Halpem Ol Pikinini Blong Yu Blong Oli Gohed Gud Long Wok Blong Prij
1 Ol Kristin papa mama oli gat impoten wok ya blong trenem ol pikinini blong olgeta long wok blong prij, taem oli smol yet. I gat plante defren rod blong mekem olsem. Sam pikinini oli naf blong talem sam vas blong Baebol baehat bifo we oli save rid. Hemia i save gat bigfala paoa long olgeta we yumi prij long olgeta. Taem ol pikinini oli stap kam bigwan moa, oli save toktok moa long wok blong prij. ?Papa mama, olsem wanem yutufala i save givhan long ol pikinini blong yutufala blong oli joen long wok blong prij? Maet ol advaes ya oli save givhan long yutufala.
2 Afta we yu talem halo, yu save talem se:
◼ “Smol boe blong mi [nem blong hem], i wantem blong yu lesin long wan impoten vas.” Pikinini blong yu i save talem se: “Vas ya long Ol Sam i tijim mi long nem blong God. [Pikinini i ridim no i talem baehat Ol Sam 83:18 (NW ).] Ol magasin ya oli tokbaot ol samting we Jeova God bambae i mekem blong yumi. ?I oraet sipos mi livim olgeta wetem yu?” Blong finisim storian ya, eksplenem olsem wanem presen mane we ol man oli givim i sapotem wok blong yumi long olgeta ples long wol.
3 Sipos no, yu save traem rod ya:
◼ “Halo. Mi mi stap trenem gel blong mi, [nem blong hem], blong hem i soem intres long ol narafala long eria blong yumi. Hem i wantem serem wan smol save blong Baebol wetem yu.” Hem i save talem se: “Blong givhan long ol man, mi mi laekem blong tokbaot hop we Baebol i givim long saed blong fiuja. [Pikinini i ridim no i talem baehat Revelesen 21:4.] Ol magasin ya oli eksplenem wanem samting we Kingdom blong God bambae i mekem blong yumi. Mi ting se bambae yu glad blong ridim.”
4 Sipos ol pikinini oli yusum ol fastok we oli isi, hemia bambae i givhan long olgeta blong oli trastem se oli naf blong joen long wok blong talemaot gud nius blong Kingdom. Taem yufala i mekem ol pleplei wetem pikinini blong lanem ol fastok, givhan long olgeta blong toktok klia mo long strong voes. Hemia bambae i mekem olgeta oli naf blong toktok long ol defren taem mo ples. Sipos yufala i givhan long ol pikinini blong oli reregud fastaem, mo yufala i talem ol gudfala toktok from ol traehad blong olgeta, samting ya bambae i givhan long olgeta blong oli talemaot bilif blong olgeta.
5 Plante pikinini we oli kasem ol help ya blong leftemap tingting blong olgeta long wok blong prij, oli kasem mak finis we oli naf blong kam pablisa we i no baptaes yet. !Yumi kasem bigfala glad taem yumi luk we ol pikinini blong yumi oli gohed gud long wok blong prij!—Sam 148:12, 13.