Blong Givhan Long Ol Narafala, Gobak Long Olgeta Evriwan We Oli Soem Intres
1 ?Wanem bigfala samting i save halpem yumi blong luksave sipos wan man bambae i karem wan buk blong yumi no no gat? !Intres blong hem! Sem samting ya i tru taem yumi mekem ol visit bakegen. Nating se wan man i soem smol intres nomo long mesej blong Kingdom, be yumi mas mekem evri samting we yumi naf blong mekem blong givhan long hem. Taswe, tingting blong yumi taem yumi mekem ol visit bakegen, i blong mekem intres blong ol man i gru, mo statem ol Baebol stadi. Hemia nao samting we yumi wantem mekem, nating se maet oli no bin karem wan buk lastaem. ?Olsem wanem yumi save mekem samting ya?
2 Sipos lastaem yu bin storeyan long saed blong ol trabol insaed long ol mared tede mo divos, mo yu bin livim “Man We i Hae Moa” buk wetem man blong haos, yu save statem storeyan blong yu olsemia:
◼ “Lastaem, yumitu bin tokbaot mared mo ol advaes blong Baebol we i save wokgud, blong givhan long yumi blong kasem moa glad. Nating se sam famle oli joengud, be ating bambae yu agri se i gat sam problem i kamaot samtaem. [Wet blong man i ansa.] Baebol i givim nambawan advaes we i save halpem yumi blong stretem ol problem insaed long famle. Ol famle oli save kasem bigfala blesing from fasin blong stadi Baebol tugeta.” Soem wan buk blong stadi, maet Laef Foreva buk, pej 246, haf 23. Ridim Jon 17:3, mo talem se yu yu glad blong halpem man ya mo famle blong hem blong stadi Baebol long haos blong olgeta.
3 Sipos lastaem yu bin tokbaot ol las dei, maet yu save mekem olsemia:
Openem Man We i Hae Moa buk i go long japta 111, mo ridim haf wan, tu, mo tri. Nao yu save askem faswan kwestin long en blong japta ya: “?From wanem ol aposol oli askem kwestin long Jisas? ?Be oli stap tingbaot wanem narafala samting tu?” Givhan long man blong haos blong tingting dip long ansa blong ol kwestin ya, mo yusum pija blong tijim hem. Gohed blong ridim haf fo, faef mo sikis. Nao askem seken kwestin: “?Wanem haf blong profet tok blong Jisas i kamtru long 70 K.T.? ?Be wanem samting i no kamaot long taem ya?” Sipos yu luk se man blong haos i intres, mo i gat taem, gohed moa.
4 Sipos lastaem yu bin storeyan long saed blong wol ya we bambae i kam Paradaes, maet yu save talem samting olsemia blong pulum intres blong man blong haos bakegen:
◼ “Lastaem yumitu bin tokbaot promes blong Jisas se plante milyan man, wetem wan stilman we i ded tu, bambae oli gat jans blong laef bakegen long wol ya we bambae i kam paradaes. Be hop ya bambae i nating nomo sipos olgeta we yumi laekem olgeta tumas oli no stap wetem yumi. ?Yu yu agri?” Wet blong man i ansa. Nao ridim Revelesen 21:3, 4, mo eksplenem se olgeta we yumi laekem olgeta tumas oli save stap wetem yumi blong olwe. Biaen, openem Man We i Hae Moa buk i go long japta 91. Ridim Jon 5:28, 29 blong soem se ol dedman bambae oli laef bakegen. Mekem plan blong kambak bakegen blong tokbaot olsem wanem yumi save se samting ya i kolosap.
5 Bigfala risen blong mekem ol visit bakegen, i blong halpem ol man we oli gat intres, blong kasem blesing from mesej blong Kingdom. Plante man oli nidim sam toktok we i pulum intres blong olgeta, nao bambae oli wantem kasem moa save long saed blong speret. Pulum tingting blong olgeta i go long sam poen long buk we oli save halpem olgeta long laef blong olgeta, mo soem klia olsem wanem buk ya i save halpem olgeta blong kasem moa save long Baebol. Sipos yumi mekem ol samting ya taem yumi gobak long ol visit, bambae yumi halpem olgeta blong kasem plante blesing long rod we i nambawan olgeta.