Halpem Ol Narafala Blong Kasem Plante Blesing
1 Jeova i mekem promes se bambae Hem i tijim yumi long ol samting we yumi nidim blong save. Hem i talem klia long Ol Sam 32:8 se: “Mi bambae mi tijim yu long rod we i stret blong yu folem. Bambae mi stap givim gudfala tingting long yu mo mi stap lukaotgud long yu.” Wetem fasin we yumi tingbaot narafala fastaem, yumi wantem soem long ol man olsem wanem blong kasem plante blesing from fasin blong folem ol waes advaes blong Baebol, antap moa, ol advaes blong Jisas. (Aes. 48:17; Jon 7:46) Long Septemba, yumi save mekem samting ya taem yumi seremaot buk ya Man We i Hae Moa. Long ol storeyan blong yumi, i gat plante rod we yumi save yusum blong soem olsem wanem ol tijing blong Jisas oli save wokgud long laef blong ol man.
2 From we i gat plante trabol insaed long ol mared tede, maet yu wantem tokbaot poen ya we i kamaot long “Man We i Hae Moa” buk:
◼ “Plante man we mi bin toktok wetem olgeta, oli wari tumas long saed blong trabol insaed long ol mared, mo divos we i stap kam antap tede. ?Wanem tingting blong yu long problem ya? [Wet blong man i ansa.] Plante oli no luksave stampa blong ol problem ya. Sipos ol hasban mo waef oli traehad, oli save lukaotgud long mared blong olgeta blong i no brok, mo tu, oli save faenem trufala glad insaed long mared. Blong mekem samting ya, oli mas folem advaes we i stap long Baebol.” Ridim Efesas 5:28, 29, 33. Openem buk i go long japta 95, tokbaot haf 3 mo 6, nao askem man blong karem buk.
3 Yu save yusum wan traket blong statem wan storeyan long “Man We i Hae Moa” buk. Yu save talem samting olsemia:
◼ “Taem mifala i stap storeyan wetem ol man, mifala i luk we plante oli wari long saed blong . . . [Jusum wan samting we oli talemaot long nyus i no longtaem]. I luk olsem we ol trabol long wol i stap kam moa nogud. Samfala oli ting se maet wol ya bambae i lus olgeta. ?Wanem tingting blong yu? [Wet long man blong haos blong ansa.] Bambae yu faenem se traket ya i leftemap tingting blong yu. [Givim traket ya ?Wol Bambae i Lus No i Stap? long man blong haos, mo holem wan traket we i sem mak long han blong yu.] Traem luk profet tok blong Jisas long ples ya . . . ” Ridim sam poen long pej 4 mo 5 we oli laenap wetem samting we i bin kamaot long ples blong yu, we yu tokbaot long stat blong storeyan ya. Nao yu save soem Man We i Hae Moa buk. Openem buk i go long japta 111 we i tokbaot sam moa samting long profet tok blong Jisas.
4 Blong givimaot “Man We i Hae Moa” buk, maet yu wantem tokbaot olsem wanem bambae wol i kam wan paradaes:
◼ “Mi sua we yu stap tingbaot se laef long fyuja bambae i olsem wanem. Long Prea blong Masta, Jisas i tijim yumi blong prea se ol samting we God i wantem bambae oli kamaot long wol olsem oli kamaot long heven finis. ?Bambae wol ya i olsem wanem taem samting ya i hapen? [Wet long ansa.]” Soem pija long japta 125, mo tokbaot promes blong Jisas long wan stilman. Nao askem man blong haos sipos ol dedman olsem man ya, bambae oli gat jans blong laef bakegen long wol ya long fyuja. Soem pija long japta 133 mo ridim haf 4. “?Yu ting se bambae i gud tumas blong laef long wan wol olsemia? Buk ya i save soem long yu mo famle blong yu olsem wanem yufala i save kasem laef long paradaes olsem.”
5 Wan bigfala samting we i save mekem se yu karem frut long storeyan blong yu, hemia fasin blong mekemrere gud fastaem. Bifo we yu kilim doa blong wan haos long wok blong prij, mekem sua se yu gat wan samting i stap long tingting blong yu long saed blong wan vas blong Baebol. Mo tu, yu mas gat long tingting blong yu, sam smol toktok long saed blong wan gudfala haf blong wan magasin no traket, we yu save talem long man blong haos sipos hem i no karem wan buk. Yusum evri jans we yu kasem long manis Septemba, blong planem ol sid blong trutok long saed blong Kingdom. (Ekles. 11:6) Long fasin ya, bambae yu save halpem ol narafala blong kasem ol blesing we oli no save finis.