Ansa Long Wan Kwestin
◼ ?Yumi mas stadi longtaem olsem wanem wetem man we i gohed gud?
Taem man we i stadi i gohed gud, bes rod blong givhan long hem, hemia blong stadi wetem hem gogo hem i finisim tufala buk ya ?Wanem Samting We Baebol i Rili Tijim? mo ‘Stap Long Laef Ya We God i Lavem Yu.’ Yumi mas mekem samting ya, nating se man we i stadi hem i baptaes bifo we hem i finisim tufala buk ya. Afta we hem i baptaes, yumi save gohed blong kaontem stadi blong hem, ol visit we yumi mekem long hem, mo taem we yumi spenem blong mekem ol samting ya. Sipos wan pablisa i kam wetem yumi blong mekem stadi blong man ya mo pablisa ya i joen long stadi blong man ya, hem tu i save kaontem taem ya.—Lukluk Kingdom Wok Blong Yumi blong manis Maj 2009, pej 2.
I impoten we ol niuwan oli gat wan gudfala fandesen long trutok bifo we yumi finisim stadi blong olgeta. Taem bambae ol samting oli traem olgeta, oli mas naf blong stanap strong. Blong mekem olsem, oli mas holem strong long Kraes olsem we “rus” blong tri i holem graon, mo bilif blong olgeta “i mas kam strong moa oltaem.” (Kol. 2:6, 7; 2 Tim. 3:12; 1 Pita 5:8, 9) Mo tu, oli mas naf blong tijim gud ol narafala, we i min se oli mas gat “stret save long trutok.” (1 Tim. 2:4, NW) Taem yumi stadi wetem ol man gogo oli finisim tufala buk ya, yumi givhan long olgeta blong oli folem gud ‘rod we i blong go kasem laef.’—Mat. 7:14.
Bifo we ol elda oli agri blong man i baptaes, oli mas meksua se hem i kasem save gud long ol stamba tijing blong Baebol mo hem i stap folem olgeta long laef blong hem. Ol elda oli mas lukaot gud taem wan man i wantem baptaes, be hem i no finis yet blong stadi long fas buk. Sipos wan man i no rere blong baptaes, ol elda bambae oli meksua se hem i kasem help we i stret blong givhan long hem, blong i kasem mak blong baptaes long fiuja.—Lukluk buklet ya ‘Go, Pulum Ol Man Oli Kam Disaepol, Mo Baptaesem Olgeta,’ pej 57-60 (Organized to Do Jehovah’s Will, pej 217-218).
[Tok blong makem poen long pej 2]
I impoten we ol niuwan oli gat wan gudfala fandesen long trutok