Ansa Long Wan Kwestin

◼ ?Wanem tufala buk we yumi mas yusum blong stadi wetem ol Baebol studen?

Baebol Tijim hem i buk ya we yumi yusum blong statem mo mekem ol Baebol stadi long ol man. I no rong sipos yumi statem wan stadi long wan narafala buk, olsem wan traket we i stret blong stadi long hem, be yumi mas traehad blong jenisim kwiktaem i go long buk ya Baebol Tijim. Plante gudfala frut oli kamaot finis from we yumi yusum buk ya Baebol Tijim blong statem ol Baebol stadi.

Taem buk ya Baebol Tijim i finis mo studen i stap gohed gud, yu save statem buk ya Wosipim God. (Kol. 2:7) Long buk ya, pej 2 hem i eksplenem risen from wanem oli raetem buk ya: “Baebol i pulum olgeta man we oli lavem God se oli mas ‘kasem paoa blong save . . . [we ol nambawan trutok ya] i hae olsem wanem, mo i dip olsem wanem.’ (Efesas 3:18) Blong givhan long yu blong mekem samting ya, mifala i wokem buk ya. Mifala i wantem se buk ya bambae i halpem yu blong gru long trutok mo mekem yu yu naf blong wokbaot folem smol rod ya we bambae i go kasem laef long niufala wol we God bambae i mekem stret fasin nomo i stap long hem.”

Sipos Baebol studen ya i kam naf blong tekem baptaes be hem i no finisim tufala buk ya yet, hem i mas gohed blong stadi go kasem we namba tu buk i finis. Nating we hem i baptaes finis, brata no sista we i mekem stadi long hem, i save makem aoa, visit mo Baebol stadi long ripot blong hem. Pablisa we i go wetem brata no sista ya i save makem aoa long ripot blong hem tu.