Ansa Long Wan Kwestin
● ?From wanem yumi mas stadi tu buk wetem ol nyuwan, nating se oli tekem baptaes bifo we oli finisim tufala buk?
Jeova i stap blesem ol man blong hem. From samting ya, plante moa nyufala disaepol oli stap joen wetem ol kongregesen mo yumi glad tumas from. Be yumi save gud we ol “sipsip” ya oli nidim help mo yumi mas tijim yet ol man ya long wok blong Jeova.
Ol man we oli stadi oli nidim we yumi givhan long olgeta blong “bambae [oli] save kam we [oli] save God moa.” (Kol. 1:9, 10) Yes, fasin blong halpem olgeta blong oli kasem save long ol stampa tijing blong Baebol i rili wan gudfala wok. Mo tu, yumi gat jans blong mekem olgeta oli kasem save long mining blong ol loa we i stap long Baebol. Yumi mas soemaot long olgeta ol fasin we wan Kristin i mas gat long laef blong hem mo ol narafala samting we oli laenap long bisnes ya. Save ya bambae i givhan long olgeta blong oli kam strong moa long trutok, ale olgeta oli naf blong winim olkaen traem we oli save kasem.
Ol studen oli mas kam olsem we oli bigman finis long saed blong speret, yes, oli mas nafgud blong save long ol samting. (1 Korin 14:20) Yumi luk plante taem se sipos wan man i stadi long Baebol wetem wan tija we i save gud Baebol, bambae studen ya i save kam bigman long saed blong speret. Nating se wan man i tekem baptaes bifo we hem i finisim namba 2 buk, yumi waes sipos yumi gohed blong stadi wetem hem go kasem we hem i finisim tufala buk.
Biaen Long Baptaes
Jisas i givim oda long yumi blong yumi mekem disaepol—yumi mas baptaesem mo tijim olgeta. (Mat. 28:19, 20) Taem oli baptaes finis, yumi mas tijim olgeta long plante samting yet, mo wan buk nomo i no naf blong trenem gud olgeta long saed blong speret. Wan studen i gat nid blong kasem sam moa advaes. Ale, bambae hem i save kam naf blong mekem minista wok mo blong winim olgeta trabol we olgeta man blong Jeova we oli laef long ol las dei oli stap kasem. Sipos yumi no tekem taem blong tijim hem i naf, maet studen blong yumi i no strong inaf blong winim ol samting we i save kam traem hem. Biaen long baptaes blong hem, yumi mas gohed nomo blong givhan long hem blong hem i gru long saed blong speret, nating se hem i stadi long 2 buk finis, no no gat. Faswan buk we hem i stadi long hem i givhan long hem blong hem i kasem save long ol stampa tijing blong Baebol. Seken buk i storebaot ol Kristin fasin. Yumi save yusum Laef Foreva buk, ale yumi pas i go long buk Joengud Tugeta Long Wosip no True Peace buk. Be sipos i no gat rod blong kasem ol buk ya, yumi save yusum sam narafala buk we oli gat poen olsem i stap long hem. Fasin blong mekem stadi go kasem en blong namba 2 buk i givhan gud long studen blong yumi: Long tingting blong hem, ol plan blong Jeova oli klia nomo, mo hem i save gud ol bigfala loa mo ol wok we ol Kristin oli mas mekem. Ale, yumi halpem ol nyufala disaepol blong kasem save long mining blong ol Kristin loa mo blong stanap strong long trutok. (Kol. 2:7) Long Kingdom Wok blong Disemba 1987, haf “Ansa Long Wan Kwestin” i eksplen long sam moa samting bakegen mo i talemaot olsem wanem blong makem ol stadi ya long ripot blong prij we yumi putum.
Yumi wantem tumas we ol man we oli jes baptaes oli gohed nomo blong gru long saed blong speret. (Hib. 6:1-3) Plante taem, oli save finisim namba tu buk kwiktaem nomo. Samting ya i mekem se ol nyuwan oli save stanap strong long bilif.