Jeova i talem long hem blong mekem.—Jon 17:4.
2 Taem i Sot: Taem we yumi gat blong talemaot gud nius long “olgeta ples long wol” i sot. (Mat. 24:14) Ol profet tok blong Baebol oli soemaot se yumi stap long en olgeta blong ol lasdei. Klosap nao, ‘olgeta we oli no save ona long God, mo olgeta we oli no save obei long gud nius blong Jisas, Masta blong yumi, bambae oli kasem panis we i no save finis samtaem.’ (2 Tes. 1:6-9) Taem ya blong jajem ol man bambae i kamtru wantaem nomo we ol man bambae oli sek long hem. (Luk 21:34, 35; 1 Tes. 5:2, 3) Ol man oli mas kasem save se oli stap long denja. Hemia wok blong yumi nao blong givhan long olgeta blong faenem rod blong mekem Jeova i glad, long smol taem we i stap yet.—Sef. 2:2, 3.
3 Mekem Evri Samting We Yumi Naf Blong Mekem: Ol man blong wok blong God oli luksave se i “no gat plante taem i stap,” taswe oli putum wok blong prij i stap long fas ples long laef blong olgeta. (1 Kor. 7:29-31; Mat. 6:33) Samfala oli lego ol wok we oli save kasem bigfala mane from no sam narafala samting we olgeta nomo oli wantem, blong oli save gat moa taem long wok blong prij. (Mak 10:29, 30) Sam narafala, nating we oli kasem plante traem, be oltaem oli “wok strong long ol wok ya blong Masta blong yumi.” (1 Kor. 15:58) Plante long olgeta oli mekem wok ya blong talemaot gud nius i bitim 20, 30, 40 yia finis we oli no stop. (Hib. 10:23) Jeova i tinghae long yumi taem yumi lego ol samting we yumi nomo i wantem, blong sapotem wok blong Kingdom.—Hib. 6:10.
4 Taem yumi mekem wosip blong Jeova i kam bigfala samting long laef blong yumi, wetem wok ya tu blong talemaot gud nius, hemia i halpem yumi blong tingbaot dei blong Jeova oltaem. Hem i lukaot gud long yumi tu blong wol blong Setan i no pulum yumi, mo i mekem tingting blong yumi i strong blong holemtaet ol klin fasin. (2 Pita 3:11-14) Yes, taem yumi mekem wok blong talemaot gud nius wetem tingting ya se taem i sot, bambae yumi save sevem yumi wan, wetem olgeta we oli lesin long yumi.—1 Tim. 4:16.