Stadi Tufala Buk Ya Laef Foreva Mo Joen Tugeta Long Wosip
1 Ol traket, buklet, magasin, mo ol buk—yumi save yusum evriwan blong statem Baebol stadi wetem ol man we oli intres. Buk ya Man We i Hae Moa Long Olgeta Man oli bin yusum blong statem ol stadi tu, from we oli seraotem plante finis long ol defren ples mo ol man oli laekem. Yes, yumi mas pulum olgeta man blong ridim mo stadi long hem. Yumi mekem samting ya taem yumi mekemrere mo joen oltaem long Buk Stadi Blong Kongregesen.
2 Be, i gat tu buk we i stret blong stadi wetem ol nyuwan blong halpem olgeta blong kasem save long ol stampa tijing blong Baebol mo ol fasin blong laef blong wan Kristin. I gat: Yu Save Laef Foreva Long Paradaes Long Wol mo Joen Tugeta Long Wosip Blong Trufala God. I gud sipos olgeta we oli stap mekem Baebol stadi ya long wan narafala buk, oli save jenisim i go long wan long tufala buk ya taem we oli save mekem olsem. Sipos hem i bin mekem stadi wetem buk ya Man We i Hae Moa, leftemap tingting blong studen ya blong gohed blong ridim hem wan. Wan Baebol stadi i mas gohed kasem we i finisim tufala buk ya Laef Foreva mo Joen Tugeta Long Wosip, nating se man ya i save kasem baptaes bifo we seken buk i finis. Samting ya bambae i givim moa dip save long Baebol studen ya mo mekem hem i stanap strong long saed blong speret.