Mekem Baebol Stadi Wetem Laef Foreva Buk
1 Taem hem i tokbaot Laef Foreva buk, wan woman i talem se: “!Faswan buk Baebol mo mi faenem se buk ya i kam namba tu long hem, hem i stret bitim ol narafala buk, i gat paoa, mo mi neva ridim wan buk olsemia bifo, we i pulum tingting blong man!” Yumi evriwan i agri se buk ya i wan long ol nambawan buk we man i neva wokem bifo blong halpem ol man blong kasem save long Baebol mo antap moa blong pulum olgeta blong wosip long Jeova.
2 Long 1982, yia ya we Laef Foreva buk i kamaot long hem, 42 pablisa oli stap mekem 69 Baebol stadi long Vanuatu. Naoia, 190 pablisa oli stap mekem 373 Baebol stadi. Kasem naoia, oli prentem 62 milyan kopi blong Laef Foreva buk long 115 lanwis. !Buk ya i gat bigfala paoa long wok blong yumi long olgeta ples long wol!
3 Putum Sam Mak: Bigfala namba ya we i kam antap i wan frut blong blesing blong Jeova mo from fasin blong wok strong we ol man blong hem oli mekem blong halpem ol man we hat blong olgeta i stret wetem mesej ya blong sevem laef. (Rom 10: 13-15; 1 Tim. 2:4) Yumi luksave se taem i stap pas kwiktaem nomo mo i gat nid blong wok strong blong talemaot Kingdom blong God.
4 From we ogenaesesen i stap gohed, ?olsem wanem long yumi wanwan? ?Yumi strong blong joen fulwan long impoten wok ya nomo blong mekem disaepol? Blong mekem olsemia yumi wanwan i mas putum sam mak. ?Olsem wanem yumi save traehad moa blong wok long intres? Ating i gud blong putum wan mak blong statem wan nyu Baebol stadi long manis blong Febuwari no?
5 ?Hu i Save Mekem Wan Baebol Stadi?: Plante pablisa we bifo oli gruap long defren fasin oli glad blong mekem Baebol stadi long Laef Foreva buk. Isi fasin we oli yusum blong wokem buk ya long hem i mekem i isi moa blong mekem Baebol stadi wetem, mo mekem se ol nyufala pablisa tu oli save joen long impoten wok ya. Antap moa, yumi wanwan i bin stadi long buk ya mo yumi savegud long ol haf blong hem. Bifo wan pablisa i no bin mekem ol Baebol stadi, be afta we hem i yusum Laef Foreva buk, hem i raetem tok ya blong talem tangkyu blong hem se: “Mi gat tri stadi mo namba fo i rere blong stat. Mi no save olsem wanem blong talem tangkyu from yufala i mekem se i isi blong mekem ol Baebol stadi.”
6 Ol yangfala tu, oli stap joen long wok blong mekem Baebol stadi taem oli yusum Laef Foreva buk. Wan yangfala brata i livim buk ya antap long des blong hem long skul. Samting ya i mekem rod blong plante gud storeyan mo sam Baebol stadi. Sam yangfala oli askem stret long olgeta papa mama we oli faenem long wok blong prij long ol haos wanwan, blong mekem Baebol stadi wetem ol pikinini blong olgeta. Ol pikinini blong yumi oli no yangfala tumas blong tokbaot promes blong Jeova long saed long laef we i no save finis long wan paradaes long wol.
7 Nating se oli yangfala no olfala, wan long ol bigfala glad we evriwan i save kasem long minista wok, hemia blong mekem Baebol stadi. Taswe wanwan long yumi i mas prea blong askem help long Jeova mo holem evri jans we yumi gat blong talemaot hop blong yumi long olgeta ples. Yusum Laef Foreva buk blong halpem ol narafala blong lanem olsem wanem oli save joen blong presem God blong yumi, Jeova.—Sam 148: 12, 13.