Program Blong Famle—Vas Blong Dei
1 Evri dei, ol papa mama we oli gat lav, oli traehad blong givim ol gudfala kakae long ol pikinini blong olgeta. Be samting we i moa impoten, hemia blong givim kakae long saed blong spirit we i kamaot long Tok blong God. (Mat. 4:4) Wan rod we i save givhan long ol pikinini blong yu blong oli wantem ol kakae long saed blong spirit mo blong ‘God i sevem olgeta,’ hemia blong tekem taem evri dei olsem wan famle, blong ridim vas blong dei mo ol komen we oli joen wetem. (1 Pita 2:2) ?Wetaem yu save mekem samting ya long program blong famle blong yu?
2 Long Taem Blong Kakae: Taem yufala i statem dei blong yufala wetem wan storian long saed blong vas blong dei, hemia i save givhan long famle blong yu blong oli putum Jeova i stap long tingting blong olgeta blong fuldei ya. (Sam 16:8) Wan mama i ridim mo i tokbaot vas blong dei mo ol komen wetem pikinini boe blong hem taem hem i stap dring ti long moning, mo hem i prea wetem smol boe ya bifo we hem i go long skul. Samting ya i givim paoa long boe ya, blong i stanap strong taem hem i kasem traem long saed blong fasin blong ona long flag, mo ol rabis fasin long saed blong seks, mo blong hem i no fraet blong prij long ol studen mo ol tija. Nating se boe ya i wan Witnes nomo long skul ya, be neva hem i harem se hem i stap hem wan.
3 Sipos i no stret long famle blong yu blong yufala i tokbaot vas blong dei long moning, maet yufala i save mekem long wan narafala taem long dei, maet taem yufala i kakae long sapa. Long taem ya, samfala oli tokbaot ol stori blong prij mo ol poen we oli laekem long prapa Baebol riding blong olgeta. Plante oli tingtingbak long ol storian olsem long taem blong kakae, mo oli talem se famle i bin hapi moa long ol taem ya.
4 Long Naet: Long sam famle, beswan taem blong oli ridim vas blong dei, hemia bifo we oli go slip long naet. Hemia i wan gudfala taem blong oli prea tu. Taem ol pikinini blong yu oli harem we yu yu tokbaot Jeova evri dei mo yu prea long hem, bambae Jeova i kam wan trufala man long tingting blong olgeta.
5 Bambae Jeova i blesem traehad we yu yu mekem, taem yu yusum buk ya Ridimgud Ol Tok Blong Baebol Evri Dei blong putum trutok i go long hat blong pikinini blong yu.