Statem Ol Baebol Stadi Wetem Laef Foreva Buk
1 Lav we yumi gat long ol man i mas pusum yumi blong kwik blong gobak blong halpem olgeta we oli hanggri mo tosta long trutok. (Mat. 5:6) Yumi mas makem mo wokem eni smosmol intres we yumi faenem sipos yumi no wantem se bambae intres ya i ded. Fasin blong reregud i rod blong kasem frut.
2 Mak blong yumi i blong statem ol Baebol stadi. (Mat. 28:20) Fastok blong ol faswan kopi blong Laef Foreva buk we oli prentem, i olsem: “Hemia wan nambawan buk blong yusum blong stadi wetem evriwan, yangfala no olfala, nomata wanem mak long saed blong edukesen we oli kasem.” Oli raetem long wan wei we i mekem fasin blong lidim wan stadi long hem i isi, we i mekem se ol nyufala pablisa tu oli save mekem. Blong karem frut ya blong statem ol nyu Baebol stadi i dipen long gudhan we yumi gat blong mekem ol visit bakegen.
3 ?Olsem Wanem Yumi Save Statem Ol Stadi? Taem yumi gobak, oltaem i gud blong joenem storeyan blong yumi long wan poen no kwestin we yumi bin askem long fastaem we yumi toktok wetem man ya. Maet yu bin storeyan long olsem wanem ol dedman oli stap, mo yu bin stanemap kwestin ya se, “?Wanem hop blong ol man we yumi laekem tumas we oli ded?” Eksplenem se laef bakegen long ded i wan hop we i gat pruf long hem; Baebol i tokbaot plante eksampel blong laef bakegen long ded we oli hapen finis. Luk bakegen ol pija long pej 167-169. Afta, storeyan long paragraf 1 mo 2 long pej 166. Sipos man i soem intres, askem blong gobak blong gohed long storeyan.
4 Maet yu bin toktok long wan papa no mama we i tokbaot ol problem we hem i kasem blong tijim ol pikinini blong hem. Maet long prapa tok blong yu, yu save talem samting olsem se:
◼ “Evri papa mama oli wantem se ol pikinini blong olgeta oli gat wan nambawan laef. Baebol i gat ol advaes we oli save halpem ol papa mama blong trenem ol pikinini blong olgeta blong faenem wan gud laef we i gat mining mo risen long hem. From samting ya, mifala i askem strong se famle i mas stadi Baebol tugeta. [Lukluk paragraf 23 long pej 246.] Save we oli kasem i save karem blesing blong olwe long ful famle.” Ridim Jon 17:3. Soemaot se yu rere blong gobak blong soem long famle olsem wanem blong statem stadi blong olgeta.
5 Sipos yu wan yangfala pablisa no wan nyu pablisa mo yu bin tokbaot smoltaem hop blong Paradaes long fastaem we yu toktok wetem man, openem buk long pej 3, nao talem wan samting olsem se:
◼ “Baebol i promes se olgeta we oli mekem wok blong God oli save tingbaot fyuja we bambae oli save laef long wan wol olsemia, we i gat glad mo pis long hem. Buk ya i soem wanem yumi mas mekem blong haremgud long blesing ya.” Eksplenem kwiktaem rod we yumi folem blong mekem stadi, mo askem blong soem.
6 Olsem ol disaepol blong Jisas, yumi gat wan responsabiliti blong halpem ol man. (Rom 10:14) Sipos yumi bin seremaot buk no yumi bin gat wan gudfala storeyan nomo wetem man, yumi gat responsabiliti blong wokem intres ya. (Mat. 9:37, 38) Sipos yumi mekemgud wok ya, evriwan i save haremgud long blesing we i kamaot from.—1 Tim. 4:16.