Kasem Gudfala Samting Taem Yu Ridimgud Ol Tok Blong Baebol Evri Dei

?Yu yu stap ridim stamba vas mo ol komen we i kamaot long buklet ya Ridimgud Ol Tok Blong Baebol Evri Dei? Sipos yu no stap mekem, ?yu save putum wan mak blong mekem samting ya evri dei? Plante oli laekem blong ridim evri moning. Biaen oli save tingting bakegen long hem long dei ya. (Jos 1:8; Sam 119:97) ?Olsem wanem fasin ya blong ridim ol Tok blong Baebol evridei i save halpem yu? Ridim ol vas raonabaot blong kasem save samting we oli stap tokbaot. Traem tingbaot wan stori long Baebol we i makem samting we vas ya i tokbaot. Biaen, traem luk olsem wanem yu save folem advaes ya long laef blong yu. Taem Tok blong God i gat paoa long ol desisen blong yu, bambae oli lidim gud yu long laef mo yu save kasem blesing from.—Sam 119:105.

Evri moning, ol famle blong Betel raon long Wol oli joen wanples blong ridim buklet ya, Ridimgud Ol Tok Blong Baebol Evri Dei. Long ol yia we i pas, plante long ol komen blong moning wosip oli stap kamaot long JW Brodkasting^® aninit long OL PROGRAM MO MITING. ?Wetaem i laswan taem we yu bin wajem wan o sam long olgeta? Maet sam long ol tok ya oli stret samting we yu nidim. Eksampol, ?olsem wanem stori blong Lot i save gat paoa long ol desisen blong yu?

WAJEM VIDEO YA YUFALA I NO MAS LAVEM WOL (1JO 2:15), MO BIAEN YU ANSA LONG OL KWESTIN YA:

• ?Wanem stamba vas blong Moning Wosip ya?

• ?Olsem wanem stori blong Lot i soemaot se i denja blong lavem wol o ol samting we i stap long hem?—Je 13:12; 14:12; 19:3, 12, 13, 24-26

• ?Olsem wanem yumi soemaot se yumi lavem Jehova be i no wol o ol samting we i stap long hem?