Wetem Fasin Lav, Halpem Olgeta We Oli Soem Intres
1 Taem enjel blong Jeova i lidim disaepol Filip i go long wan man Itiopia we i gat trufala intres long Trutok blong God, wetem fasin lav, Filip i askem long hem sipos i save givhan long hem blong kasem save long wanem we hem i stap ridim. (Wok 8:26-39) ?Olsem wanem, yumi mekem spesel fasin traehad blong halpem ol man we oli soem intres? Yumi mas, from se wok we God i askem yumi blong mekem i joen long wok blong mekem disaepol. (Mat. 28:19, 20) ?Yumi save mekem wanem blong halpem olgeta?
2 Makemaot sam taem evri wik blong mekem ol visit bakegen. Mekem plan blong gobak long olgeta we oli bin soem intres, mo traem blong gohed long storeyan blong Baebol we yu statem long fastaem we yu toktok wetem man. Holem long tingting blong yu mak ya blong statem wan Baebol stadi. Askem man blong mekem sabskripsen no gobak evritaem wetem ol nyufala Wajtaoa mo Wekap! we oli kamaot.
3 Sipos yu bin livim magasin ya long saed blong ronem mane, yu save talem se:
◼ “Long lastaem mi kam, yumi bin tokbaot olsem wanem i had blong winim ol problem long saed blong mane. Baebol i givhan long yumi naoia mo i givim wan hop long yumi long fyuja. ?Yu ting se bambae yumi save laef long wol we i no moa gat ol problem oli kamaot from yumi sot long mane?” [Wet long ansa.] Yu save soem olsem wanem Kingdom blong God bambae i givim wanem yumi nidim tumas, taem yu yusum ‘Reasoning’ buk pej 144-145 (174-175). No yu save yusum Laef Foreva buk long pej 157-158 blong statem storeyan long saed blong nyufala wol. Yu save askem man blong karem Wajtaoa blong Oktoba 1.
4 Sipos yu bin tokbaot olsem wanem Baebol i impoten long fastaem we yu storeyan wetem man, maet yu gohed long storeyan ya, taem yu yusum poen long pej 66 (59) blong “Reasoning” buk mo talem wan samting olsem se:
◼ “Samfala oli harem se advaes blong Baebol i no save wok long wol blong yumi tede. ?Wanem tingting blong yu? [Wet long ansa.] ?Yu yu agri se wan buk we i givim gudfala advaes we i save halpem yumi blong gat wan famle laef we i hapi, i stret long laef blong yumi tede? [Wet long ansa.] Ol tingting mo fasin blong ol man long saed blong famle laef oli jenis long taem blong yumi, mo frut we yumi luk oli nogud. Be ol famle we oli mekem wanem Baebol i talem oli stanap strong mo oli hapi.” Ridim Kolosi 3:18-21. Askem man blong mekem sabskripsen. Sipos hem i no wantem, askem hem blong karem magasin no traket ya From Wanem Yu Yu Save Bilif Long Baebol, mo eksplenem se yumi gat program blong stap mekem fri Baebol stadi wetem ol man.
5 Yu save statem wan storeyan long saed blong ol dedman oli stap olsem wanem long rod ya:
◼ “I bin gat plante tok long saed blong olsem wanem long ol man taem oli ded. ?Yu ting se wanem bambae i hapen long yumi taem yumi ded? [Wet long ansa.] Bighaf blong ol skul oli tijim se yumi gohed blong stap laef long wan narafala bodi. Plante man oli sapraes blong harem wanem Baebol i talem long bisnes ya. [Ridim Eklesiastis 9:5.] Nating se ol dedman oli no save wan samting nating, God i no fogetem olgeta. God i promes blong mekem olgeta oli laef bakegen aninit long rul blong Kingdom blong hem.” Openem Wajtaoa blong Oktoba 15, 1994, no Laef Foreva buk long pej 162, mo storeyan long ol vas blong Baebol mo ol pija. Mekem plan blong visit bakegen, wetem tingting blong statem wan Baebol stadi.
6 Man Itiopia i agri se hem i no save kasem save sipos wan narafala man i no givhan long hem. (Wok 8:31) Wetem fasin lav, Filip i givim help we hem i nidim. Yumi save soem trufala lav blong yumi long ol narafala man taem yumi halpem olgeta long sem rod.