Ol Manis Bifo Mo Afta Long Memoriol—Wan Taem Blong Prij Moa
1. ?‘Ol dei blong lafet blong God’ oli gat wanem paoa long ol man Isrel we oli onagud long hem?
1 Jeova i jusumaot sam stret taem evri yia we ol man Isrel oli mas ‘holem ol dei blong lafet blong hem.’ (Lev. 23:2) Taem oli tingbaot ol gudfala fasin blong God blong olgeta, oli kasem bigfala glad, mo oli harem se oli wantem wok strong moa blong leftemap trufala wosip.—2 Kron. 30:21–31:2.
2, 3. ?From wanem i stret we yumi mekem moa wok long saed blong spirit long ol manis bifo mo afta long Memoriol, mo wanem stret dei we bambae yumi mekem Memoriol?
2 Tede, long evri yia, taem yumi kasem ol manis bifo mo afta long Memoriol, yumi glad blong wok strong moa blong mekem ol gudfala tiokratik wok. Hemia i wan taem we yumi tingting dip long nambawan sas presen we Jeova i givim blong sevem yumi—Pikinini blong hem, wan nomo we hem i gat. (Jon 3:16; 1 Pita 1:18, 19) Taem yumi tingting dip long lav we God mo Pikinini blong hem tufala i soemaot, yumi harem se yumi mas presem Jeova mo yumi mas traehad moa blong mekem samting we hem i wantem.—2 Kor. 5:14, 15.
3 Long yia ya, bambae yumi tingbaot ded blong Kraes long Tasde Maj 24, afta we san i godaon. ?Olsem wanem yumi save prij moa long manis Maj, Epril, mo Mei?
4, 5. (a) ?Wanem samting i givhan long samfala blong oli kasem plante moa man wetem gud nius? (b) ?Yu yu luk se wanem rod i karem moa frut long ples blong yu?
4 Kasem Moa Man: Traem lukaot ol rod blong faenem plante moa man we yu save prij long olgeta. ?Yu yu save mekem plan blong joen long wok blong prij long ol haos wanwan taem ol man oli stap long haos blong olgeta, olsem long let aftenun no long sapa? Sipos samfala long buk stadi blong yufala oli wantem prij bifo long buk stadi, maet brata we i lukaot long buk stadi i save mekem plan blong i gat wan smol miting blong prij mo wan teritori klosap.
5 Wan narafala rod blong kasem plante moa man, hemia blong prij long ol pablik ples. Nating se wan sista long Japan i wok ful dei, be hem i wantem kam wan haftaem paenia. Wan elda i givim advaes long hem se evri dei, bifo we hem i go wok, hem i save prij long rod klosap long wan stesen blong tren. Afta we sista ya i winim sem blong hem mo i no moa harem nogud long ol tok we ol man blong tren oli sakem blong jikim hem, hem i mekem rod magasin wetem samwe 40 man, sam long olgeta oli stap tekem tren evri dei, samfala oli wok long stesen blong tren, mo sam man stoa blong olgeta i stap klosap. Plante taem, hem i seremaot 235 magasin long wan manis. From we evri dei sista ya i tekem smol taem blong tokbaot Baebol wetem ol man, hem i statem sikis Baebol stadi.
6. ?Olsem wanem ol yangfala oli save mekem moa wok long saed blong spirit?
6 Gudfala Taem Blong Prij: Plante pablisa we oli stap skul yet oli gat ol taem blong spel long wan yia. Hemia i gudfala taem blong oli mekem wok blong haftaem paenia. Antap moa, ol yangfala Kristin oli save mekem moa wok taem oli prij long skul. Maet yu sapraes blong luk se ol fren blong yu long skul oli wantem save moa long ol bilif blong yu. ?Taem yufala evriwan long klas i mas tokbaot wan samting tugeta no taem yu mas raetem wan ripot, from wanem yu no tekem janis ya blong prij? Sam yangfala oli mekem olsem taem oli yusum ol vidio kaset blong yumi. Samfala oli statem Baebol stadi wetem sam fren blong olgeta long skul mo oli halpem olgeta blong oli gohed gogo kasem we oli givim laef blong olgeta i go long God mo tekem baptaes. Hemia ol nambawan rod blong “presem nem blong [Jeova].”—Sam 148:12, 13.
