?Olsem Wanem Yumi Save Yusum Buk Ya ‘God i Lavem Yu’ Blong Mekem Ol Baebol Stadi?
1. ?From wanem oli wokem buk ya ‘God i Lavem Yu’?
1 !Long Distrik Asembli ya, “Spirit Blong God i Lidim Yumi,” yumi bin glad tumas blong kasem niufala buk ya ‘Stap Long Laef Ya We Oltaem God i Lavem Yu’! Olsem we oli talemaot long asembli, oli wokem buk ya blong yumi kasem save mo lavem ol gudfala fasin blong Jeova, mo buk ya i no blong tijim ol man long ol stamba tijing blong Baebol. Bambae yumi no seremaot buk ya long ol haos wanwan.
2. ?Bambae yumi yusum buk ya olsem wanem? ?Yumi yusum buk ya long hu?
2 Bambae yumi yusum buk ya olsem namba tu buk blong stadi wetem ol Baebol studen we oli finisim buk ya Baebol Tijim. Tingbaot se ol man oli no sem mak long fasin blong olgeta blong stadi, mo mekem samting we oli lanem i wok long laef blong olgeta., Samfala oli spid mo samfala oli slo. Yumi mas mekem stadi folem hamas save we Baebol studen i naf blong kasem. Meksua se oli kasem savegud haf ya we oli stap stadi long hem. Plante taem, yumi no mas yusum buk ya blong stadi wetem ol man we oli bin stadi long plante buk finis, be oli no stap kam long ol miting blong kongregesen, mo i klia se oli no intres blong mekem laef blong olgeta i laenap wetem ol trutok blong Baebol we oli stap lanem.
3. ?Sipos yumi stap stadi wetem wan studen long buk ya Wosipim God, yumi mas mekem wanem?
3 Sipos yu stap stadi wetem wan studen long buk ya Wosipim God, mo yu stap long ol laswan japta blong hem, yu save jusum blong finisim buk ya wetem hem mo talem long studen se i gud hem i ridim hem wan, buk ya ‘God i Lavem Yu.’ Sipos no, i moagud blong jenisim mo stadi long niufala buk, mo statem stadi ya long stat blong buk. Sem mak olsem diksonari long buk ya Baebol Tijim, yu nomo yu mas jusum sipos i nidim blong yutufala i storian long ol poen we oli stap long haf biaen long buk ya, we nem blong hem ‘Sam Moa Save.’
4. ?Wanem samting yumi save mekem sipos studen blong yumi i baptaes bifo we hem i finisim tufala buk ya Baebol Tijim mo ‘God i Lavem Yu’?
4 Sipos wan studen i baptaes bifo we hem i finisim tufala buk ya, i gud we hem i gohed blong stadi kasem we hem i finisim buk ya ‘God i Lavem Yu.’ Nating sipos studen i baptaes finis, yu save kaontem aoa we yu spenem blong mekem stadi long hem, wetem visit mo stadi ya long ripot blong yu. Pablisa we i folem yu long stadi ya mo i joen blong mekem stadi, i save kaontem aoa ya tu.
5. ?Olsem wanem yumi save yusum buk ya ‘God i Lavem Yu’ blong givhan long ol pablisa we oli no bin joen longtaem long wok blong prij?
5 Sipos Sevis Komiti blong Kongregesen i askem long yu blong mekem Baebol stadi long wan we i no moa joen longtaem long wok blong prij, maet oli talemaot long yu wanem ol japta blong buk ya ‘God i Lavem Yu’ we yutufala i save stadi long hem. Ol stadi olsem oli no nidim blong gohed longtaem. !Yumi glad tumas blong gat niufala buk ya, we oli wokem blong givhan long yumi blong stap long laef ya we oltaem ‘God i lavem yumi’!—Jud 21.