Program Blong Famle—Famle i Prij
1 Jeova i glad tumas taem hem i luk ol yangfala we oli presem nem blong hem. (Sam 148:12, 13) Long taem blong Jisas, ol ‘pikinini mo ol smosmol pikinini oli presemgud’ God tu. (Mat. 21:15, 16) Sem samting i stap hapen tede. ?Ol papa mama, olsem wanem yufala i save givhan long ol pikinini blong yufala blong oli kam ol man we oli wok strong blong presem Jeova long wok blong prij? Bakegen, samting we i impoten moa, hemia eksampol blong yufala, olsem yumi luk long haf we i tokbaot ol miting blong kongregesen. Wan papa i talemaot samting we evri papa mama oli save, hem i se: “!Ol pikinini oli folem moa eksampol blong yumi, i bitim ol tok we yumi talem long olgeta!”
2 Wan sista we Kristin papa mama blong hem tufala i tijimgud hem, i talem se: “Neva mifala i wekap long Sarede moning mo askem papa mama sipos bambae mifala i go long wok blong prij no nogat. Mifala i save finis se bambae mifala i go.” Long sem fasin, yu yu save mekem ol pikinini blong yu oli luksave se wok blong prij i rili impoten, sipos ful famle i joen tugeta blong prij evri wik. Long fasin ya, ol pikinini blong yu oli save lanem blong prij taem oli wajem yu, mo yu tu yu save wajem olgeta blong luk ol tingting mo fasin blong olgeta, mo blong luk olsem wanem oli stap kamgud moa long wok blong prij.
3 Trenem Olgeta Sloslo: Blong mekem ol pikinini oli laekem wok blong prij, oli mas reregud fastaem, nao oli save joen long wok ya. Sista ya we yumi tokbaot finis antap, i talem se: “Mifala i neva go wetem papa mama blong folem tufala nomo long wok blong tufala. Mifala i save se mifala tu i gat wan wok blong mekem, nating se mifala i kilkilim doa nomo no jes givim wan smol pepa long man blong haos. From we mifala i reregud bifo we mifala i go aot long wok blong prij long wiken, ale, mifala i savegud samting we mifala i mas talem.” Yu tu yu save trenem pikinini blong yu olsem, sipos yu tekem sam minit evri wik, long taem blong famle stadi no long wan narafala taem, blong mekem olgeta oli rere long wok blong prij.
4 Taem famle i prij tugeta, hemia i givim janis long yu blong yu putum trutok i go long hat blong ol pikinini blong yu. Wan Kristin papa i stap tekem smol gel blong hem wetem hem, taem hem i wokbaot i go long wan vilej we i stap 10 kilometa longwe long narasaed hil, blong givimaot ol smosmol pepa long ol man. Gel ya i talem wetem bigfala tangkiu se: “Long ol taem ya nao we mitufala i wokbaot, papa blong mi i mekem trutok i godaon dip long hat blong mi.” (Dut. 6:7) Yu tu yu save kasem blesing taem yu putum wok blong prij i stap evri wik long program blong famle blong yu.