7. (a) ?Olsem wanem wan brata i tekem janis blong prij long ol narafala? (b) ?Yu yu gat wan ekspiriens we i klosap sem mak?
7 Long wok blong yu evri dei, traem faenem rod blong tokbaot gudfala God blong yumi mo ol nambawan promes blong hem. Wan brata we i tekem semfala tren evri dei, i prij long ol narafala long tren taem hem i luk se i stret blong mekem olsem. Olsem nao, evri dei, taem brata ya i stap wet long stesen blong tren, hem i tekem klosap faef menet blong prij long wan yangfala man. Frut we i kamaot se yangfala man ya wetem wan fren blong hem tufala i agri blong stadi Baebol. Oli stadi Baebol tugeta long tren nomo taem oli stap ron i go long wok. Sam taem biaen, wan olfala woman we i bin stap lesin long storian blong olgeta, i kam askem long brata ya sipos hem i save mekem Baebol stadi blong hem tu. Naoia, olfala woman ya i glad blong stadi long ol dei we hem i stap ron long tren. Long rod ya, brata ya i stadi wetem ten defren man taem hem i stap ron long tren.
8. ?Olgeta we oli olfala no oli gat problem long saed blong helt oli save yusum wanem rod blong prij moa?
8 ?Be olsem wanem nao sipos yu naf blong mekem smol wok nomo from we yu olfala no yu gat problem long saed blong helt? I gat sam rod yet i stap blong yu save presem Jeova moa. ?Yu yu traem finis blong yusum telefon blong prij? Sipos yu no suagud olsem wanem blong mekem, yu save toktok long elda we i lukaot long buk stadi blong yu. Ating elda ya i save askem sam pablisa we oli yusum rod ya finis blong oli soem long yu. Taem yufala i wok tugeta, yu save lanem plante samting from olgeta mo yufala i save givgivhan long yufala blong prij long fasin we i karem frut.
9. ?Olsem wanem yumi save givhan long ol Baebol studen blong oli kam naf blong joen long wok blong prij wetem kongregesen?
9 Taem ol niuwan oli kam long Memoriol, hemia i save mekem se oli wantem presem Jeova moa. Sipos oli fraet blong prij, yu save givhan long olgeta blong winim fraet ya taem yu tokbaot ol gudfala samting we oli kamaot long wok blong prij mo taem yu trenem olgeta sloslo blong oli eksplenem ol tijing blong Baebol mo blong oli save givim ansa long olgeta we oli tok agens. (1 Pita 3:15) Sipos wan Baebol studen i talem se hem i wantem joen long wok blong talemaot gud nius, yu mas go luk presiden elda. Bambae hem i mekem plan blong oli mit wetem studen ya blong luk sipos hem i naf blong joen long wok blong prij wetem kongregesen. !Hemia i wan bigfala glad long Jeova blong luk se ol niuwan oli sapotem hae rul blong Hem long heven mo wol!—Prov. 27:11.
10. (a) ?Olsem wanem wan gudfala program i save halpem yumi blong yumi haftaem paenia? (b) ?Long ol manis bifo mo afta Memoriol las yia, yu yu bin mekem wok blong haftaem paenia? ?Yu bin folem wanem program?
10 ?Yu Yu Save Mekem Wok Blong Haftaem Paenia? Yumi mas tinghevi long mak blong 50 aoa we ol haftaem paenia oli mas kasem long wan manis. (Mat. 5:37) Hemia i min se yu mas mekem plan blong spenem klosap 12 aoa evri wik long wok blong prij. ?Olsem wanem? ?Wan long ol program blong haftaem paenia long pej 5 i stret long yu? Sipos no, ?yu save mekem wan narafala program we bambae i givhan long yu blong yu haftaem paenia long manis Maj, Epril, no Mei? Askem long Jeova blong i blesem ol traehad blong yu taem yu wantem prij moa.—Prov. 16:3.
