Glad Blong Stadi Long Buk Ya ?Wanem Samting We Baebol i Rili Tijim?
1 Wan samting we i mekem yumi glad long Distrik Asembli ya “Obei Long God,” hemia niufala buk ya ?Wanem Samting We Baebol i Rili Tijim? I no longtaem bambae yumi yusum buk ya plante long wok blong prij, speseli taem yumi mekem ol Baebol stadi. Taswe yumi mas savegud niufala buk ya. Bambae yumi gat janis blong kasem save long buk ya taem yumi stadi long hem long Buk Stadi blong kongregesen stat long wik blong Jun 5, 2006.
2 Elda we i lukaot long Buk Stadi bambae i pulum tingting i go long ol kwestin long stat blong ol wanwan japta. Biaen, hem i save yusum ol kwestin long en blong pej blong gohed long stadi ya. Bambae oli ridim mo tokbaot ol impoten vas, mo bokis ya “Samting We Baebol i Tijim” we i stap long en blong ol japta bambae i givhan blong tingtingbak long ol japta ya, from we long bokis ya i gat ol ansa we Baebol i givim long ol kwestin we oli stap long stat blong japta. Bambae yu glad blong givim ansa from we oli mekem buk ya long fasin we i klia, i isi, mo i pulum intres blong man.
3 Diksonari blong buk ya i givim plante smosmol save bakegen long saed blong ol defdefren poen. Yumi save yusum haf ya sipos ol Baebol studen oli nidim moa save long saed blong sam poen. Bambae yumi tokbaot sam haf blong diksonari long Buk Stadi blong kongregesen. Bambae rida blong Buk Stadi i ridim evri haf blong diksonari we i eksplenem wan poen, mo bambae oli seraotem ol haf we oli longfala moa. I no gat ol kwestin long diksonari. Be elda i save askem ol kwestin long saed blong ol bigfala poen, blong pulum ol man blong ansa.
4 Long Buk Stadi bambae yumi stadi kwiktaem nomo long buk ya Baebol i Tijim. Be yumi no spid olsem taem yumi stadi wetem ol man long buk ya, antap moa sipos save blong olgeta long saed blong Baebol i smol nomo, no i nogat nating. (Wok 26:28, 29) Taem yumi mekem Baebol stadi long ol man, yumi mas tekem moa taem blong tokbaot ol vas blong Baebol, eksplenem ol pijatok, mo ol narafala samting olsem. Taswe yu mas putum mak ya blong joen evri wik long Buk Stadi mo ansa plante, taem yumi stadi long buk ya ?Wanem Samting We Baebol i Rili Tijim?