11. ?Olsem wanem ol elda mo ol man blong givhan oli save sapotem olgeta we oli mekem wok blong haftaem paenia?
11 Ol elda mo ol man blong givhan bambae oli sapotem fulwan ol traehad blong yu blong mekem Memoriol ya i kam wan taem blong givim spesel ona i go long Jeova. Maet plante long olgeta tu bambae oli haftaem paenia. Bambae ol elda oli mekem plan blong gat sam moa miting blong prij, olsem long let aftenun, long sapa long ol dei blong wik, mo long ol wiken tu, sipos i nidim. Blong jusumaot se ol miting ya bambae oli stat wetaem mo oli stap long weples mo hu bambae i lidim, ol elda oli save toktok long olgeta we oli plan finis blong paenia no olgeta we oli gat tingting blong mekem wok ya. Bambae ol elda oli traehad blong mekem plan blong ol narafala pablisa oli save wok wetem yu long ol dei mo taem we yu yu plan blong prij long hem. Long rod ya, ol plan oli save stanap strong mo gudfala wok i save kamaot from.—Prov. 20:18.
12. ?Wanem i pusum yumi blong presem Jeova oltaem?
12 Mekem Bes Blong Yu: Sipos yu yu no naf blong mekem wok blong haftaem paenia, yu mas tingbaot se Jeova i glad long ol traehad mo ol sakrefaes blong yumi, folem ‘ol samting we yu yu gat, i no ol samting we yu yu no gat.’ (2 Kor. 8:12) Yumi gat plante samting we yumi save talem tangkiu long Jeova from. Deved i gat gudfala risen blong raetem se: “Oltaem mi bambae mi talem tangkiu long Hae God, bambae mi presem hem oltaem nomo.” (Sam 34:1) I gud we hemia i tingting blong yumi tu long ol manis bifo mo afta long Memoriol.
[Bokis blong pija long pej 3]
?Olsem Wanem Yu Save Prij Moa?
◼ Prij long taem we ol man oli stap long haos blong olgeta
◼ Prij long ol pablik ples
◼ Prij long ples blong wok no long skul
◼ Yusum telefon blong prij
◼ Mekem wok blong haftaem paenia
[Tok blong pija long pej 5]
Program Blong Ol Haftaem Paenia—Rod Blong Kasem 12 Aoa Evri Wik Long Wok Blong Prij
Moning—Mande Kasem Sarede
Yufala i save jenisim eniwan long ol dei ya wetem Sande
Dei Taem Aoa
Mande Moning 2
Tusde Moning 2
Wenesde Moning 2
Tasde Moning 2
Fraede Moning 2
Sarede Moning 2
Total Aoa: 12
Tu Ful Dei
Yufala i save jusum tu dei blong wik. (I dipen long dei we yufala i jusum, be sipos yufala i folem program ya, maet bambae yufala i kasem 48 aoa nomo long wan manis.)
Dei Taem Aoa
Wenesde Ful Dei 6
Sarede Ful Dei 6
Total Aoa: 12
Tu Sapa Mo Wiken
Yufala i save jusum tu sapa long wik.
Dei Taem Aoa
Mande Sapa 1 1/2
Wenesde Sapa 1 1/2
Sarede Ful Dei 6
Sande Haf Dei 3
Total Aoa: 12
Tri Aftenun Mo Sarede
Yufala i save jenisim eniwan long ol dei ya wetem Sande.
Dei Taem Aoa
Mande Aftenun 2
Wenesde Aftenun 2
Fraede Aftenun 2
Sarede Ful Dei 6
Total Aoa: 12
Program Blong Mi Blong Wok Blong Prij
Yufala i save jusum ol aoa blong ol wanwan taem.
Dei Taem Aoa
Mande
Tusde
Wenesde
Tasde
Fraede
Sarede
Sande
Total Aoa: 12